އަތޮޅުތައް ތަރައްގީކުރެވޭނީ މާލެއިން އަމުރު ކުރުމުގެ ބަދަލުގައި ކައުންސިލްތައް ބާރުވެރިކޮށްގެން ކަމަށް އައްޑޫ ސިޓީގެ މޭޔަރުކަމަށް ދެވަނަ ދައުރަކަށް އިންތިހާބުވި އަލީ ނިޒާރު ރޭ ވިދާޅުވެއްޖެ އެވެ.
އެމްޑީޕީން އާޓިފިޝަލް ބީޗުގައި ބޭއްވި ޖަލްސާގައި ނިޒާރު ވިދާޅުވީ މާލެއިން އަމުރު ކުރާ ގޮތަށް ހިންގާ އަތޮޅުތަކަށް ކުރިއަށް އޮތް 100 އަހަރު ތެރޭގައިވެސް ތަރައްގީއެއް ނާންނާނެ ކަމަށާއި އޭގެ ބަދަލުގައި ކައުންސިލްތައް ބާރުވެރިކުރަން ޖެހޭ ކަމަށެވެ.
"އަތޮޅުތައް ހިންގުމަށް ލާމަރުކަޒުކޮށްގެން ކައުންސިލްތައް ހުރިހާ ގޮތަކަށް ބާރުވެރިކޮށްގެން ނޫން ގޮތަކަށް ރާއްޖޭގައި އަތޮޅުތައް ހިންގޭނެ، އަތޮޅުތަކަށް ތަރައްގީ ގެނެވޭނެ އެއްވެސް ގޮތެއް ނޯންނާނެ. މާލޭގައި ޖަމާކުރެވޭ ބާރުތަކާއި، މާލެއިން ދަންނަވާ ގޮތަށް ހިންގޭ އަތޮޅުތަކަށް ތަރައްގީއެއް ނާންނާނެ. އަދި 100 އަހަރުންވެސް އެކަންކަމެއް ނުވާނެ،" އޭނާ ވިދާޅުވި އެވެ.
އަތޮޅުތަކުގެ ރައްޔިތުން ތިބީ ވަރަށް ހާލުގައިކަން ފާހަގަކުރައްވާ ނިޒާރު ވިދާޅުވީ އަސާސީ ގިނަ ހިދުމަތްތަކެއް އަތޮޅުތަކުގައި ފުރިހަމަ ނުވާ ކަމަށެވެ. އޭނާ ވިދާޅުވީ ނިމިދިޔަ އިންތިހާބަށް ކުޑަތަންވެފައި ވަނިކޮށްވެސް ހަ ގަޑިއިރަށް އައްޑޫ ސިޓީން ކަރަންޓު ދިޔަ ކަމަށެވެ
"އަޅުގަނޑުމެން އަތޮޅުތަކުގެ ރައްޔިތުން ތިބީ ވަރަށް ހާލުގައި. އަސާސީ އެތައް ކަމެއް އަޅުގަނޑުމެންނަށް ފުރިހަމަ ނުވޭ. ފެނާއި ނަރުދަމާއެއް ނެތް. ރަނގަޅު މަގެއް ނެތް. އައްޑޫ ސިޓީގައި އިންތިހާބަށް 48 ގަޑިއިރުވީ އިރުވެސް އަޅުގަނޑުމެން ނުނިދާ ތިބެ އިންތިހާބުގެ ވޯޓުލާން ދާން ޖެހުނީ. ހަ ގަޑިއިރަށް އައްޑޫ ސިޓީގައި ކަރަންޓު ކެނޑިފައި އޮތް،" އޭނާ ވިދާޅުވި އެވެ.
ނިޒާރު ވިދާޅުވީ އައްޑޫ ސިޓީގައި ކަރަންޓުގެ ހާލަތު ރަނގަޅު ނުކުރެވިގެން އުޅޭތާ ހަތް އަހަރުވެފައިވާއިރު، ދައުލަތުގެ ބަޖެޓު އަހަރަކަށްވުރެ އަހަރެއް ބޮޑުވަމުން އަންނައިރު އައްޑޫ ސިޓީ ރައްޔިތުންގެ ހިއްސާ ނުލިބޭ ކަމަށެވެ.
"ކިތައް އަހަރުތޯ މި އާދޭސް ކުރާތާ. ކިތައް އަހަރުތޯ. ހަތް އަހަރު އައްޑޫ ސިޓީގައި ރަނގަޅަށް ކަރަންޓުގެ ހާލަތު ރަނގަޅު ނުކުރެވިގެން އުޅޭތާ. ދައުލަތުގެ ބަޖެޓު ކޮންމެ އަހަރަކު 40 އިން 56 ބިލިއަނަށް މި އަހަރު ފާސްކޮށްފައި އެ އޮތީ. ކޮބައިތޯ އައްޑޫ ސިޓީ ރައްޔިތުންގެ ހިއްސާ. މި ދައުލަތަށް މި ގައުމަށް ލިބޭ ފައިސާއަށް އަޅުގަނޑުމެން އާދޭސްކުރަން އެބަ ޖެހޭތޯ" ނިޒާރު ވިދާޅުވި އެވެ.
ރައްޔިތުން ހޮވާ ރައްޔިތުންގެ ބާރު ލިބޭ ކައުންސިލްތަކަށް ދައުލަތުގެ ބަޖެޓުން ފައިސާ ދީ، މާލީގޮތުން ބާރުވެރިކުރުވައިގެން ނޫން ގޮތަކަށް އަތޮޅުތައް ތަރައްގީ ނުކުރެވޭނެ ކަމަށާއި އެކަން ކުރެވޭނީ ހަމައެކަނި އެމްޑީޕީއަށް ކަމަށް ނިޒާރު ވިދާޅުވި އެވެ.
ނިޒާރު ވިދާޅުވީ 2028 ވަނަ އަހަރު އަނެއްކާވެސް އުފެދިގެން އަންނާނީ އެމްޑީޕީގެ ވެރިކަމެއްކަމާ މެދު ޝައްކު ނުކުރާ ކަމަށެވެ. ނަމަވެސް އޭނާ ވިދާޅުވީ އެ ނަތީޖާއަށް ވާސިލުވެވޭނީ އެމްޑީޕީގެ ލީޑާޝިޕް އެކަތިގަނޑެއް ގޮތަށް މަސައްކަތް ކޮށްގެން ކަމަށެވެ.
ނިމިދިޔަ ކައުންސިލް އިންތިހާބުގައި އައްޑޫ މޭޔަރުކަން ނިޒާރު ދިފާއުކުރެއްވީ 8.792 ވޯޓުންނެވެ. އޭނާއާ ވާދަކުރެއްވި ޕީއެންސީގެ ކެންޑިޑޭޓް މުޝްރިފް އަލީއަށް ލިބުނީ 4،259 ވޯޓެވެ.
