ދިވެހި ރައްޔިތުން އެދެނީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ފަހަތަށް ނުޖެހި އެކީގައި ކުރިއަށް ދިޔުމަށް ކަމަށް އެ ޕާޓީގެ ރައީސް އަބްދުﷲ ޝާހިދު މިރޭ ވިދާޅުވެއްޖެ އެވެ.
ކައުންސިލް އިންތިހާބާއި ފެންނަ ނުފެންނަ ވޯޓުގައި އެމްޑީޕީން ހޯދި ކާމިޔާބީ ފާހަގަކުރަން ބޭއްވި އުފާފާޅުކުރުމުގެ ޖަލްސާގައި ޝާހިދު ވިދާޅުވީ އެމްޑީޕީގެ ތިލަފަތް ރަމްޒުކޮށްދެނީ ހަމަހަމަކަމާއި އަދުލުއިންސާފުގެ އިތުރުން ލާމަރުކަޒީ ނިޒާމުން ދައުލުން ހިންގުން ކަމަށްވާއިރު، އެ އުންމީދުގައި ތިބި އެންމެން އެކީގައި ކުރިއަށްދާންޖެހޭ ކަމަށެވެ.
"ރާއްޖޭގެ ރައްޔިތުންގެ އުންމީދު ތިލަފަތަށް މާ ބޮޑު. ތިލަފަތް ރަމްޒުކޮށްދެނީ ހަމަހަމަކަން، އަދުލުއިންސާފު، ކުރިއަށްދިއުން، ތަރައްގީ، ލާމަރުކަޒީ ނިޒާމުން މި ދައުލަތް ހިންގުން. އެ އުންމީދުގައި އަޅުގަނޑުމެންނާއެކު ތިބި ހުރިހާ ރައްޔިތުންނާ އެކުގައި ކުރިއަށްދަމާތޯ. އަޅުގަނޑުމެންނަށް ފަހަތަށް ޖެހެވޭކަށް ނެތް. އަޅުގަނޑުމެން ދާން ރައްޔިތުން އެދެނީ ކުރިއަށް. ރައްޔިތުން އެދެނީ އަޅުގަނޑުމެން އެކުގައި ގޮސް މި ސަރުކާރު ބަލިކޮށްލަން،" ޝާހިދު ވިދާޅުވި އެވެ.
ޝާހިދު ވިދާޅުވީ އެމްޑީޕީގެ މަސައްކަތަކަށް މިއަދުވާންޖެހޭނީ އެކަތިގަނޑެއް ގޮތުގައި އެކުވެރިކަމާއެކު ފެށި މަސައްކަތް ގޮސް ނިންމާލުން ކަމަށާއި އެ މަސައްކަތަކަށްވާންޖެހޭނީ އެންމެން އެކީގައި ގޮސް މި ސަރުކާރު ބަދަލުކޮށް ގައުމު ހަމަ މަގަށް އެޅުވުމަށް ކަމަށެވެ.
"އަޅުގަނޑުމެންގެ މަސައްކަތަކަށް ވާންޖެހޭނީ މިއަދު މުޅި ރާއްޖެ ރަންރީނދޫ ވެގެންދާއިރު އެކަތިގަނޑެއް ގޮތުގައި އެކުވެރިކަމާއެކީގައި މިހާރު މިފެށި މަސައްކަތް ގެންގޮސް ނިންމާލުން. އަޅުގަނޑުމެންގެ މަސައްކަތަކަށް ވާންޖެހޭނީ މިއަދު މިއޮތް ސަރުކާރު ބަލިކޮށްލުން. ބަދަލުކޮށްލުން. ރާއްޖެ ހަމަ މަގަށް އެޅުވުން،" އޭނާ ވިދާޅުވި އެވެ.
އެމްޑީޕީގެ ތެރޭގައި އޮތް ހިޔާލު ތަފާތުވުންތައް އެއްކިބާކޮށް އެންމެން އެއް އަމާޒެއްގައި މި ސަރުކާރު ބަދަލުކޮށް ރާއްޖެއަށް ހެޔޮގޮތްހޯދައިދިނުމަށް އެންމެން އެކުވެރިކަމާއެކު ކުރިއަށްދާން ޖެހޭ ކަމަށް އޭނާ ވިދާޅުވި އެވެ.
"އަޅުގަނޑުމެންގެ ތެރޭގައި ހިޔާލުތަފާތުވުންތައް އެއްކިބާކޮށް އަޅުގަނޑުމެން މަސައްކަތް ކުރަންޖެހޭނީ މި ސަރުކާރު ބަދަލުކޮށްލާ، ރާއްޖެއަށް ހެޔޮގޮތް ހޯދުމަށް. އެކަމަށް ގުޅިވަޑައިގަންނަވާ. އެކަމަށް އެކުވެރިވެވަޑައިގަންނަވާ. އެކަމަށް އެކުގައި ކުރިއަށް ވަޑައިގަންނަވާ،" ޝާހިދު ވިދާޅުވި އެވެ.
މިހާތަނަށް އިލެކްޝަންސް ކޮމިޝަން (އީސީ) އިން އާންމުކޮށްފައިވާ ވަގުތީ ނަތީޖާއިން ދައްކާ ގޮތުގައި ސިޓީތަކުގެ މޭޔަރުން ހިމެނޭހެން އިންތިހާބުކުރާ 52 ގޮނޑީގެ ތެރެއިން އެމްޑީޕީން ވަނީ 46 ގޮނޑި ކާމިޔާބުކޮށްފަ އެވެ.
ބޮޑެތި އާބާދީތަކުން އެމްޑީޕީ ކުރި ހޯދިއިރު, ހުރިހާ ސިޓީއެއްގެ އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ ރައީސްކަން ވެސް ލިބުނީ އެ ޕާޓީއަށެވެ.
