'އައިޝާ' ގެ ނަމުގައި އަދަދު ނޫހުން ދެއްކި ޑޮކިއުމަންޓްރީއާ ގުޅިގެން 'އަދަދު' ހިންގާ އޮފީހަށް ފުލުހުން ފޮނުވައި ނޫހުގެ މަސައްކަތްތަކަށް ބޭނުންކުރާ ގިނަ އަދަދެއްގެ ސާމާނު ގެންދިޔުމާ ގުޅިގެން އެ މައްސަލަ މަޖިލީހުން ތަހުގީގު ކުރުމަށް ގޮވާލައި ގަލޮޅު އުތުރު ދާއިރާގެ މެންބަރު މީކާއިލް ނަސީމް ހުށަހެޅި ކުއްލި މައްސަލަ ބޭރުކޮށްލައިފި އެވެ.
މަޖިލީހުގެ ރިޔާސަތުގައި އިންނެވި އަބްދުއްރަހީމް އަބްދުالله މި މައްސަލަ ބަލައިނުގަތީ އެ މައްސަލާގައި ރައްޔިތުންގެ މަޖިލީހުގެ ގަވާއިދުގައި ބުނާ ކުއްލި މައްސަލަތަކުގައި ހުންނަން ޖެހޭ ޝަރުތު ހަމަނުވާ ކަމަށް ކަނޑައެޅުމަށް ފަހު އެވެ.
މިދިޔަ މާޗް މަހުގެ އަށާވީސް ވަނަ ދުވަހު އަދަދު ނޫހުގެ ސޯޝަލް މީޑިއާ މަންސަތަކުގައި އާންމުކުރި މި ޑޮކިއުމަންޓްރީގައި ރައީސުލްޖުމްހޫރިއްޔާގެ އޮފީހުގެ ކުރީގެ މުވައްޒަފަކު ވަނީ މުއިއްޒާއެކު ޒާތީ ގުޅުމެއް އޮތް ކަމަށް ބުނެ ބޮޑެތި ތުހުމަތުތަކެއް ކޮށްފަ އެވެ.
މި މައްސަލައާ ގުޅިގެން އިއްޔެ ހެނދުނު ބޭއްވި ނޫސްވެރިންގެ ބައްދަލުވުމެއްގައި މުއިއްޒު ވަނީ އެ ޑޮކިއުމަންޓްރީގައި ހިމެނޭ ހުރިހާ ވާހަކަތަކެއް ކަނޑައެޅިގެން ދޮގުކުރައްވާފަ އެވެ. ރައީސް ވިދާޅުވީ މި މަސައްކަތުގައި ބައިވެރިވި އެންމެހައި ފަރާތްތަކާ މެދު ގާނޫނީ ގޮތުން އެޅެން އޮތް އެންމެ ފިޔަވަޅު އެޅުމަށް ކަމާބެހޭ ފަރާތްތަކުގައި އެދިވަޑައިގަންނަވާނެ ކަމަށެވެ.
އޭގެ ގަޑިއިރުތަކެއް ފަހުން ފުލުހުން ވަނީ ކޯޓު އަމުރެއް ހިފައިގެން އައިސް ހަތަރު ގަޑިއިރު ވަންދެން އަދަދުގެ އޮފީސް ބަލައިފާސްކޮށް ނޫސް ހިންގަން ބޭނުންކުރާ ގިނަ އަދަދެއްގެ އިލެކްޓްރޯނިކް ސާމާނު ގެންގޮސްފަ އެވެ.
އޭގެ އިތުރުން، އަދަދުގެ ސީއީއޯ ހުސައިން ފިޔާޒު މޫސާ އާއި މެނޭޖިން އެޑިޓަރު ހަސަން މުހައްމަދުގެ ރާއްޖޭން ފުރައިގެން ދިޔުމަށް "އިންޓެލިޖެންސް" ލިބިފައިވާ ކަމަށް ބުނެ ވަނީ ޕާސްޕޯޓު ހިފަހައްޓާފަ އެވެ.
