ދެކުނު ކޮރެއާގެ ކުރީގެ ރައީސް ޔޫން ސުކް ޔޯލް 2024 ވަނަ އަހަރު އިއުލާންކުރެއްވި ކުރު މުއްދަތުގެ މާޝަލް ލޯ ނުވަތަ އަސްކަރީ ގާނޫނާ ގުޅިގެން އޭނާގެ މައްޗަށް އިއްވާފައިވާ ޖަލު ހުކުމް، އެ ގައުމުގެ އިސްތިއުނާފީ ކޯޓުން ހަތް އަހަރަށް އިތުރުކޮށްފި އެވެ. މި ހުކުމް އިތުރުކޮށްފައިވަނީ އެ މައްސަލަ އިސްތިއުނާފު ކުރުމާ ގުޅިގެންނެވެ.
މިދިޔަ ޖެނުއަރީ މަހު ދަށު ކޯޓުން ޔޫންގެ މައްޗަށް ފަސް އަހަރުގެ ޖަލު ހުކުމެއް އިއްވީ ބައެއް ދައުވާތަކުން އޭނާ ބަރީއަކުރުމަށްފަހުގަ އެވެ. ނަމަވެސް، އިސްތިއުނާފީ ކޯޓުން ވަނީ އޭނާ ހައްޔަރުކުރުމަށް އައި ކަމާބެހޭ ފަރާތްތަކަށް ހުރަސްއެޅުމަށް ރިޔާސީ ސަލާމަތީ ހިދުމަތްތައް ބޭނުންކުރި މައްސަލަ ހިމެނޭހެން، އިތުރު ދައުވާތަކެއް ސާބިތުވާކަމަށް ކަނޑައަޅާފަ އެވެ.
ސޯލް ހައި ކޯޓުގެ ފަނޑިޔާރު ވިދާޅުވީ، ބާރުގެ ބޭނުންކޮށްގެން ހައްޔަރުކުރުމުގެ އަމުރެއް ތަންފީޒުކުރުން ހުއްޓުވަން މަސައްކަތް ކުރުމަކީ، ގާނޫނާއި ގަވާއިދު ހިނގާ މުޖުތަމައެއްގައި ބަލައިގަނެވޭނެ ކަމެއް ނޫން ކަމަށެވެ.
މިދިޔަ އަހަރު މަގާމުން އަޒުލުކޮށް ވަކިކުރި، އުމުރުން 65 އަހަރުގެ ކުރީގެ ޕްރޮސެކިއުޓަރުގެ މައްޗަށް ވަނީ ރަސްމީ ލިޔެކިޔުންތައް އޮޅުވާލުމާއި، އަސްކަރީ ގާނޫނު އިއުލާންކުރުމުގައި ފުރިހަމަކުރަންޖެހޭ ގާނޫނީ އިޖުރާއާތްތަކަށް އަމަލުނުކުރުމުގެ ކުށް ވެސް ސާބިތުވެފަ އެވެ.
އަސްކަރީ ގާނޫނު އިއުލާންކުރި މައްސަލަތައް ބެލުމަށް ހާއްސަކޮށް އުފެއްދި ކޯޓު ޑިވިޝަނުން ނިންމި މި ފުރަތަމަ ނިންމުން ވަނީ ޓީވީ މެދުވެރިކޮށް ވަގުތުން ދައްކާފަ އެވެ.
ޕްރޮސެކިއުޓަރުން އެދިފައިވަނީ ޔޫންގެ މައްޗަށް 10 އަހަރުގެ ޖަލު ހުކުމެއް އިއްވުމަށެވެ. އެ ފަރާތްތަކުން ތުހުމަތުކުރާ ގޮތުގައި ޔޫން ވަނީ ރައްޔިތުންގެ އިތުބާރަށް ހިޔާނާތްތެރިވެ، ދުސްތޫރީ ނިޒާމު މުގުރާލައި، ދައުލަތުގެ ވަސީލަތްތައް ބޭނުންކޮށްގެން އަމިއްލަ ބާރު ދެއްކުމަށް މަސައްކަތް ކުރައްވާފަ އެވެ.
ދަށު ކޯޓުގެ ނިންމުން ޔޫން އިސްތިއުނާފު ކުރެއްވީ، ޝަރީއަތުގެ ތެރޭގައި ފެންމަތިވި ހެކިތަކަށް ކޯޓުން އިހުމާލުވެފައިވާ ކަމަށާއި ހަގީގަތްތައް އޮޅޭ ގޮތަށް މާނަކޮށްފައިވާ ކަމަށް ބުނެ އެވެ.
ޔޫންގެ ވަކީލުން ބުދަ ދުވަހު ބުނީ، އިސްތިއުނާފީ ކޯޓުގެ ނިންމުމަކީ "ބަލައިގަނެވޭނެ" ނިންމުމެއް ނޫން ކަމަށާއި، ސިޔާސީ ކަންތައްތަކެއްގެ ގޮތުގައި ބެލެވިދާނެ ކަންކަމަށް ހަރުކަށި ގާނޫނީ އުސޫލުތައް ކޯޓުން ތަންފީޒުކޮށްފައިވާތީ، އެ މައްސަލަ ސުޕްރީމް ކޯޓުގައި އިސްތިއުނާފު ކުރާނެ ކަމަށެވެ.
މިދިޔަ އޭޕްރީލް މަހު މަގާމުން ވަކިކުރި ޔޫންއާ ދެކޮޅަށް އަށް ޝަރީއަތެއް ކުރިއަށް އެބަދެ އެވެ. ޔޫން ޖަލުގައި ބަންދުކުރީ މިދިޔަ ޖުލައި މަހު އެވެ.
އެހެން މައްސަލަތަކުގެ ތެރެއިން، 2024 ވަނަ އަހަރު އަސްކަރީ ގާނޫނު އިއުލާންކޮށް ވެރިކަން ދަމަހައްޓަން ރޭވި ކަމަށް ސާބިތުވެ ޔޫންގެ މައްޗަށް ފެބްރުއަރީ މަހު ވަނީ އުމުރު ދުވަހުގެ ޖަލު ހުކުމެއް އިއްވާފަ އެވެ.
ނަމަވެސް، ޔޫން ގެންދަވަނީ އޭނާގެ މައްޗަށް ކުރެވޭ ހުރިހާ ތުހުމަތުތަކަކަށް އިންކާރު ކުރައްވަމުންނެވެ.
