ހުސްވެފައިވާ ހިތަދޫ އުތުރު ދާއިރާގެ ބައި-އިލެކްޝަންގައި ސަރުކާރު ހިންގާ ޕީޕަލްސް ނެޝަނަލް ކޮންގްރެސް(ޕީއެންސީ) ގެ ޓިކެޓުގައި ވާދަކުރުމަށް ޝައުގުވެރިވާ މީހުންނަށް އެކަމަށް އެދި ހުށަހެޅުމުގެ ފުރުސަތު ރޭ ހުޅުވާލައިފި އެވެ.
ޕީއެންސީން ބުނީ ޕްރައިމަރީގައި ވާދަކުރުމުގެ ފުރުސަތު ހުޅުވާލީ އެޕްރީލް 14، އިން ފެށިގެން އެޕްރީލް 19، ވާ އާދީއްތަ ދުވަހުގެ އިރުއޮއްސި 18:00 ޖެހުމާ ހަމައަށް ކަމަށެވެ.
ބައި-އިލެކްޝަނަށް ޕީއެންސީގެ ޓިކެޓުގައި ވާދަކުރަން އެޕްލިކޭޝަން ހުށަހެޅުމުގެ ފުރުސަތުގެ ސުންގަޑި ހަމަވާއިރު އެއް އެޕްލިކޭޝަނަށްވުރެ ގިނަ އެޕްލިކޭޝަން ލިބިފައިވާނަމަ ޕްރައިމަރީއެއް ބާއްވާނެ ކަމަށް އެ ޕާޓީން ބުންޏެވެ.
އެޕްލިކޭޝަން ހުށަހަޅާ މީހުންގެ ތެރެއިން ބައި-އިލެކްޝަންގައި ވާދަކުރުމުގެ ފުރުސަތު ލިބޭނީ ޝަރުތުތައް ފުރިހަމަވާ އަދި ޕާޓީގެ އިންތިހާބުތަކާއި ގުޅޭ ޓެކްނިކަލް ކޮމިޓީން ބަލާ މިންގަނޑުތަކަށް ފެތޭ މީހުންނަށް ކަމަށް ޕީއެންސީން ބުންޏެވެ.
ޕީއެންސީން ހިތަދޫ އުތުރު ދާއިރާގެ ބައި-އިލެކްޝަން ޕްރައިމަރީއެއް ބާއްވަން ޖެހޭ ހާލަތެއްގައި އެ ޕްރައިމަރީ ބޭއްވުމަށް ނިންމާފައިވަނީ އެޕްރީލް 25، ވާ ހޮނިހިރު ދުވަހު ހެނދުނު 09:00 އިން ހަވީރު 16:00 އަށެވެ.
އެ ޕްރައިމަރީގައި ވޯޓުދިނުމުގެ ހައްގު ލިބޭ މީހުންގެ ލިސްޓު އެޕްރީލް 20، ވާ ހޯމަ ދުވަހު ޕީއެންސީގެ ވެބްސައިޓުގައި ޝާއިއުކުރާނެ ކަމަށް އެ ޕާޓީން ބުންޏެވެ.
ހުސްވެފައިވާ ހިތަދޫ އުތުރު ދާއިރާގެ ގޮނޑިއަށް އިދިކޮޅު އެމްޑީޕީން މިހާތަނަށް ޝައުގުވެރިކަން ފާޅުކޮށްފައިވަނީ އައްޑޫ ސިޓީގެ ކުރީގެ މޭޔަރު އަބްދުﷲ ސޯދިގު (ސޯބެ) އެވެ. އޭނާއަށް ގިނަ ބައެއްގެ ތާއީދު އޮތްކަން ދަނީ ހާމަކުރަމުންނެވެ.
ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި-އިލެކްޝަން ކުރިއަށް އޮތް ޖޫން 6، ގައި ބާއްވަން އިލެކްޝަންސް ކޮމިޝަނުން އިއްޔެ ވަނީ ނިންމާފަ އެވެ.
ހިތަދޫ އުތުރު ދާއިރާގެ ގޮނޑި ހުސްވީ މެންބަރު މުހައްމަދު ސިނާނުގެ ކިބައިގައި މެންބަރުކަމުގެ ޝަރުތު ހަމަނުވާ ކަމަށް ސުޕްރީމް ކޯޓުން އިއްޔެ ނިންމުމުންނެވެ.
ރާއްޖޭގެ އެންމެ މަތީ ކޯޓުން އާދީއްތަ ދުވަހު ކަނޑައެޅީ ސާބިތު ދަރަންޏެއް އޮވެ، އެ ދަރަންޏާ އެއްގޮތަށް ފައިސާ ދައްކާފައިނުވާތީ ރައްޔިތުންގެ މަޖިލީހުގެ މެންބަރުކަމުން ސިނާނު ވަކިވެފައިވާ ކަމަށެވެ.
ހުކުމާ އެއްގޮތަށް ސިނާނު ނުދެއްކީ މޯލްޑިވްސް އިސްލާމިކް ބޭންކުން ނަގާފައި އޮތް ފަސް މިލިއަން ރުފިޔާގެ ލޯނެކެވެ. އެ ލޯނު އޭނާ އަދާ ކުރީ އެ މައްސަލަ ސުޕްރީމް ކޯޓަށް ވެއްދުމުނެވެ.
ގާނޫނުއަސާސީގައި ބުނެފައިވާ ގޮތުން ރައްޔިތުންގެ މަޖިލީހުގެ ގޮނޑިއެއް ހުސްވެއްޖެ ނަމަ، 60 ދުވަހުގެ ތެރޭގައި އެ ގޮނޑިއަށް އަލުން މީހަކު އިންތިހާބު ކުރަންޖެހެ އެވެ.
