'އައިޝާ' ގެ ނަމުގައި އަދަދު ނޫހުން ދެއްކި ޑޮކިއުމަންޓްރީއާ ގުޅިގެން 'އަދަދު' ހިންގާ އޮފީހަށް ވަދެ ގިނަ އަދަދެއްގެ އިލެކްޓްރޯނިކް ސާމާނު ގެންދިޔުމާ ގުޅިގެން ރައީސް މުހައްމަދު މުއިއްޒުއަށް ކުރިމަތިވަމުންދާ ފާޑުކިޔުންތަކާ ދެކޮޅަށް ބަސް ބުނުމަށް ރައްޔިތުންގެ މަޖިލީހުގެ މެންބަރުންނާއި ސަރުކާރުގެ ވެރިންނަށް މިއަދު އަންގައިފި އެވެ.
އަދަދު ނޫހަށް މައުލޫމާތު ލިބިފައިވާ ގޮތުގައި ޕީއެންސީ މަޖިލީހުގެ މެންބަރުން ތިއްބަވާ ގްރޫޕެއްގައި މުއިއްޒު ވަނީ އެމަނިކުފާނާއި އާއިލާއާ އިދިކޮޅު ފަރާތްތަކުން ފާޑުކިޔަމުން އަންނައިރު މެންބަރުން އެއްޗެއް ވިދާޅުނުވަނީ ކީއްވެގެންތޯ އައްސަވާފަ އެވެ.
އެ ސުވާލަށް ޖަވާބު ދެއްވަމުން ޕީއެންސީގެ ޕީޖީ ލީޑަރު އިބްރާހިމް ފަލާހު ވަނީ ޓީމެއްގެ ގޮތުގައި އެކަމާ ދެކޮޅަށް ނުކުންނަން ތައްޔާރުވަމުން އަންނަ ކަމަށް މުއިއްޒުގެ އަރިހުގައި ދަންނަވާފަ އެވެ.
އޭގެ އިތުރުން، ވަޒީރުންގެ މަޖިލީހާއި ރައްޔިތުންގެ ޓެކްސް ފައިސާއިން މުސާރަ ނަގާ ސަރުކާރުގެ އިސް ސިޔާސީ މަގާމުތަކުގައި ތިބި މީހުންނަށް ވެސް ވަނީ މުއިއްޒުގެ ދިފާއުގައި ނުކުތުމަށް އަންގާފަ އެވެ. އޭގެ ތެރޭގައި ސަރުކާރު ކުންފުނިތަކުގެ ވެރިން ވެސް ހިމެނެ އެވެ.
އެ އެންގުމާ އެއްގޮަތަށް ކިޔަމަންވެ، ސަރުކާރުން މުސާރަ ލިބޭ ގިނަ މީހުންތަކެއް އަންނަނީ މުއިއްޒުގެ ދިފާއުގައި ބަސް ބުނަމުންނެވެ.
ކޯޓު އަމުރެއްގެ ދަށުން ފުލުހުން 'އަދަދު' ނޫހުގެ އޮފީހަށް ވަދެފައިވަނީ އެ ޑޮކިއުމަންޓްރީގައި ހިމެނޭ ވާހަކަތަކާ ގުޅިގެން ރައީސުލްޖުމްހޫރިއްޔާ އެކަން ދޮގުކުރައްވައި، އެކަމުގައި ޝާމިލުވާ ފަރާތްތަކަށް ފިޔަވަޅު އެޅުމަށް ކަމާބެހޭ އިދާރާތަކުގައި އެދިވަޑައިގަންނަވާނެ ކަމަށް ވިދާޅުވެފައިވަނިކޮށެވެ.
މިދިޔަ މާޗް މަހުގެ އަށާވީސް ވަނަ ދުވަހު އަދަދު ނޫހުގެ ސޯޝަލް މީޑިއާ މަންސަތަކުގައި އާންމުކުރި މި ޑޮކިއުމަންޓްރީގައި ރައީސުލްޖުމްހޫރިއްޔާގެ އޮފީހުގެ ކުރީގެ މުވައްޒަފަކު ވަނީ ރައީސް މުއިއްޒާއެކު ޒާތީ ގުޅުމެއް އޮތް ކަމަށް ބުނެ ބޮޑެތި ތުހުމަތުތަކެއް ކޮށްފަ އެވެ.
ޖިނާއި މައްސަލައެއްގެ ތަހުގީގަށް ހެކި ހޯދުމަށް ވުރެ އަދަދުގެ އޮފީހަށް ވަދެ ފުލުހުން ހަރަކާތްތެރިވީ ތަން ހުއްޓުވުމުގެ ބޭނުމުގައި ކަމަށް ވަކީލުން ވަނީ ވިދާޅުވެފަ އެވެ.
