އަދަދު ނޫހުން ގެނެސްދިން "އައިޝާ" ޑޮކިއުމެންޓްރީއާ ގުޅިގެން އެ ނޫހުގެ މައްޗަށް ޖިނާއީ ތަހުގީގެއް ހިންގަން ފުލުހުންނަށް ޕްރޮސެކިއުޓާ ޖެނެރަލް (ޕީޖީ) އައްބާސް ޝަރީފް އެންގެވުމަށްފަހު، ރައީސުލްޖުމްހޫރިއްޔާގެ ރަސްމީ ގެކޮޅު މުލީއާގޭގައި ރައީސް މުހައްމަދު މުއިއްޒުއާއެކު ސިއްރު ބައްދަލުވުމެއް ބޭއްވެވިކަމުގެ މައުލޫމާތު ލިބިއްޖެ އެވެ.
އަދަދު އަށް އެކި މަސްދަރުތަކުން މި ބައްދަލުވުން ބޭއްވިކަން ކަށަވަރުވެފައިވީ ނަމަވެސް، ބައްދަލުވުމުގައި ދެކެވުނީ ކޮން ވާހަކައެއްކަން ކަށަވަރު ކުރެވިފައެއް ނުވެ އެވެ.
މިކަމާ ގުޅޭގޮތުން ޕީޖީ އައްބާސް ޝަރީފްގެ ބަހެއް ހޯދަން ތަކުރާރުކޮށް އޭނާއަށް ގުޅައި މެސެޖުކުރުމުންވެސް މުއިއްޒުއާ ބައްދަލުކުރެއްވިކަން ދޮގުކުރައްވާފައެއް ނުވެ އެވެ.
ވެރިކަމުގެ ހުވާ ކުރެއްވުމަށް ފަހު މުއިއްޒު އެންމެ ފުރަތަމަ އައްޔުަނުކުރި ސިޔާސީ މުވައްޒަފުންގެ ތެރޭގައި އައްބާސް ހިމެނެ އެވެ. ނޮވެމްބަރު 17، 2023 ގައި އޭނާ އައްޔަނުކުރީ ރައީސް އޮފީހުގެ ލީގަލް އެފެއާޒް ސެކްރެޓަރީގެ މަގާމަށެވެ. އޭނާ ޕީޖީގެ މަގާމާ ހަވާލުވީ ސެޕްޓެމްބަރު 18، 2024 ގަ އެވެ.
އައްބާސް އާއި މުއިއްޒު ބައްދަލުކުރައްވާފައި މިވަނީ އިއްޔެ އަދަދު ނޫހުގެ ސީއީއޯ ހުސައިން ފިޔާޒް މޫސާ އާއި އެޑިޓަރު ހަސަން މުހައްމަދު ފުލުހަށް ހާޒިރުކޮށް އެ ދެ މީހުންގެ މައްޗަށް ފަސް ޖިނާއީ ކުށެއްގެ ތުހުމަތު އުފުލާފައި ވަނިކޮށެވެ.
ފުލުހުން ފިޔާޒާއި ހަސަންގެ މައްޗަށް ތުހުމަތުކުރަނީ މީހަކު ކުރާ އަމަލަކަށް އެހެން މީހާކު ޒިންމާދާރުކުރުވުން، ބައިވެރިވުމުގެ ޒިންމާގެ ކުށާއި، ގަޛްފުގެ ކުށާއި، ކުށެއް ކުރުމަށް އެދުމުގެ އިތުރުން ކުށެއް ކުރުމަށް ރޭވުމެވެ.
މި މައްސަލައާ ގުޅިގެން ފިޔާޒު އާއި ހަސަންގެ އިތުރުން ރައީސް އޮފީހުގައި ކުރިން މަސައްކަތްކުރި މުވައްޒަފެއްގެ ޕާސްޕޯޓު ވެސް ވަނީ ހިފަހައްޓާފަ އެވެ.
މިދިޔަ ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި މުއިއްޒު ވަނީ އެމަނިކުފާނުގެ މައްޗަށް ޑޮކިއުމަންޓްރީގައި އަމާޒުވި ތުހުމަތުތައް ދޮގުކުރައްވާފަ އެވެ.
ނަމަވެސް އަދަދު ނޫހަށް ފުލުހުން ވަދެ ބަލައިފާސްކުރީ ޑޮކިއުމަންޓްރީއާ ގުޅޭ ވާހަކަތައް ދައްކާ އެންމެންނަށް ދައުވާކުރަން ކަމާބެހޭ ފަރާތްތަކަށް މުއިއްޒު ގޮވާލެއްވިތާ 12 ގަޑިއިރުވެސް ނުވަނީހެވެ.
މި މައްސަލައިގައި ފުލުހުން އަދަދު އޮފީސް ރެއިޑްކޮށް ގާތްގަނޑަކަށް ހަތަރު ގަޑިއިރު ބަލައިފާސްކުރުމުގައި ހޭދަކުރިއިރު، އެ އޮޕަރޭޝަންގައި ގިނަ އަދަދެއްގެ އިލެކްޓްރޯނިކް ސާމާނު ފުލުހުންގެ ބެލުމުގެ ދަށަށް ގެންދިޔަ އެވެ.
ނޫސްވެރިންނާ ބައްދަލުކުރައްވާ ރައީސް އޮފީހުގެ ތަރުޖަމާން މުހައްމަދު ހުސައިން ޝަރީފް (މުންދު) މިއަދު ވިދާޅުވީ އައިޝާ ޑޮކިއުމަންޓްރީގައި މުއިއްޒުއަށް އަމާޒުވެފައިވާ ތުހުމަަތުތަކުގެ ވާހަކަ ދައްކާ ހުރިހާ އެންމެންނަށް ދައުވާކުރަން އެމަނިކުފާނު އެދިވަޑައިގަތުމުގެ ކުރިން އަދަދު ނޫހުގެ މައްޗަށް ތަހުގީގު ހިންގަން އެދިފައިވަނީ ޕީޖީން ކަމަށެވެ.
