ރައީސް އޮފީހުގެ ކޮމިއުނިކޭޝަންސް މިނިސްޓަރު، އިބްރާހިމް ހަލީލް އެ މަގާމުން މިއަދު ވަކިކޮށްފި އެވެ.
އަދަދު އަށް އެނގިފައިވާ ގޮތުގައި މިއަދު އެންމެ ފުރަތަމަ މަގާމުން ވަކިކުރި ބޭފުޅަކީ ހަލީލް އެވެ. އެކަމާ ގުޅޭގޮތުން ޖަވާބެއް ހޯދުމަށް ހަލީލްއަށް ގުޅުމުން ފޯނަށް ޖަވާބެއް ނުދެއްވަ އެވެ.
ހަލީލްގެ އިތުރުން، ރައީސް އޮފީހުގެ މިނިސްޓަރު، އަލީ އާރިފް ވެސް އިއްޔެ ވަނީ އެ މަގާމުން އިސްތިއުފާ ދެއްވައިފަ އެވެ. އޭނާ އެ މަގާމުން އިސްތިއުފާދެއްވި ސަބަބެއް ހާމައެއް ނުކުރެ އެވެ.
ސަރުކާރުގެ ކެބިނެޓު މިނިސްޓަރުންގެ ތެރެއިން މިހައިތަނަށް އަށް ބޭފުޅަކު ވަނީ މަގާމުން އިސްތިއުފާދެއްވައިފަ އެވެ. އޭގެ ތެރޭގައި ޑިފެންސް މިނިސްޓަރު، ގައްސާން މައުމޫން އާއި ފޮރިން މިނިސްޓަރު، އަބްދުالله ހަލީލް އާއި ޔޫތު މިނިސްޓަރު، އިބްރާހިމް ވަހީދު އާއި ސިޓީސް މިނިސްޓަރު، އާދަމް ޝަރީފް އާއި ޓޫރިޒަމް މިނިސްޓަރު، ތޯރިގު އިބްރާހިމް އާއި ހެލްތު މިނިސްޓަރު، އަބްދުالله ހަލީލްގެ އިތުރުން އެގްރިކަލްޗާ މިނިސްޓަރު، މަރިޔަމް މާރިޔާ އަދި، ޖެންޑާ މިނިސްޓަރު، އައިޝަތު ޝިހާމް ހިމެނެ އެވެ.
މި ހުރިހާ ބޭފުޅުން މަގާމުން އިސްތިއުފާދެއްވީ ރައީސް އޮފީހުން އަންގައިގެން ކަމަށް މި ނޫހަށް މައުލޫމާތު ލިބިފައިވެ އެވެ.
މިނިސްޓަރުންތަކެއް މަގާމުން ވަކިކޮށްފައި މި ވަނީ އޭޕްރިލް 4، ގައި އޮތް ދެ އިންތިހާބާއި ރައްޔިތުންގެ ހިޔާލު ހޯދުމުގެ އާންމު ވޯޓުން ސަރުކާރަށް ލިބުނު ނާކާމިޔާބީއަށްފަހު އެވެ. އެ ބައްޔަށްފަހު، އޭޕްރިލް 5، ގައި މުލީއާގޭގައި ބޭއްވި ބައްދަލުވުމެއްގައި ރައީސުލްޖުމްހޫރިއްޔާ މުހައްމަދު މުއިއްޒު ވަނީ ނާކާމިޔާބީގެ ޒިންމާ ޕީއެންސީގެ މަޖިލިސް މެންބަރުންނާއި ވަޒީރުންގެ ބޮލުގައި އަޅުއްވައިފަ އެވެ.
އެ ބައްދަލުވުމުގެ ތެރެއިން ފިނޭންސް މިނިސްޓަރު މޫސާ ޒަމީރު ވަނީ، މި ނަތީޖާ ޕޮޒިޓިވްކޮށް ނަގައި، މިހާރު ހުރި މައްސަލަތައް އިސްލާހުކޮށްގެން ކުރިއަށް ދިއުމުގެ މުހިންމުކަމާ ބެހޭގޮތުން ވާހަކަ ދައްކަވައިފައެވެ. ނަމަވެސް، ރައީސް މުއިއްޒު ވަނީ ވަރަށް ބޮޑަށް ކޯފާވެ، "ތިމަންނައަށް އެހެން ގޮތަކަށް ވިސްނަދޭން މަސައްކަތް ނުކުރުމަށް" ވިދާޅުވެފަ އެވެ.
ރައްޔިތުންގެ މަޖިލީހުގައި ކުރާ މަސައްކަތްތަކުގެ ސަބަބުން ވެސް ސަރުކާރަށް "ޑެމޭޖު" ލިބޭ ކަމަށް ވިދާޅުވެ، އެމަނިކުފާނު ވަނީ އެ ބައްދަލުވުމުގައި ނުރުހުން ފާޅުކުރައްވައިފަ އެވެ.
އޭގެ އިތުރުން، މަޖިލިސް މެންބަރުންނާއި ވަޒީރުން އެދިގެން "ކޮށްނުދެއްވަނީ ކޮން ކަމެއްތޯ؟" ސުވާލު އުފައްދަވައި އެމަނިކުފާނު ވަނީ ދެން އެހެން އެކަން ނުވާނެކަމުގެ އިންޒާރު ދެއްވައި، ކެބިނެޓަށް ބަދަލު ގެންނަން ޖެހިއްޖެ ނަމަ، އެކަން ވެސް ކުރައްވާނެ ކަމަށް ވިދާޅުވެފަ އެވެ.
