އަދަދު ނޫހުން ގެނެސްދިން "އައިޝާ" ޑޮކިއުމެންޓްރީ މައްސަލައިގައި މި ނޫހުގެ އޮފީސް ބަލާފާސްކުރުމާ ގުޅިގެން، ނޫސްވެރިކަމުގެ މިނިވަންކަމުގެ ދިފާއުގައި ތެދުވެވަޑައިގަންނަވާނެ ކަމަށް ވިދާޅުވެ ކުރީގެ ރައީސް މުހައްމަދު ނަޝީދު ސަރުކާރަށް ބަހުގެ ހަމަލާތަކެއް އަމާޒުކުރައްވައިފި އެވެ.
އިދިކޮޅު އެމްޑީޕީގެ ޗެއާޕާސަން އިންތިހާބުގެ ކެމްޕެއިނުގެ ތެރެއިން ގަލޮޅު ކަންމަތީގައި ބޭއްވެވި ބައްދަލުވުމެއްގައި ނަޝީދު މިހެން ވިދާޅުވިއިރު، ފުލުހުން ދިޔައީ އަދަދު ނޫހުގެ އޮފީސް ބަލާފާސްކުރަމުންނެވެ.
"އަޅުގަނޑުމެންނާ ދިމާކުރަން ނަހައްދަވާތި، ވަޑައިގެން ތިޔަ ކަންތައްތައް ކުރައްވަން ނަހައްދަވާތި، ނޫސްވެރިކަމުގެ މިނިވަންކަން ނަގާލައްވަން ނުހައްދަވާތި،" އެމަނިކުފާނު ވިދާޅުވި އެވެ.
ކެމްޕެއިން އިވެންޓުގެ ފަހުން ނަޝީދުގެ އެކްސް އެކައުންޓުން ހިއްސާކުރެއްވި ޕޯސްޓެއްގައި ވަނީ ނޫސްވެރިކަމުގެ މިނިވަންކަމަކީ އެއް ބަޔަކަށް އަނިޔާ ލިބިގެން ވަރަށް އުނދަގުލުން ދިވެހިން ހޯދި ހައްގެއް ކަން ހަނދުމަކޮށްދެއްވާފަ އެވެ. އަދި، އަދަދު އޮފީސް ބަލާފާސްކޮށް، މިނިވަން ނޫސްވެރިކަމަށް ހުރަސް އެޅުން ބަލައިނުގަނެވޭނެ ކަމަށް އެމަނިކުފާނު ވިދާޅުވި އެވެ.
އަދަދުގެ އޮފީސް ބަލާފާސްކުރަން ކްރިމިނަލް ކޯޓުން އަމުރެއް ނެރުނީ އެ ޑޮކިއުމެންޓްރީގައި ރައީސް މުހައްމަދު މުއިއްޒުއަށް ކުރި ތުހުމަތުތަކާ ގުޅިގެން މިއަދު ރައީސް އޮފީހުގައި އޮތް ބައްދަލުވުމުގައި ސުވާލުކުރި ފަހުންނެވެ.
މި މައްސަލައިގައި އަދަދުގެ އޮފީސް ބަލާފާސްކުރުމުގެ އިތުރުން، މި ނޫހުގެ ސީއީއޯ ހުސެއިން ފިޔާޒު މޫސާގެ ޕާސްޕޯޓު ތިން މަސް ދުވަހުގެ މުއްދަތަކަށް ހިފަހައްޓަން ވެސް ކްރިމިނަލް ކޯޓުން ވަނީ އަމުރުކޮށްފަ އެވެ.
