ނަފުސާނީ ބައްޔެއް ތަހައްމަލް ކުރަމުން އައި އުމުރުން 18 އަހަރުގެ ޒުވާނަކު ދަނާލުގައި ނިޔާވި ހާދިސާގައި އޭނާގެ ޒާތީ މައުލޫމާތު ސަރުކާރުން ހާމަކުރީ އާންމުންގެ ފަރާތުން ކުރިމަތިވި ޕްރެޝަރުތަކުގެ ސަބަބުން މަޖުބޫރުވެގެން ކަމަށް ރައީސް މުހައްމަދު މުއިއްޒު މިއަދު ވިދާޅުވެއްޖެ އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން މުއިއްޒު ވިދާޅުވީ މޯލްޑިވްސް ނެޝަނަލް ޔުނިވާސިޓީގެ އެކޮމޮޑޭޝަން ބްލޮކު ދަނާލުގައި ނިޔާވި ކުއްޖާގެ ޒާތީ މައުލޫމާތު އާންމު ކުރުން ރަނގަޅު ނޫން ކަމަށް އެމަނިކުފާނު ވެސް ގަބޫލު ކުރައްވާ ކަމަށެވެ.
ނަމަވެސް އެ މައްސަލައިގައި ހިމެނޭ ކުއްޖާގެ ޒާތީ މައުލޫމާތު ހާމަ ކުރަން މަޖުބޫރުވީ، އެ މައްސަލައިގައި ދަރިވަރާ ޑީލް ކުރި ފުލުސް އޮފިސަރުންނަށް ތުހުމަތުތަކެއް އަމާޒުވުމުން ކަމަށެވެ.
"ދެންމެ ތި ފާހަގަ ކުރި ދެ ކޭސް ކަމަށް ވަންޏާ، މަޖުބޫރީ ހާލަތަކަށް ދިޔައީ ކޮންމެވެސް ވަރެއްގެ މައުލޫމާތު ކޮޅެއް ދޭން. އެކަމަކު އެއީކީ ވެސް ރަނގަޅު ކަމެއް ނޫން. އެ ވެސް ނުދީ ވާނެ ގޮތް ވާންޖެހޭނެ،" މުއިއްޒު ވިދާޅުވި އެވެ.
އެމަނިކުފާނު ވިދާޅުވީ، ނިޔާވި ކުއްޖާގެ ޒާތީ މައުލޫމާތު އާންމު ކުރަންޖެހުނީ އާންމުން ކުރަމުންދިޔަ ޕްރެޝަރުތަކުގެ ސަބަބުން ކަމަށެވެ.
"އެ މަސައްކަތް ކުރަން ހުންނަ ކުއްޖާ، އާދައިގެ ވަޒީފާގައި ހުންނަ ކުއްޖާ، އޭނާ ގޯހެއް ނުހަދާ ކަމަށް ވަންޏާ އޭނަ ވަރަށް ބޮޑު ޕްރެޝަރަކަށް އެބަ ދޭ. ދެން އޭނަގެ އާއިލާ އޭގެ ސަބަބުން ނުރައްކަލަކަށް ވެސް އެބަ ދޭ."
މުޖްތަމައުން އެއްވެސް ޕްރެޝަރެއް ކުރިމަތިނުވި ނަމަ ނިޔާވި ކުއްޖާގެ ޒާތީ މައުލޫމާތު އާންމުކުރަން ނުޖެހުނީސް ކަމަށް ވެސް މުއިއްޒު ވިދާޅުވި އެވެ.
"އަޅުގަނޑު ގަބޫލު ކުރާ ގޮތުގައި ހަމަ މުޖްތަމައު އެއް ވިސްނުމެއްގައި، އެއް ރޫހެއްގައި ހިނގަންޏާ ޕާސަނަލް އިންފޮމޭޝަން އެއްވެސް ވަރަކަށް ޝެއާ ކުރަން އެ ވާ މަޖުބޫރުވުން ވެސް މަޖުބޫރެއް ނުވާނެ،" ރައީސް ވިދާޅުވި އެވެ.
ދަނާލުގައި ނިޔާވި ކުއްޖާގެ ޒާތީ މައުލޫމާތު އާންމު ކުރީ ހޯމް މިނިސްޓަރު އަލީ އިހުސާން ބުރާސްފަތި ދުވަހު ބޭއްވެވި ނޫސްވެރިންގެ ބައްދަލުވުމެއްގެ ތެރެއިންނެވެ. ނިޔާވި ކުއްޖާ ފުލުހުންގެ ސޯޝަލް ސަޕޯޓް ސާވިސްއަށް ކޮށްފައިވާ ހުރިހާ މެސެޖުތަކެއް އިހުސާން ވަނީ ލީކުކޮށްލައިފަ އެވެ.
