ފުލުހުން އަދަދު ނޫހުގެ އޮފީސް ރެއިޑްކޮށް ޗެނަލް 13 ގެ ބްރޯޑްކާސްޓަަށް ކޮންޓްރޯލް ކޮމިޝަނުން ހުރަސް އަޅާފައިވާ ދަނޑިވަޅެއްގައި މީޑިއާތައް ކުށްވެރިނުކޮށް އަމަލުތައް އިސްލާހުކުރަން ކުރީގެ ރައީސް އަބްދުالله ޔާމީން ރައީސް މުހައްމަދު މުއިއްޒުއަށް ގޮވާލައްވައިފި އެވެ.
ކޯޓު އަމުރެއްގެ ދަށުން ފުލުހުން 'އަދަދު' ނޫހުގެ އޮފީހަށް ރޭގެ ވަގުތެއްގައި ވަދެ ގިނަ އަދަދެއްގެ އިލެކްޓްރޯނިކް ސާމާނު ވަނީ ގެންގޮސްފަ އެވެ. އެއީ 'އައިޝާ' ގެ ނަމުގައި އަދަދު ނޫހުން ދެއްކި ޑޮކިއުމަންޓްރީއާ ގުޅިގެން ހެކި ހޯދުމަށް ކަމަށް ބުނެ ހިންގި އޮޕަރޭޝަނެކެވެ.
ޔާމީންގެ ޕީޕަލްސް ނެޝަނަލް ފްްރޮންޓް (ޕީއެންއެފް) އިން މިހާރު ކުރިއަށްގެންދާ ސިލްސިލާ މަގުމަތީ ހަރަކާތްތަކުގެ ލައިވް ކަވަރޭޖު ހުއްޓާލުމަށް މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން (ކޮންޓްރޯލް ކޮމިޝަން) އިން އެންގީ ވެސް ރޭގެ ވަގުތެއްގަ އެވެ.
"މީޑިއާ ކުށްވެރިނުކުރައްވާ، އަމަލުތައް އިސްލާހު ކުރައްވާ،" ޕީއެންއެފްގެ މީޑިއާ ގްރޫޕަށް ފޮނުވި ކުރު މެސެޖެއްގައި ޔާމީން ވިދާޅުވި އެވެ.
މީގެ ކުރިން އޮތް މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) އިން ތަހުގީގު ކުރި މައްސަލައަކާ ގުޅިގެން ސެޕްޓެމްބަރު 17، 2025 ގައި ވެސް ޗެނަލް 13 ގެ ބްރޯޑްކާސްޓް ދެ ގަޑިއިރަށް މެދުކަނޑާލި އެވެ. އަދި އޮގަސްޓު 2025، ގައި ކުރީގެ ރައީސް އަބްދުﷲ ޔާމީން ބައިވެރިވާ ޖަލްސާއެއް އެ ޗެނަލްއިން ދުރަށް ފޮނުވަން ތައްޔާރުވެފައި ވަނިކޮށް ބްރޯޑްކާސްޓް ހުއްޓާލަން ވެސް އެންގި އެވެ.
މިދިޔަ މާޗް މަހުގެ އަށާވީސް ވަނަ ދުވަހު އަދަދު ނޫހުގެ ސޯޝަލް މީޑިއާ މަންސަތަކުގައި އާންމުކުރި މި ޑޮކިއުމަންޓްރީގައި ރައީސުލްޖުމްހޫރިއްޔާގެ އޮފީހުގެ ކުރީގެ މުވައްޒަފަކު ވަނީ ރައީސް މުއިއްޒާއެކު ޒާތީ ގުޅުމެއް އޮތް ކަމަށް ބުނެ ބޮޑެތި ތުހުމަތުތަކެއް ކޮށްފަ އެވެ.
ޖިނާއި މައްސަލައެއްގެ ތަހުގީގަށް ހެކި ހޯދުމަށް ވުރެ އަދަދުގެ އޮފީހަށް ވަދެ ފުލުހުން ހަރަކާތްތެރިވީ ތަން ހުއްޓުވުމުގެ ބޭނުމުގައި ކަމަށް ވަކީލުން ވަނީ ވިދާޅުވެފަ އެވެ.
