ސާޅީސް އަހަރަށް ފަހު އިސްރާއީލާއި ލުބުނާނުގެ އިސްވެރިން ސީދާ މަޝްވަރާގައި

އިސްރާއީލުން ލުބުނާނުގެ ހިޒްބުﷲ ޖަމާއަތާ ދެކޮޅަށް ވަރުގަދަ އަސްކަރީ ހަމަލާތަކެއް ދެމުންދާ ދަނޑިވަޅެއްގައި، 1983 ވަނަ އަހަރަށް ފަހު ފުރަތަމަ ފަހަރަށް އިސްރާއީލާއި ލުބުނާނުގެ އިސްވެރިން ސީދާ މަޝްވަރާތަކެއް ބާއްވައިފި އެވެ.

އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ އިންތިޒާމު ކުރެއްވި މި ބައްދަލުވުން އޮތީ އަންގާރަ ދުވަހު ވޮޝިންގްޓަން ޑީސީގަ އެވެ. މި ބައްދަލުވުމުގައި ދެ ގައުމުގެ މަންދޫބުން ވަނީ ދެ ގަޑިއިރަށް ވުރެ ގިނަ އިރުވަންދެން ވާހަކަދައްކަވާފަ އެވެ.

އިސްރާއީލުން ލުބުނާނަށް ދެމުންދާ ހަމަލާތަކުގެ ސަބަބުން، އެމެރިކާ އާއި އިސްރާއީލުން އީރާނާ ދެކޮޅަށް ކުރަމުންދިޔަ ހަނގުރާމަ ދެ ހަފުތާއަށް މެދުކަނޑާލުމަށް އޭޕްރިލް 8 ވަނަ ދުވަހު އެއްބަސްވި ސުލްހައިގެ އެއްބަސްވުމަށް ވަނީ ގޮންޖެހުންތަކެއް ކުރިމަތިވެފަ އެވެ.

އީރާނާއި މި ސުލްހައިގެ މެދުވެރިއެއްގެ ދައުރު އަދާކުރާ ޕާކިސްތާނުން ބުނަމުންދަނީ، އެންމެ ފުރަތަމަ އެއްބަސްވި ސުލްހައިގެ ތެރޭގައި ލުބުނާނު ވެސް ހިމެނޭ ކަމަށެވެ. ނަމަވެސް އެމެރިކާ އާއި އިސްރާއީލުން ބުނަނީ އެ އެއްބަސްވުމުގައި ލުބުނާނު ނުހިމެނޭ ކަމަށެވެ.

އަންގާރަ ދުވަހުގެ ބައްދަލުވުމަށް ދެ ގައުމުން ވެސް އައީ މުޅިން ތަފާތު އަމާޒުތަކާއެކު އެވެ. އެގޮތުން އިސްރާއީލުން ވަނީ ލުބުނާނާއެކު ސުލްހައިގެ ވާހަކަތައް ދެއްކުމަށް އިންކާރުކޮށް، ހިޒްބުﷲ ޖަމާއަތުގެ ހަތިޔާރު އަތުލުމަށް ލުބުނާނުގެ ސަރުކާރަށް ބާރުއަޅާފަ އެވެ.

އެއާ ހިލާފަށް ލުބުނާނުން ބޭނުންވީ އެ ގައުމުގައި ހިނގަމުންދާ ހަމަނުޖެހުންތައް ހުއްޓުމަކަށް ގެނައުމަށެވެ. މި ހަމަނުޖެހުންތަކުގައި މިހާތަނަށް ލުބުނާނުގެ 2،124 މީހުން މަރުވެ، 1.1 މިލިއަނަށް ވުރެ ގިނަ މީހުން ވަނީ ގެދޮރު ދޫކޮށް ދާންޖެހިފަ އެވެ.

މި ހިޔާލު ތަފާތުވުންތަކާއެކު ވެސް، ބައްދަލުވުމަށްފަހު ދެ ގައުމުން ވަނީ މަޝްވަރާތަކާ މެދު ހިތްހަމަޖެހުން ފާޅުކޮށްފަ އެވެ.

ލުބުނާނުން އެމެރިކާއަށް ކަނޑައަޅާފައި ހުންނަވާ ސަފީރު ނަދާ ހަމަދޭ މުއައްވަދު ވިދާޅުވީ، މި މަޝްވަރާތަކަކީ "ބިނާކުރުވަނިވި" ވާހަކަތަކެއް ކަމަށެވެ. ނަމަވެސް، ހަމަލާތައް ހުއްޓާލުމަށާއި، ގެދޮރު ދޫކޮށް ގޮސްފައިވާ މީހުންނަށް އެނބުރި އާދެވޭނެ މަގު ފަހިކޮށްދިނުމަށާއި، ލުބުނާނަށް ކުރިމަތިވެފައިވާ އިންސާނީ ކާރިސާއަށް ހައްލެއް ހޯދުމަށް އޭނާ ބައްދަލުވުމުގައި ގޮވާލެއްވި ކަމަށް ވިދާޅުވި އެވެ.

އިސްރާއީލުން އެމެރިކާއަށް ކަނޑައަޅާފައި ހުންނަވާ ސަފީރު ޔެހިއެލް ލައިޓާ މި ބައްދަލުވުން ސިފަކުރެއްވީ "ވަރަށް ފުރިހަމަ ހިޔާލު ބަދަލުކުރުމެއްގެ" ގޮތު ގައެވެ. އަދި ލުބުނާނުން ހިޒްބުﷲ ބޭރުކުރުމަށް ކުރާ މަސައްކަތް ފަދަ، ދެ ގައުމުން އެއްބަސްވާ ކަންކަމުގެ މައްޗަށް އޭނާ އަލިއަޅުއްވާލެއްވި އެވެ.

"ލުބުނާނުގެ ސަރުކާރުން ވަނީ ހިޒްބުﷲގެ ބާރުގެ ދަށުގައި ދެން ނޯންނާނެކަން ވަރަށް ސާފުކޮށް ބުނެފައި،" ލައިޓާ ވިދާޅުވި އެވެ. "އީރާނު މިހާރު ވަނީ ބަލިކަށިވެފައި. ހިޒްބުﷲ ވެސް ވަނީ ވަރަށް ބޮޑަށް ބަލިކަށިވެފައި. މިއީ ލިބުނު ރަނގަޅު ފުރުސަތެއް."

މި މަޝްވަރާތަކާ ގުޅޭ ގޮތުން މާކޯ ރޫބިއޯ ނޫސްވެރިންނަށް ވިދާޅުވީ، ކުރިއަށް އޮތީ ގޮންޖެހުންތައް ބޮޑު ދުވަސްތަކެއް ކަމަށާއި، މިކަމުގައި ކުރިއެރުމެއް ލިބުމަށް ވަގުތު ނަގާނެ ކަމަށެވެ.