ދިވެހިރާއްޖެ އާއި ސްރީލަންކާއާ ދެމެދު އިއްޔެ ސޮއިކުރެވުނު އެއްބަސްވުންތަކުގެ ސަބަބުން ދެ ގައުމުގެ ގުޅުން އިތުރު ހަރުފަތަކަށް ގެންދިޔުމަށް މަގުފަހިވާނެ ކަމަށް ރައީސުލްޖުމްހޫރިއްޔާ މުހައްމަދު މުއިއްޒު ވިދާޅުވެއްޖެ އެވެ.
އަވައްޓެރި ސްރީލަންކާއަށް ކުރައްވަމުން ގެންދަވާ ރަސްމީ ދަތުރުގެ ތެރެއިން ސްރީލަންކާގެ ވެރިރަށް، ކޮލަމްބޯގައި ހުންނަ އެ ގައުމުގެ ޕްރެޒިޑެންޝަލް ސެކްރެޓޭރިއެޓުގައި އިއްޔެ ދެއްވި އެ ތަގުރީރުގައި އެމަނިކުފާނު ވިދާޅުވީ އެންމެ ބޮޑު އިސްކަމެއް ދެއްވާނީ ސޮއިކުރި އެމްއޯޔޫތަކުގައި އަމަލީ ސިފަ ޖެއްސުމަށް ކަމަށެވެ.
"ރައީސް ޑިސަނަޔަކެ އާއެކު މިއަދު ކުރެވުނު މަޝްވަރާތައް ވަރަށް ކާމިޔާބު، އަޅުގަނޑުމެންގެ އަމާޒު ވަރަށް ސާފު. މި އެއްބަސްވުންތަކުގައި ހުރި ކަންކަން ތަންފީޒުކޮށް އޭގެ އަމަލީ ފައިދާ ރައްޔިތުންނަށް ލިބޭނެކަން ކަށަވަރުކުރުން،" މުއިއްޒު ވިދާޅުވި އެވެ.
ސްރީލަންކާ އާއެކު ދިވެހިރާއްޖެއިން ވަނީ ޖުމުލަ ހަތް އެއްބަސްވުމެއްގައި ސޮއިކޮށްފަ އެވެ. އޭގެ ތެރޭގައި ޑިފެންސް ދާއިރާއިން ސޮއިކުރި ދެ އެއްބަސްވުމާއި ފަތުރުވެރިކަމާއި ތައުލީމީ ދާއިރާގެ އިތުުރުން ތާރީހީ ލިޔެކިޔުންތައް އަރުޝީފު ކުރުމާ ބެހޭ އެއްބަސްވުމަކާއި ކުޅިވަރުގެ ދާއިރާއިން ޒުވާނުން ތަމްރީނު ކުރުމުގެ އެއްބަސްވުމެއް ހިމެނެ އެވެ.
މުއިއްޒުގެ ތަގުރީރުގައި އެންމެ ބޮޑަށް އަލިއަޅުއްވާލެއްވީ އިންޑިއާ ކަނޑުގެ ސަލާމަތާއި ރައްކާތެރިކަމުގެ މައްޗަށެވެ. ޖަޒީރާ ދެ ގައުމުގެ ހައިސިއްޔަތުން ރާއްޖެއާއި ސްރީލަންކާގެ މުސްތަގުބަލު ގުޅިފައިވަނީ އިންޑިއާ ކަނޑާކަން ފާހަގަކުރައްވައި، ކަނޑުގެ ވަސީލަތްތައް ހިމާޔަތްކުރުމަށާއި ދެމެހެއްޓެނިވި ގޮތެއްގައި މަސްވެރިކަން މެނޭޖުކުރުމަށް ދެ ގައުމުން އެއްބަސްވެފައިވާކަން އެމަނިކުފާނު ހާމަކުރެއްވި އެވެ.
އޭގެ އިތުރުން ކަނޑުގެ ސަލާމަތީ ކަންކަމުގައި ދެ ގައުމުގެ މެދުގައި އޮންނަ އެއްބާރުލުން އިތުރަށް ވަރުގަދަކުރަން ނިންމާފައިވާ ކަމަށް ވެސް މުއިއްޒު ވިދާޅުވި އެވެ.
ރާއްޖެއާއި ސްރީލަންކާގެ ގުޅުން އިތުރަށް ބަދަހިކުރުމުގައި ރާއްޖެއިން އަބަދުވެސް ސާބިތުކަންމަތީ ދެމިއޮންނާނެކަން ފާހަގަކުރައްވަމުން ރައީސް ވިދާޅުވީ، ސަރަހައްދީ އެއްބާރުލުން އިތުރުކުރުމަށާއި، ސަރަހައްދުގެ ސުލްހަމަސަލަސްކަމާއި ހަމަޖެހުން ގާއިމުކުރުމަށް ކުރެވޭ މަސައްކަތްތަކުގައި ރާއްޖެއިން އިސްދައުރެއް އަދާކުރާނެ ކަމަށެވެ.
އަދި ދެ ގައުމުގެ ގުޅުމުގެ ސަބަބުން މުޅި ސަރަހައްދަށް ވެސް ތަނަވަސްކަމާއި ކުރިއެރުން ލިބިގެންދާނެ ކަމަށް އުންމީދު ކުރައްވާ ކަމަށް އެމަނިކުފާނު ވިދާޅުވި އެވެ.
ސްރީލަންކާއަށް މުއިއްޒު ކުރައްވަމުން ގެންދަވާ ދަތުރުގައި އެމަނިކުފާނުގެ އަނބިކަނބަލުން، ސާޖިދާ މުހައްމަދު އާއި ކެބިނެޓުގެ ބައެއް ވަޒީރުން ބައިވެރިވެވަޑައިގަންނަވަ އެވެ.
