"ވަރުބަލިވެފައިވާ" ދެކުނު ކޮރެއާގައި ނިދުމުގެ މުބާރާތެއް ބާއްވައިފި

May 4, 2026, 8:57 AM
ދެކުނު ކޮރެއާގެ ސޯލްގައި ބޭއްވި 2026 ވަނަ އަހަރުގެ "ޕަވަރ ނެޕް" މުބާރާތުގެ ތެރެއިން، ބައިވެރިއަކު ނިދާފައި. -- ފޮޓޯ: ރޮއިޓާސް

ދެކުނު ކޮރެއާގެ ސޯލްގައި ބޭއްވި 2026 ވަނަ އަހަރުގެ "ޕަވަރ ނެޕް" މުބާރާތުގެ ތެރެއިން، ބައިވެރިއަކު ނިދާފައި. -- ފޮޓޯ: ރޮއިޓާސް

މިދިޔަ ހޮނިހިރު ދުވަހުގެ ހިތްގައިމު މެންދުރުފަހުގެ ވަގުތެއްގައި، ސޯލްގެ ހާން ކޯރު ކައިރީގައި އޮންނަ ޕާކަކަށް އެ ސިޓީގެ އެތައް ސަތޭކަ ޒުވާނުންނެއް ޖަމާވީ ސިޓީ ކައުންސިލްގެ ދައުވަތަކަށެވެ. އެ މީހުން އެ ތަނަށް އެއްވީ މަސައްކަތް ބުރަވުމުގެ ސަބަބުން ދެކުނު ކޮރެއާގެ ގިނަ ރައްޔިތުންނަށް ނުލިބިފައިވާ މުހިންމު އެއްޗެއް ހޯދުމަށެވެ. އެއީ އަރާމު ނިންޖެކެވެ.

ސޯލް މެޓްރޯޕޮލިޓަން ސަރުކާރުން އިންތިޒާމުކުރި ތިންވަނަ އަހަރީ "ޕަވާ ނެޕް" މުބާރާތް ފެށީ އެ ދުވަހުގެ މެންދުރުފަހު 3:00 ގައެވެ. މި އަހަރުގެ މުބާރާތުގައި ބައިވެރިވުމަށް އާ ޝަރުތުތަކެއް ކަނޑައަޅާފައިވެ އެވެ. އެއީ ނިދާފައި އޮންނަ މީހާ "ސްލީޕިން ބިއުޓީ" ނުވަތަ "ޕްރިންސް" އެއް ފަދަ ހެދުމެއްގައި ހުރުމާއި، ބަނޑުފުރައި ކައިގެން ހުރުމުގެ އިތުރުން މުބާރާތަށް އަންނައިރު ވަރުބަލިވެފައި ހުރުމެވެ.

ސައުވީސް ގަޑިއިރު ހުޅުވާފައި ހުންނަ ފިހާރަތަކާއި، ވާދަވެރި މަސައްކަތުގެ މާހައުލާއި އަދި "އައިސްޑް އެމެރިކާނޯ" ކޮފީއަށް މަޝްހޫރު ސޯލް ސިޓީގެ ރައްޔިތުން ތިބީ އިންތިހާއަށް ވަރުބަލިވެފައިކަން އެ ސަރަހައްދުގެ ވިނަގަނޑުމަތިން ފެންނަން އޮތް މަންޒަރުތަކުން ސާފުވެ އެވެ.

Advertisement

"އިމްތިހާނަށް ތައްޔާރުވުމާއި ޕާޓް-ޓައިމް ވަޒީފާތަކުގެ ސަބަބުން ރޭގަނޑު އަހަންނަށް ލިބެނީ އެންމެ ތިން ގަޑިއިރު ނުވަތަ ހަތަރު ގަޑިއިރުގެ ނިދި. ދުވާލު ގަޑީގައި ޑެސްކު މަތީގައި ކުޑަކޮށް ނިދާލައިގެން ކިރިޔާ މިއުޅެވެނީ،" ޕާކް ޖުން-ސިއޮކް ރޮއިޓާޒް ނޫހަށް ބުންޏެވެ.

