މާލޭގެ މަޖީދީމަގުގައި ހުންނަ ނަލަހިޔާ ރެޒިޑެންސްގެ އެޕާޓްމަންޓަކުން ހަތަރު މިލިއަން ރުފިޔާ ވަގަށް ނެގި މައްސަލައިގައި ހިމެނޭ އިސްމާއިލް އާސިފް މިނިވަންކުރީ ކުރީގެ ރައީސުލްޖުމްހޫރިއްޔާ، އިބްރާހިމް މުހައްމަދު ސޯލިހުގެ ވެރިކަމުގައިކަން އެނގިއްޖެ އެވެ.
އެނގިފައިވާ ގޮތުގައި އާސިފް މިނިވަން ކުރީ އޭނާގެ ހުކުމުގެ މުއްދަތު އެންމެ ފަސް ދުވަހަށް ކުރުކޮށްގެންނެވެ. އޭނާ މިނިވަން ކުރީ ރިޔާސީ އިންތިހާބުގެ ދެ ވަނަ ބުރުގެ ކުރިންނެވެ.
ނަލަހިޔާ ރެޒިޑެންޓްސްގެ އެޕާޓުމެންޓަކުން ވަގަށްނެގި އެ ފައިސާގެ ތެރެއިން މިހައިތަނަށް ފުލުހުންނަށް ހޯދިފައި ވަނީ 50،000ރ. އެވެ. ބާކީ ހުރި ފައިސާ ހޯދުމުގެ މަސައްކަތް ކުރަމުންދާ ކަމަށް ފުލުހުން ބުންޏެވެ.
އެ މައްސަލައިގައި ފަސް މީހެއްގެ މައްޗަށް ތުހުމަތު ކުރެވޭއިރު، މިހައިތަނަށް ފުލުހުން ހައްޔަރު ކޮށްފައި ވަނީ ހަތަރު މީހެކެވެ. އަނެކަކު ހޯދުމުގެ މަސައްކަތް ފުލުހުން ދަނީ ކުރަމުންނެވެ.
ހައްޔަރު ކުރި މީހުންގެ ތެރޭގައި ހިމެނޭ، އިސްމާއިލް އާސިފްއަކީ ލަނޑާ ނަގާ ދޯންޏެއްގެ ތެރޭގައި 2019 ގައި ރ. މަޑުއްވަރީ، ފެހިއަލި، އިސްމާއިލް ހައްމާދުއާ ދެމެދު އުފެދުނު ދެބަސްވުމެއްގައި ހައްމާދަށް ވަޅިން ހަމަލާދީ މޫދަށް އެއްލައިލި މައްސަލާގައި 10 އަހަރަށް ޖަލަށް ލާން ސެޕްޓެމްބަރު 2022 ގައި ކްރިމިނަލް ކޯޓުން ހުކުމްކޮށްފައިވާ މީހެކެވެ.
ނޮވެމްބަރު 22، 2019، ގައި "ޖަރީ" ނަމަކަށް ކިޔާ ދޯނީގައި ހައްމާދުގެ ބޮލަށާއި ވައަތު ކޮލަށާއި ވާތު ކަންފަތަށާއި ވާތު އަތްތިލައާއި އެ އަތުގެ އިނގިލިތަކަށާއި ތުންފަތަށާއި ބުރަކައްޓަށް ވަޅި ހަރައި ޒަހަމްކޮށްލާފައިވެ އެވެ.
އެ މައްސަލާގައި އާސިފްގެ މައްޗަށް ދައުލަތުން އުފުލީ މީހަކަށް ނުރައްކާތެރި ހާނީއްކައެއްވާ ގޮތަށް ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގެ ދައުވާ އެވެ.
ދައުވާއަށް އޭނާ އިންކާރުކުރި ނަމަވެސް, ކުށް ސާބިތުކުރަން ދައުލަތުން ގިނަ ހެކިތަކެއް ހުށަހެޅި އެވެ. އޭގެ ތެރޭގައި މައްސަލައިގެ ތަހުގީގުގައި ބައިވެރިވި ފުލުހުންނާއި ގިނަ އަދަދެއްގެ ސިއްރު ހެކިން ވެސް ހިމެނެ އެވެ.
ހައްމާދު ބުނެފައިވަނީ އޭނައަށް ހަމަލާދިނީ އާސިފް ކަމަށާއި އޭނައަށް ހަމަލާ ދިނީ ދޯނީގެ ތެރޭގައި އުޅެނިކޮށް ދީނީ ގޮތުން ހިޔާލު ތަފާތުވެގެން އުފެދުނު ދެބަސްވުމެއްގެ ތެރެއިން ކަމަށެވެ. އެކަމަކު އާސިފް ބުނެފައިވަނީ އެ އަނިޔާތަކަކީ އާނުގަނޑެއް ފަދަ ތަނެއްގެ މައްޗަށް ހައްމާދު ވެއްޓުމުން ލިބިފައިވާ ޒަހަމްތަކެއް ކަމަށެވެ.
އެ މައްސަލައިގައި އޭނާ ބަންދުގައި ހުއްޓާ، މިނިވަން ކޮށްފައި ވަނީ ސޯލިހުގެ ވެރިކަމުގެ ފަހު ދުވަސްކޮޅު ސެޕްޓެމްބަރު 19. 2023، ގަ އެވެ.
މިނިވަންވުމަށްފަހު، މިދިޔަ އަހަރުގެ ކުރީކޮޅު އަމިއްލަ އެއްބަނޑު އެއްބަފާ ބޭބެއަށް ވަޅިން ހަމަލާދިން މައްސަލައެއްގައި އޭޕްރިލް 1، 2025، ގައި އާސިފް ހައްޔަރުކުރި އެވެ.
މަޑުއްވަރީން އަދަދު ނޫހާ ވާހަކަ ދެއްކި ބައެއް މީހުން ބުނީ ދެބޭންގެ ދެމެދުގައި ކުރި ޒުވާބެއްގައި ވަޅިއަކުން ހަމަލާ ދިނީ، އެރަށު ބީޗު ހައުސް، އިސްމާއީލް އާސިފު ކަމަށެވެ. އޭނާ ދިން ހަމަލާ ޒަހަމްވީ އެއްބަނޑު އެއްބަފާ ބޭބެ މުހައްމަދު މުއީން އަށެވެ.
މުއީންގެ ބޮލުގެ ދެ ތަނަށް ވަޅިން ހަމަލާދީފައިވެ އެވެ. އޭނާއަށް މަޑުއްވަރީ ހެލްތު ސެންޓަރާއި އުނގޫފާރު ހޮސްޕިޓަލުން ފަރުވާ ދީފައިވެ އެވެ. ނަމަވެސް، އެ މައްސަލައިގައި ހައްޔަރު ކުރުމަށްފަހު، އޭނާ މިނިވަންވީ ކިހިނެއްކަމެއް ނޭނގެ އެވެ.
