ރައީސުލްޖުމްހޫރިއްޔާގެ މަގާމުން މުހައްމަދު މުއިއްޒު އިސްތިއުފާ ދެއްވައި އަވަސް އިންތިހާބެއް ބާއްވަން އެމްޑީޕީގެ ވަގުތީ ޗެއާޕާސަން އަބްދުލްޣަފޫރު މޫސާ ރޭ ގޮވާލައްވައިފި އެވެ.
އެމްޑީޕީން ބޭއްވި ނޫސްވެރިންގެ ބައްދަލުވުމުގައި ޣަފޫރު ވިދާޅުވީ ކެބިނެޓުގައި ތިއްބެވި މިނިސްޓަރުން މަގާމުން ވަކިކުރެއްވުމުގެ ބަދަލުގައި ރައީސުލްޖުމްހޫރިއްޔާގެ މަގާމުން މުއިއްޒު އިސްތިއުފާ ދެއްވުމަށްފަހު އަވަސް އިންތިހާބެއް ބާއްވަން ޖެހޭ ކަމަށެވެ.
"މިއަދު ރައީސް މުއިއްޒު މިނިސްޓަރުންނެއް ނޫން ވަޒީފާއިން ވަކިކުރަންޖެހެނީކީ. ރައީސް މުއިއްޒު މިއަދު އިސްތިއުފާ ދޭން ޖެހެނީ. އަޅުގަނޑު އެމްޑީޕީގެ ޗެއާޕާސަންގެ ހައިސިއްޔަތުން މި ގޮވާލަނީ ރައީސް މުއިއްޒު އިސްތިއުފާ ދީފައި އަވަސް އިންތިހާބެއް މި ގައުމުގައި ބޭއްވުމަށް،" ޣަފޫރު ވިދާޅުވި އެވެ.
ނިމިދިޔަ ކައުންސިލް އިންތިހާބާއި ފެންނަ ނުފެންނަ ވޯޓުގައި ސަރުކާރަށް އިތުބާރު ގެއްލި، ރައްޔިތުންގެ ތާއީދު ނެތްކަން ހާމަވެފައިވާ ކަމަށް ބުނެ އެމްޑީޕީން ވަނީ ސަރުކާރަށް 12 ޑިމާންޑެއް ކޮށްފަ އެވެ. އޭގެއިތުރުން އެ ޑިމާންޑުތައް ފުރިހަމަ ކުރަން ބާރުއަޅައި އެ ޕާޓީން ރޭ ވަނީ މަގުމަތީ ހަރަކާތްތައް ވެސް ފަށައިފަ އެވެ.
އެމްޑީޕީން ސަރުކާރަށް 12 ޑިމާންޑެއްކޮށް، އިހުތިޖާޖުކުރަން ނިންމައިފި
ސަރުކާރަށް ރައްޔިތުންގެ އިތުބާރު ގެއްލިފައިވާ ކަމަށް ބުނެ، އެމްޑީޕީން 12 ޑިމާންޑެއް ހުށަހަޅައި އިހުތިޖާޖުކުރުމަށް ވަނީ ނިންމާފައެވެ. މީގެ ތެރޭގައި ރައީސް އިސްތިއުފާ ދެއްވައި އަވަސް އިންތިހާބެއް ބޭއްވުމާއި، ސިޔާސީ ޕާޓީތައް އެކުލެވޭ އިންތިގާލީ ސަރުކާރެއް އުފެއްދުމަށް ގޮވާލުން ހިމެނެއެވެ.
އެމްޑީޕީން ރޭ ބޭއްވި މަގުމަތީ ހަރަކާތުގައި އެކި ސަރަހައްދުތަކަށް އެއްވެ މުއިއްޒުގެ އިސްތިއުފާއަށް ވަނީ ގޮވައިފަ އެވެ.
އެމްޑީޕީގެ ގައުމީ ހިންގާ ކޮމިޓީގެ އިއްތިފާގުން ސަރުކާރަށް ކުރި 12 ޑިމާންޑުގެ ތެރޭގައި ސިޔާސީ ޕާޓީތަކާއި މަދަނީ ޖަމިއްޔާތަކުގެ ބައިވެރިވުން ހިމެނޭހެން ހާއްސަ ކޮމިޓީއެއް އެކުލަވާލައި، އެ ކޮމިޓީގެ މަޝްވަރާގެ މަތިން މެނުވީ ގާނޫނުއަސާސީއަށް އެއްވެސް ބަދަލެއް ނުގެނެވޭނެ ގޮތަށް ނިޒާމު ތަރުތީބުކުރުން ހިމެނެ އެވެ.
ހުރިހާ ސިޔާސީ ޕާޓީތަކެއް އެކުލެވޭ އިންތިގާލީ ސަރުކާރެއް އެކުލަވާލަން ކުރީގެ ރައީސް މުހައްމަދު ނަޝީދު އިއްޔެ ގޮވާލެއްވިއިރު، ހުރިހާ ސިޔާސީ ޕާޓީތައް އެއްކޮށް މަޝްވަރާތަކެއް ފެށުމަށް އެމްޑީޕީގެ ޗެއާޕާސަން ފައްޔާޒް އިސްމާއިލް ވެސް ގޮވާލެއްވި އެވެ. އަދި އަވަސް އިންތިހާބެއް ބޭއްވުމަށް ކުރީގެ ނައިބުރައީސް ފައިސަލް ނަސީމްވެސް ވަނީ ގޮވާލައްވައިފަ އެވެ.
ނިމިދިޔަ ކައުންސިލް އިންތިހާބާއި ފެންނަ ނުފެންނަ ވޯޓުގައި ސަރުކާރު ބޮޑުތަނުން ބަލިވިފަހުން، ސަރުކާރުގެ ކުންފުނިތަކުގެ ވެރިންނާއި ބައެއް ވަޒީރުން ވަނީ މަގާމުން އިސްތިއުފާ ދެއްވާފަ އެވެ. އެކަމަކު ސަރުކާރުން މަގާމުތަކަށް ބަދަލު ގެނައި ނަމަވެސް، ސިޔާސަތުތަކަށް ބަދަލު ނުގެންނާތީ އެކަމަށް ގިނަ ބަޔަކު ދަނީ ފާޑުކިޔަމުންނެވެ.