އުމުރުން 20 އަހަރުގެ ޔުނިވާސިޓީ ދަރިވަރު ޕާކް އިތުރަށް ބުނީ، އޭނާ އެ ތަނަށް އައީ އޭނާގެ ނިދުމުގެ ހުނަރު ދައްކާލުމަށް ކަމަށެވެ.

އޭނާގެ ކައިރީގައި ދެން އޮތީ ސޯލްގެ އުތުރުގައި އޮންނަ އިލްސާންއަށް ނިސްބަތްވާ އުމުރުން 24 އަހަރުގެ އިނގިރޭސި ޓީޗަރެއް ކަމަށްވާ ޔޫ މީ-ޔިއޮން އެވެ.

"އަހަންނަކީ އަބަދުވެސް ނިދިނައުމުގެ ބަލި (އިންސޯމްނިއާ) ހުންނަ މީހެއް. ނިދަން ވަރަށް އުނދަގޫވޭ، އަދި ކުޑަ އަޑަކަށްވެސް ހޭލެވޭ،" އޭނާ ބުންޏެވެ. 

ޖެހިޖެހިގެން ތިންވަނަ އަހަރު ބޭއްވި މި މުބާރާތުން ހާމަވަނީ ދެކުނު ކޮރެއާގެ ރައްޔިތުންނަށް ކުރިމަތިވެފައިވާ ދާއިމީ މައްސަލައެކެވެ. ތަފާސްހިސާބުތަކުން ދައްކާ ގޮތުގައި، އޯގަނައިޒޭޝަން ފޯ އިކޮނޮމިކް ކޯޕަރޭޝަން އެންޑް ޑިވެލޮޕްމަންޓް (އޯއީސީޑީ) ގެ މެންބަރު ގައުމުތަކުގެ ތެރެއިން އެންމެ ގިނައިން މަސައްކަތްކުރާ އަދި ނިދި އެންމެ މަދުން ލިބޭ އެއް ގައުމަކީ ދެކުނު ކޮރެއާ އެވެ. މީގެ ނަތީޖާއެއްގެ ގޮތުން އެ ގައުމުގެ ރައްޔިތުން ނިދުމަށް ހޭދަކުރާ ވަގުތު އިންތިހާއަށް މަދެވެ.

މެންދުރުފަހު ތިނެއް ޖެހުމާއެކު ބައިވެރިން ލޯމަތީގައި މާސްކު އަޅައި ނިދަން ފެށުމުން، އޮފިޝަލުން ވަނީ ބައިވެރިންގެ ހިތުގެ ވިންދު ހުރި މިންވަރު ބަލާފަ އެވެ. އެއީ ބައިވެރިން ތިބީ ގަދަ ނިންޖެއްގައިކަން ޔަގީންކުރުމަށްޓަކަ އެވެ.

މި މުބާރާތުން އެއްވަނަ ހޯދީ އުމުރުން 80 ގެ އަހަރުތަކުގެ ފިރިހެނެކެވެ.

މުބާރާތުގެ ދެވަނަ ހޯދީ އުމުރުން 37 އަހަރުގެ އޮފީސް މުވައްޒަފެއް ކަމަށްވާ ހުވަންގް ޑޫ-ސިއޮންގް އެވެ.

"އަހަރެން ހުރީ ވަރަށް ބޮޑަށް ވަރުބަލިވެފައި. ކޮންމެ ދުވަހަކު ވަޒީފާއަށް ދިއުމުގެ އިތުރުން ގިނަ ވަގުތު ނައިޓް ޝިފްޓްގައި މަސައްކަތްކުރަން ޖެހޭ، އަދި ވަޒީފާގެ ގޮތުން ވަރަށް ގިނައިން ދުއްވަންވެސް ޖެހޭ. އެހެންވެ މި މުބާރާތް ފެނުމުން، ކޯރުގެ ފިނިވައިގެ ތެރޭގައި ނިދާލައިގެން ހަށިގަނޑަށް އާރޯކަން ހޯދަން އަހަރެން އަޒުމް ކަނޑައެޅިން. ނަސީބަކުން ދެވަނަ ލިބުމުން ވަރަށް އުފާވެއްޖެ،" ހުވަންގް ބުންޏެވެ.

