ރާއްޖޭގެ އުތުރުން އޮންނަ ކުޅުދުއްފުށި ސިޓީން ގެއްލިގެން ހޯދަމުންދިޔަ އުމުރުން ދުވަސްވީ ދިވެހި ފިރިހެނަކު މޫދު އަޑީގައި ނިޔާވެފައި އޮއްވާ މިއަދު ފެނިއްޖެ އެވެ.
މި ހާދިސާގައި ނިޔާވެފައިވަނީ އެ ރަށު ބަޑިފަސްގަޑުގެ، އުމުރުން 59 އަހަރުގެ ސުލައިމާން ހުސައިން އެވެ.
ފުލުހުންގެ އިދާރާއިން މައުލޫމާތު ދީފައިވާ ގޮތުގައި، އޭނާ ގެއްލިގެން ފުލުހުންނަށް ރިޕޯޓްކޮށްފައިވަނީ މިއަދު މެންދުރުފަހު 13:48 ހާއިރު އެވެ.
އޭނާ ހޯދުމުގެ މަސައްކަތް ކުރަމުން ދަނިކޮށް ފެނިފައިވަނީ މިއަދު ހަވީރު 15:00 ހާއިރު ކުޅުދުއްފުށީ ބޮޑަވަކިވާ ބީޗް ސަރަހައްދުގެ މޫދު އަޑިންނެވެ.
މި ހާދިސާ ހިނގަން މެދުވެރިވި ސަބަބެއް މިހާތަނަށް ސާފުވެފައެއް ނުވެ އެވެ. ސުލައިމާން ހުސައިން ނިޔާވި މައްސަލައާ ގުޅިގެން ބަލަންޖެހޭ ކަންކަން ބަލައި، މި މައްސަލަ އިތުރަށް ތަހުގީގު ކުރަމުންދާ ކަމަށް ފުލުހުން ވަނީ ބުނެފަ އެވެ.
