ސަރުކާރުގެ ތަރުޖަމާނުގެ މަގާމަށް މުހައްމަދު ހުސައިން ޝަރީފް (މުންދު) ދާދި ދެންމެއަކު އައްޔަނުކޮށްފި އެވެ.
އޭނާ އެ މަގާމަށް އައްޔަނުކުރީ މިނިސްޓަރު ފެންވަރުގަ އެވެ. ސަރުކާރުގެ ތަރުޖަމާނުގެ މަގާމަށް މުންދު ހަމަޖައްސާފައި މިވަނީ އެ މަގާމުގައި ހުންނެވި ހީނާ ވަލީދު އިއްޔެ އެ މަގާމުން އިސްތިއުފާދެއްވުމުންނެވެ. ތަރުޖަމާނުގެ މަގާމުން ހީނާ އިސްތިއުފާ ދެއްވީ އާޓްސް އެންޑް ކަލްޗާ މިނިސްޓަރުކަމާ ހަވާލުވެވަޑައިގަތުމަށެވެ.
މުންދު އެންމެފަހުން ހުންނެވީ ޔޫއޭއީއަށް ދިވެހިރާއްޖެއިން ކަނޑައަޅުއްވާފައި ހުންނަވާ ސަފީރުގެ މަގާމުގަ އެވެ. ނަމަވެސް، އެ މަގާމުން އޭނާ ވަކިކުރީ ސަރުކާރު ހިންގާ ޕީއެންސީއަށް ވޯޓު ނުދިނުމަށް ގޮވާލައި، ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އަސްމާ ރަޝީދު ވާހަކަދައްކަވާ އޯޑިއޯއެއް ލީކުވުމުންނެވެ، މުންދުއަކީ އަސްމާގެ ދަރިކަލުންނެވެ.
އަސްމާގެ އޯޑިއޯ މައްސަލައާ ގުޅިގެން މުންދު އާއި ސަލްމާ މަގާމުން ވަކިކޮށްފި
މަޖިލިސް މެންބަރު އަސްމާ ރަޝީދު ސަރުކާރާ ދެކޮޅަށް ވާހަކަދައްކަވާ އޯޑިއޯއެއް ލީކުވުމާ ގުޅިގެން، އޭނާގެ ދަރިކަލުން މުހައްމަދު ހުސައިން ޝަރީފާއި ކޮއްކޮ ޑރ. ސަލްމާ ރަޝީދު ސަފީރުކަމުގެ މަގާމުން ވަކިކޮށްފިއެވެ. މި ފިޔަވަޅު އަޅާފައިވަނީ ލޯކަލް ކައުންސިލް އިންތިހާބުގައި ސަރުކާރު ހިންގާ ޕީއެންސީއަށް ނާކާމިޔާބީއާ ކުރިމަތިވެފައިވާ ދަނޑިވަޅެއްގައެވެ. މީގެ އިތުރުން، ސަރުކާރުގެ ސިޔާސަތުތަކާ ދެކޮޅަށް މަސައްކަތްކުރާ އެހެން ބޭފުޅުންނާ މެދުވެސް ފިޔަވަޅު އަޅާނެ ކަމަށް ބެލެވެއެވެ.
މުންދުއަކީ މީގެ ކުރިން، ރައީސް މައުމޫންގެ ވެރިކަމުގައި 2005 އިން 2007 އަކަށް ސަރުކާރުގެ ތަރުޖަމާނުކަން ކުރައްވައިފަ އެވެ. އަދި، އޭގެ ފަހުން 2007 އިން 2008 އަކަށް އޭނާ ވަނީ ރައީސް އޮފީހުގެ ތަރުޖަމާނުކަން ވެސް ކުރައްވައިފަ އެވެ.
އެއަށްފަހު، ރައީސް މުހައްމަދު ވަހީދުގެ ވެރިކަމުގައި ޔޫތު އެންޑް ސްޕޯޓްސް މިނިސްޓަރުކަން މުންދު ކުރެއްވި އެވެ. ޔާމީންގެ ވެރިކަމުގައި، ރައީސް އޮފީހުގެ މިނިސްޓަރުކަން ކުރައްވައި ޖަޕާނާއި ސްރީލަންކާގެ ސަފީރުކަމުގެ މަގާމު ވެސް ފުރުއްވި އެވެ.
މުންދު ވަނީ މި ސަރުކާރުގެ ފޮރިން މިނިސްޓްރީގެ އެމްބަސެޑަރު އެޓް ލާޖުގެ މަގާމު ފުރުއްވައިފަ އެވެ.
އަސްމާގެ އޯޑިއޯއެއް ލީކުވުމާ ގުޅިގެން، މުންދުގެ އިތުރުން ޖެނީވާގައި ހުންނަވާ ދާއިމީ މަންދޫބު ޑރ. ސަލްމާ ރަޝީދު ވެސް މަގާމުން ވަކިކުރި އެވެ. ނަމަވެސް، އޭނާގެ މަގާމު މިހާރު ވަނީ އިއާދަކޮށްފަ އެވެ.
އަސްމާގެ ލީކުވި އޯޑިއޯގައި އަސްމާ ރަޝީދު ވަނީ ސަރުކާރާއި ޕީއެންސީއަށް ވަރަށް ބޮޑަށް ފާޑުވިދާޅުވެފައެވެ. އެގޮތުން، ނިމިދިޔަ ލޯކަލް ކައުންސިލް އިންތިހާބާއި ރެފެރެންޑަމްގައި ޕީއެންސީގެ ކެންޑިޑޭޓުންނަށް ވޯޓު ނުދިނުމަށް އޭނާ ވަނީ ބާރުއަޅުއްވާފައެވެ.