ކޮމެންޓް

ފަހުގެ ޚަބަރު

އުމުރުން 70 އަށް ދުޅަހެޔޮކޮށް ދިއުމަށް ސައިންސްވެރިން އިރުޝާދު

އުމުރުން 30 ގެ އަހަރުތަކަކީ ހަށިގަނޑަށް ބަދަލުތައް އަންނަ ދުވަސްވަރަކަށް ވުމުން، މި އުމުރުގައި ކަސްރަތުކުރުމާއި ނިދުމުގެ އާދަތައް ރަނގަޅުކުރުމަކީ އުމުރުން ދުވަސްވާއިރު ދުޅަހެޔޮކަންމަތީ ހުރުމަށް އެޅޭ މުހިންމު ފިޔަވަޅެކެވެ. މީގެ އިތުރުން، އަނގަޔާއި ދަތްތަކުގެ ސިއްހަތަށް ސަމާލުކަން ދިނުމާއި ނުރަނގަޅު އާދަތަކާ ދުރުހެލިވުމަކީ މުސްކުޅިވުމުން ކުރިމަތިވާ ބަލިތަކުން ރައްކާތެރިކޮށްދީ އުމުރު ދިގުކޮށްދޭނެ ކަންކަމެވެ.

ޖީޓީއޭ 6 ރެކޯޑް މާކްސްއަކާއެކު ނެރެފި

ތޭރަ އަހަރުގެ ދިގު އިންތިޒާރަކަށްފަހު ނެރުނު ޖީޓީއޭ 6 އަށް ރެކޯޑް މާކްސްއެއް ލިބި، ގޭމިން ދާއިރާއަށް އިންގިލާބީ ބަދަލެއް ގެނުވައިފިއެވެ. މި ގޭމުގެ ގްރެފިކްސް އާއި ވާހަކަ ކިޔައިދޭ ގޮތް ފުރިހަމަވުމުގެ އިތުރުން، މިއީ މި ސިލްސިލާގައި އަންހެން ކެރެކްޓަރަކަށް މައިގަނޑު ދައުރެއް ދިން ފުރަތަމަ ފަހަރެވެ.

މަސް ނުކައިވެސް ހަށިގަނޑަށް ބޭނުންވާ ދަގަނޑު ހޯދިދާނެ!

މަހުގެ ބާވަތްތަކުގެ އިތުރުން ފަތްޕިލާވެއްޔާއި ގޮވާމުގެ ބާވަތްތަކުން ވެސް ހަށިގަނޑަށް ބޭނުންވާ ދަގަނޑުގެ މާއްދާ ހޯދިދާނެކަން ސިއްހީ މާހިރުން ފާހަގަކުރެއެވެ. މިގޮތުން ކާނާ ތައްޔާރުކުރާ ގޮތަށް ބަދަލު ގެނައުމާއި، ވިޓަމިން ސީ އެކުލެވޭ ތަކެއްޗާއެކު ކެއުމަކީ ގަސްގަހާގެހިން ލިބޭ ދަގަނޑު ހަށިގަނޑަށް ދަމައިގަންނަ މިންވަރު އިތުރުކޮށްދޭނެ ކަންކަމެވެ.

