އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން މިހާރު ކުރިއަށްގެންދާ ސިލްސިލާ އިހުތިޖާޖުގެ ތެރެއިން މިރޭގެ އިހުތިޖާޖުގައި ކުރީގެ ރައީސް މުހައްމަދު ނަޝީދު ބައިވެރިވެވަޑައިގަންނަވާނެކަން އެމަނިކުފާނު ހާމަކުރައްވައިފި އެވެ.
ސަރުކާރަށް 12 ޑިމާންޑެއްކޮށް އެމްޑީޕީން އިހުތިޖާޖު ފެށިތާ ދުވަސްކޮޅެއް ވެއްޖެ އެވެ. އެ މުޒާހަރާތަކަށް ފުލުހުން ފުރުސަތު ނުދެ އެވެ.
އެމްޑީޕީގެ މެންބަރުން ތިބޭ ގްރޫޕަކަށް ފޮނުވި މެސެޖެއްގައި ނަޝީދު ވަނީ މިރޭގެ އިހުތިޖާޖުގައި އެމަނިކުފާނު ވެސް ބައިވެރިވެވަޑައިގަންނަވާނެ ކަމަށް ވިދާޅުވެފަ އެވެ.
މިއީ އަލުން އެމްޑީޕީއާ ގުޅި ވަޑައިގަތުުމަށް ފަހު އެ ޕާޓީން ބާއްވާ އިހުތިޖާޖަކުން ނަޝީދު ފެނިވަޑައިގަންނަވާނެ ފުރަތަމަ ފަހަރެވެ. ކައުންސިލް އިންތިހާބުގެ ކެމްޕޭން ނިންމާލުމަށް ބޭއްވި ރެލީގައި ވެސް ނަޝީދު ބައިވެރިވެވަޑައިގަތެވެ.
އެމްޑީޕީގެ ޗެއާޕާސަން ހޮވުމަށް ބާއްވާ އިންތިހާބުގައި ވާދަކުރައްވާނެކަން ނަޝީދު ވަނީ އިއުލާން ކުރައްވާފަ އެވެ. އެމަނިކުފާނު ވާދަކުރައްވަނީ ގަލޮޅު ދެކުނު ދާއިރާގެ މެންބަރު މީކާއިލް ނަސީމް އާއި އެ ޕާޓީގެ ނައިބު ރައީސްކަން ކުރެއްވި އަލްހާން ފަހުމީއާ އެވެ.
އެ ޕާޓީން މަގުތަކުގައި އިހުތިޖާޖު ކުރަމުން އަންނަނީ ނިމިދިޔަ ކައުންސިލް އިންތިހާބާއި ފެންނަ ނުފެންނަ ވޯޓުގައި ސަރުކާރަށް އިތުބާރު ގެއްލި، ރައްޔިތުންގެ ތާއީދު ނެތްކަން ހާމަވެފައިވާ ކަމަށް ބުނެ އެވެ. އެ ދުވަހު ނެގި ތިން ވޯޓުގެ ތެރެއިން ދެ ވޯޓުން ސަރުކާރު ވީ ބައްޔެވެ.
އެމްޑީޕީން ސަރުކާރަށް މި 12 ޑިމާންޑުކޮށްފައިވާއިރު، ހުރިހާ ސިޔާސީ ޕާޓީތަކެއް އެކުލެވޭ އިންތިގާލީ ސަރުކާރެއް އެކުލަވާލަން ނަޝީދު އޮތީ ގޮވާލައްވާފަ އެވެ. ނަމަވެސް، މަޝްވަރާ ކުރަން ޖެހޭ ސަބަބެއް ނެތް ކަމަށް ރައީސް މުހައްމަދު މުއިއްޒު ވަނީ ވިދާޅުވެފަ އެވެ.
