މެލޭޝިއާގެ އެއާ އޭޝިއާ ކުންފުނިން އެއާބަސް މަރުކާގެ އެންމެ ފަހުގެ އޭ220-300 މަރުކާގެ 150 ބޯޓު ގަތުމަށް އެއްބަސްވުމެއްގައި ސޮއިކޮށްފިއެވެ. މިއީ އެއާބަސްގެ މި މަރުކާގެ ބޯޓުތަކަށް މިހާތަނަށް އެއްފަހަރާ ލިބުނު އެންމެ ބޮޑު އޯޑަރެވެ.
މި އޯޑަރާއެކު މި މަރުކާގެ ބޯޓުތައް ގަތުމަށް ދުނިޔޭގެ އެކި ކުންފުނިތަކުން ދީފައިވާ ޖުމްލަ އޯޑަރުގެ އަދަދު ވަނީ 1،000 އަށް ވުރެ މައްޗަށް އަރާފައެވެ.
ކެނެޑާގެ މިރަބެލްގައި ހުންނަ އެއާބަސްގެ މަރުކަޒުގައި ބޭއްވި ރަސްމިއްޔާތެއްގައި އެއްބަސްވުމުގައި އެއާ އޭޝިއާގެ ފަރާތުން ސޮއިކުރެއްވީ ކެޕިޓަލް އޭގެ ސީއީއޯ އަދި އެއާ އޭޝިއާ ގްރޫޕްގެ އެޑްވައިޒަރު ޓޯނީ ފެނާންޑޭޒް އެވެ. އެއާބަސްގެ ފަރާތުން ސޮއިކުރެއްވީ އެ ކުންފުނީގެ ކޮމާޝަލް އެއާކްރާފްޓްގެ ސީއީއޯ ލާސް ވަގްނަރ އެވެ. މި ރަސްމިއްޔާތުގައި ކެނެޑާގެ ބޮޑުވަޒީރު މާކް ކާނީ ބައިވެރިވެވަޑައިގަތެވެ.
މި އެއްބަސްވުމާއެކު އެއާ އޭޝިއާ ވެގެންދާނީ އޭ220 މަރުކާގެ ބޯޓުތައް އަލަށް ބޭނުންކުރަން ފަށާ ކުންފުންޏަކަށެވެ. އަދި މި ބޯޓުގެ އައު ކެބިން ކޮންފިގަރޭޝަން ނުވަތަ 160 ގޮނޑީގެ ޖާގަ ހިމެނޭ ބޯޓުތައް އެންމެ ފުރަތަމަ ބޭނުންކުރާ ކުންފުންޏަކީވެސް އެއާ އޭޝިއާއެވެ.
އެއާ އޭޝިއާގެ މިހާރުގެ ފްލީޓަށް އިތުރުވާ މި ބޯޓުތަކަކީ އެ ކުންފުނީގެ ދަތުރުތައް ފުޅާކުރުމުގައި މުހިންމު ދައުރެއް އަދާކުރާނެ ބޯޓުތަކެކެވެ. މި ބޯޓުތައް ބޭނުންކުރާނީ އޭޝިއާގެ ގައުމުތަކާއި މެދުތެރޭ އޭޝިއާގެ މަންޒިލްތަކަށް ދަތުރުކުރުމަށެވެ. މީގެ ސަބަބުން މިހާރު ބޭނުންކުރާ ބޮޑެތި ބޯޓުތައް ދިގު ދަތުރުތަކަށް ހާއްސަކުރުމުގެ ފުރުސަތު ލިބިގެންދާނެއެވެ.
ޓޯނީ ފެނާންޑޭޒް ވިދާޅުވި ގޮތުގައި މި އޯޑަރަކީ އެ ކުންފުނީގެ ދުރު ރާސްތާގެ އަމާޒުތައް ހާމަކޮށްދޭ ކަމެއް ކަމަށާއި، އޭ220 ބޯޓުތަކުގެ ސަބަބުން އައު މާކެޓްތަކަށް ދަތުރުކުރުމުގެ މަގު ފަހިވެގެންދާނެ ކަމަށް އޭނާ ވިދާޅުވިއެވެ. އަދި އެއާބަސް އާއެކު އޮތް 20 އަހަރަށްވުރެ ދިގު ގުޅުމަކީ އެ ކުންފުނީގެ ކާމިޔާބީގެ އަސްލު ކަމުގައިވެސް އޭނާ ފާހަގަކުރެއްވިއެވެ.
އެއާބަސްގެ ސީއީއޯ ލާސް ވަގްނަރ ވިދާޅުވީ އޭ220 ބޯޓަކީ އެއާ އޭޝިއާއަށް އެންމެ އެކަށީގެންވާ ބޯޓު ކަމަށެވެ. މި ބޯޓަކީ ދަތުރުތަކަށް ހިނގާ ހަރަދު ކުޑަ އަދި ދުރު ރާސްތާއަށް ދަތުރުކުރުމުގެ ގާބިލްކަން ލިބިފައިވާ ބޯޓެއް ކަމަށް އޭނާ ވިދާޅުވިއެވެ.
އޭ220 މަރުކާގެ ބޯޓުތަކަކީ އެ މަރުކާގެ ބޯޓުތަކުގެ ތެރެއިން އެންމެ ދުރަށް ދަތުރުކުރެވޭ، ތެޔޮ ހޭދަވާ މިންވަރު އެންމެ ކުޑަ އަދި ކެބިން އެންމެ ތަނަވަސް ބޯޓުތަކެވެ. މި ބޯޓުތަކުގައި 100 އާއި 160 އާ ދެމެދުގެ ފަސިންޖަރުންނަށް ދަތުރުކުރެވޭއިރު، މެދުކެނޑުމެއްނެތި 6،700 ކިލޯމީޓަރަށް ދަތުރުކުރުމުގެ ގާބިލްކަން ހުރެއެވެ. 2026 ވަނަ އަހަރުގެ މާޗު މަހުގެ ނިޔަލަށް ދުނިޔޭގެ 25 ކުންފުންޏަކަށް މި މަރުކާގެ 501 ބޯޓު ވަނީ ފޯރުކޮށްދީފައެވެ.
