ދާދި އިހަކަށް ދުވަހާ ޖެހެންދެން އެކްޓިން ޕޮލިސް ކޮމިޝަނަރުގެ ހައިސިއްޔަތުން ފުލުސް އޮފީސް ހިންގެވުމާ ހަވާލުވެ ހުންނެވި، ޑެޕިއުޓީ ކޮމިޝަނާ އޮފް ޕޮލިސް، ފަރުހާދު ފިކުރީ ރިޓަޔާ ކުރައްވަން ރައީސް މުހައްމަދު މުއިއްޒުގެ ފަރާތުން އަންގަވައިފި އެވެ.
އަދަދު އަށް މައުލޫމާތު ދިން މަސްދަރުތަކުން ބުނީ މަގާމުން ރިޓަޔާ ކުރައްވަން ރައީސްގެ ފަރާތުން ފަރުހާދަށް އެންގެވީ ރައީސް އޮފީހުގެ މިނިސްޓަރު، އަލީ އާރިފެވެ. ފަރުހާދަށް އަންގަވާފައި ވަނީ މި ހަފުތާގެ ތެރޭގައި އެ މަގާމުން ރިޓަޔާ ކުރަން ކަމަށް ވަނީ އެނގިފަ އެވެ.
ފަރުހާދަކީ މި ފަހުން ޕޮލިސް ކޮމިޝަނަރުގެ މަގާމަށް ކުރިމަތިލެއްވި ތިން ބޭފުޅުންގެ ތެރެއިން އެކަކެވެ. އެ މަގާމަށް އޭނާ ކުރިމަތިލުމުން، ޕޮލިސް ބޯޑުން އޭނާއާ އިންޓަވިއު ކުރުމަށްފަހު، ޕޮލިސް ކޮމިޝަނަރުގެ މަގާމަށް އޭނާގެ ޝަރުތު ހަމަވާ ކަމަށް އެ ބޯޑުން އޮތީ ނިންމައިފަ އެވެ. އެއަށްފަހު، އެ ބޯޑުން އެންމެ މަތިން މާކްސް ވެސް ދިނީ ފަރުހާދަށެވެ.
އެހެންނަމަވެސް، ޕޮލިސް ކޮމިޝަނަރުގެ މަގާމަށް މިދިޔަ އާދީއްތަ ދުވަހު އައްޔަނުކުރީ ފުލުހުންގެ ވަޒީފާއިން ވަކިކުރަން ޕޮލިސް ބޯޑުން ނިންމި އަހުމަދު މުހައްމަދު (ޓޫފޯ) އެވެ. އޭނާއަށް ފުލުހުންގެ ވަޒީފާ އަލުން ދިނީ މި ސަރުކާރުންނެވެ.
ފުލުހުންގެ ހިދުމަތުން ރިޓަޔާ ކުރައްވަން ފަރުހާދަށް އަންގާފައިވާއިރު، މީގެ ކުރިން ވެސް އެ ހިދުމަތުން ރިޓަޔާ ކުރައްވަން އޭނާއަށް ރައީސްގެ ފަރާތުން އެންގެވި އެވެ. އެހެންނަމަވެސް، އެ ފަހަރު އޭނާ ފުލުހުންގެ މަގާމުން އިސްތިއުފާ ނުދެއްވަ އެވެ.
މި ނޫހަށް ކަށަވަރުވެފައިވާ ގޮތުން މަގާމުން އިސްތިއުފާ ދެއްވައި، ފުލުހުންގެ ހިދުމަތުން ރިޓަޔާ ކުރައްވަން މުއިއްޒުގެ ފަރާތުން ފަރުހާދަށް އެ ފަހަރު އެންގެވީ ވެސް އަލީ އާރިފް އެވެ. މިކަން ތަފާތު ތިން މަސްދަރަކުން މި ނޫހަށް ކަށަވަރުކޮށްދިނެވެ.
ފަރުހާދުގެ މައްޗަށް ތުހުމަތު ކުރެވޭ ސީރިއަސް ޖިނާއީ މައްސަލަތަކެއް އެބަހުއްޓެވެ. އޭގެ ތެރޭގައި، ރޭޕް ކޭސްއެއްގައި ހިމެނޭ އޭނާގެ ދަރިފުޅު ސަލާމަތް ކުރަން ހެކި ނައްތާލިކަމުގެ ތުހުމަތު ހިމެނެ އެވެ. އަދި މިދިޔަ އަހަރު އޭނާގެ ދަރިފުޅު ހައްޔަރު ކުރުމުން އޭނާ ބަންދުން ދޫކޮށްލަން ނުފޫޒު ފޯރުވިކަމުގެ ތުހުމަތު ވެސް ފަރުހާދަށް ކުރެވެ އެވެ.
ފަރުހާދަކީ އޮކްޓޫބަރު 20، 2021 އިން ފެށިގެން ފުލުހުންގެ ވަޒީފާއިން ވަކި ކުރަން ނިންމައި، އޮކްޓޫބަރު 10، 2021 ގައި ނޯޓިސް ވެސް ފޮނުވި ބޭފުޅެކެވެ. އޭނާގެ އިތުރުން ހަ އޮފިސަރަކު ފުލުހުންގެ ހިދުމަތުން ވަކިކުރަން ޕޮލިސް ބޯޑުން އޭރު ނިންމީ ފުލުހުންގެ އާ ގާނޫނުގެ ދަށުން ޕޮލިސް ބޯޑަށް މަތިކޮށްފައިވާ ޒިންމާގެ ދަށުންނެވެ.
ފުލުހުންގެ ހިދުމަތުން ފަރުހާދު ވަކިކުރަން ޕޮލިސް ބޯޑުން އޭރު ނިންމީ ވެސް އޭނާގެ މައްޗަށް ކުރެވޭ، ސީރިއަސް މައްސަލައެއްގެ ހެކި ނައްތާލަން މަސައްކަތް ކުރި މައްސަލައަށް ރިއާޔަތްކުރުމަށްފަހު އެވެ. ފަރުހާދު ޑެޕިއުޓީ ކޮމިޝަނަރުގެ މަގާމަށް އައްޔަނުކުރީ މި ސަރުކާރުންނެވެ.