އާ ޖޭމްސް ބޮންޑަކަށް ރޮބަޓް ޕެޓިންސަން

ޖޭމްސް ބޮންޑުގެ ރޯލު ކުޅޭނެ އާ އެކްޓަރަކަށް އިނގިރޭސި އެކްޓަރު ރޮބަޓް ޕެޓިންސަން ހަމަޖައްސައި، 2028 ވަނަ އަހަރު ރިލީޒްކުރާ ބޮންޑު ސިލްސިލާގެ 26 ވަނަ ފިލްމު ޑެނިސް ވިލެނޫވް ޑައިރެކްޓްކުރާ ގޮތަށް އެމެޒޯން އެމްޖީއެމް އިން ވަނީ އިއުލާންކޮށްފައެވެ. މި ރޯލު ލިބުމަކީ ބޮޑު ޝަރަފެއް ކަމަށް ޕެޓިންސަން ބުނެފައިވާއިރު، މިއީ ޑެނިއަލް ކްރެއިގަށް ފަހު މި މަޝްހޫރު ޖާސޫސީ ރޯލުން ފެންނާނެ ހަތްވަނަ އެކްޓަރެވެ.

އަނދިރީގައި ފެންވެރުން ނިދި އައުން ފަސޭހަވޭތަ؟

ނިދުމުގެ ކުރިން އަނދިރީގައި ފެންވެރުމަކީ ހަށިގަނޑުން މެލަޓޯނިން އުފައްދައިދީ، ސިކުނޑި ހަމަޖައްސައިދީ އަވަހަށް ނިދި އައުމަށް އެހީތެރިވެދޭ ކަމެއް ކަމަށް ސިއްހީ މާހިރުން ބުނެއެވެ. މިގޮތަށް ފެންވެރުމުން ހަށިގަނޑުގެ ފިނިހޫނުމިން ދަށްވެ، ދުވަހުގެ ސްޓްރެސް ކުޑަކޮށްދީ ނަފްސާނީ ގޮތުން އަރާމު ލިބިގެންދެއެވެ. ނަމަވެސް މިއީ ނިދުމުގެ ބޮޑެތި ބަލިތަކަށް އޮތް ދާއިމީ ހައްލެއް ނޫންކަމަށް މާހިރުން ފާހަގަކުރެއެވެ.

ޕްރޮސްޓޭޓް ކެންސަރަށް ގަވާއިދުން ސްކްރީން ކުރަން ބުނެފި

ޕްރޮސްޓޭޓް ކެންސަރު ޖެހޭ މިންވަރު އިތުރުވަމުންދާތީ، އެމެރިކަން ކެންސަރ ސޮސައިޓީން ވަނީ އުމުރުން 50 އަހަރާއި 69 އަހަރާ ދެމެދުގެ ފިރިހެނުން ގަވާއިދުން ސްކްރީން ކުރުމަށް އާ އިރުޝާދުތަކެއް ނެރެފައެވެ. މި ބަދަލުގެ ދަށުން ބަލީގެ ނުރައްކާ ބޮޑު މީހުން އުމުރުން 45 އަހަރުން ފެށިގެން ކޮންމެ އަހަރަކު ޓެސްޓުކުރަން ލަފާދީފައިވާއިރު، މީގެ މަގުސަދަކީ ބަލި ކުރީކޮޅު ދެނެގަނެ މަރުވާ މިންވަރު މަދުކުރުމެވެ.

ޓޭލާ ސުވިފްޓަކީ ފޭކު ސަޕޯޓަރެއް ކަމަށް ކުޅުންތެރިން ބުނެފި

ނިއުޔޯކް ނިކްސްގެ ބައެއް ކުޅުންތެރިން ޓޭލާ ސުވިފްޓަކީ ދެއްކުންތެރިކަމަށް މެޗުތަކަށް އަންނަ "ފޭކު" ސަޕޯޓަރެއް ކަމަށް ބުނުމުން، އެ ޓީމުން އޭނާގެ ދިފާއުގައި ވާހަކަދައްކައިފިއެވެ. ޓީމުގެ ތަރުޖަމާނު ވަނީ ސުވިފްޓަކީ ގިނަ ދުވަސްތަކެއް ވަންދެން ޓީމަށް ސަޕޯޓްކުރާ ވަފާތެރިއެއްކަން ފާހަގަކޮށް، ކުޅުންތެރިންގެ ވާހަކަތައް ދޮގުކޮށްފައެވެ.

Newsletter

Get the latest news delivered straight to your inbox