އަދަދު ނޫހުން ގެނެސްދިން "އައިޝާ" ޑޮކިއުމެންޓްރީއާ ގުޅިގެން ފުލުހުން ބަލަމުންދާ މައްސަލައިގައި، މި ނޫހުގެ ސީއީއޯ ހުސެއިން ފިޔާޒު މޫސާ ރާއްޖޭން ފުރުން މަނާކޮށްފި އެވެ.
ކްރިމިނަލް ކޯޓުން ނެރުނު އަމުރުގައި ވަނީ ފިޔާޒު ފުރުން މަނާކުރަނީ އޭނާ ފުރައިގެން ދާން އުޅޭ ކަމަށް ފުލުހުންގެ އިންޓެލިޖެންސަކަށް ލިބުނު މައުލޫމާތަކާ ގުޅިގެން ކަމަށެވެ. މައްސަލައިގައި ލިބިފައިވާ ހަމައެކަނި ހެއްކަކީ ވެސް މި ބުނާ އިންޓެލިޖެންސް ރިޕޯޓެވެ.
ފިޔާޒު ފުރުން މަނާކޮށްފައި ވަނީ މިއަދުން ފެށިގެން ޖުލައި 26، ގެ ނިޔަލަށެވެ. އެއީ ތިން މަހުގެ މުއްދަތެކެވެ.
ފިޔާޒު ފުރުން މަނާކުރަން އަމުރު ނެރުނީ އަދަދުގެ އޮފީސް ބަލާފާސްކުރަމުން ދަނިކޮށެވެ. އަދަދުގެ އޮފީސް ފުލުހުން ރެއިޑުކުރީ އައިޝާ ޑޮކިއުމެންޓާ ގުޅޭ ހެކި ހޯދަން ކަމަށް ބުނެ އެވެ.
ކޯޓުން ނެރުނު އަމުރުގެ ދަށުން ފުލުހުން ވަނީ އަދަދުގައި ހުރި ހުރިހާ އިލެކްޓްރޯނިކްސްތަކެއް ގެންދަން ނިންމާފަ އެވެ. ނަމަވެސް މިއީ ކޯޓު އަމަރުގެ ބޭރުން، ގާނޫނާ ހިލާފަށް ގެންދިޔަ ތަކެތި ކަމަށް މި ނޫހުގެ ލޯޔަރުން ވަނީ ރެއިޑްކުރަމުން ދިޔަ ފުލުހުންނަށް ވެސް އަންގާފަ އެވެ.
"އައިޝާ" ޑޮކިއުމެންޓްރީ ނެރުންތާ މަސް ދުވަސް ވާން ގާތްވެފައި ވަނިކޮށް ކުއްލިއަކަށް އަދަދު ނޫހަށް ޖިނާއީ ތުހުމަތެއްކޮށް، މައްސަލަ ބޮޑުވީ ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި އެ ޑޮކިއުމެންޓްރީގައި ރައީސް މުހައްމަދު މުއިއްޒުއަށް ކުރި ތުހުމަތުތަކާ ގުޅިގެން ސުވާލުކުރުމުންނެވެ.
މުއިއްޒު ދިން ޖަވާބުގައި އެ ޑޮކިއުމެންޓްރީގައި ހުރި ވާހަކަތަކަކީ ކަނޑައެޅިގެން ދޮގެއް ކަމަށް ވިދާޅުވެ، އެ މައްސަލައިގައި ދައުވާކުރަން ގޮވާލައްވާފައިވެ އެވެ.
