މިއަދު ކުރިއަށްގެންދިޔަ އިންތިހާބުގައި ބާރުތައް މަސްހުނިކުރުމާއި، ސަރުކާރުގެ އަނިޔާވެރިކަމާ ދެކޮޅަށް ދިވެހި ރައްޔިތުން ސާފު މެސެޖެއް ދީފައިވާ ކަމަށް އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ކުރީގެ ޗެއާޕާސަން ފައްޔާޒު އިސްމާއީލް ވިދާޅުވެއްޖެ އެވެ.
މިއަދު ކުރިއަށްދިޔަ އިންތިހާބުގައި މިހާތަނަށް ގުނި ވޯޓު ފޮށިތަކަށް ބަލާއިރު ކުރީގައި އުޅެނީ އެމްޑީޕީ އެވެ. މިރޭ ކުރެއްވި ޓްވީޓެއްގައި ފައްޔާޒު ވަނީ އިންތިހާބުވި އެމްޑީޕީގެ ކައުންސިލަރުންނާއި، ޑަބްލިއުޑީސީ މެންބަރުންނަށް މަރުހަބާ ދަންނަވާފަ އެވެ.
"ވޯޓުން ދިވެހި ރައްޔިތުން ވަނީ ރައީސް މުއިއްޒަށް ސާފުކޮށް ނޫނެކޭ ބުނެފަ. ސަރުކާރު ޖަވާބުދާރީ ކުރުވުމަށް އެމްޑީޕީއަށް އިތުބާރުކޮށް، ރައީސްގެ ހުދުމުހުތާރު އެޖެންޑާއާ ދެކޮޅަށް ވޯޓު ދެއްވި އެންމެހާ ރައްޔިތުންނަށް ޝުކުރު ދަންނަވަން،" ފައްޔާޒު ލިޔުއްވި އެވެ.
މި ކާމިޔާބު ހޯދުމުގައި އެއް އަމާޒަކަށް މަސައްކަތް ކުރެއްވި ކުރީގެ ރައީސް މުހައްމަދު ނަޝީދު އާއި ކުރީގެ ރައީސް އިބްރާހިމް މުހައްމަދު ސޯލިހު، އެ ޕާޓީގެ ޗެއާޕާސަން އަބްދުލްޣަފޫރު މޫސާ އަދި ލީޑާޝިޕަށް އޭނާ ޝުކުރު އަދާކުރެްވި އެވެ.
"މިއީ ބާރުތައް މަސްހުނިކުރުމާއި، އިގުތިސާދު ފަނާކުރުމާއި، ސަރުކާރުގެ އަނިޔާވެރިކަމާ ދެކޮޅަށް ރައްޔިތުން ދިން ސާފު މެސެޖެއް. މިއީ އިދިކޮޅު ފަރާތްތަކުން ހިޔާލު ތަފާތުވުންތައް އެއްކިބާކޮށް ގައުމީ މަސްލަހަތަށް މަސައްކަތް ކުރުމުގެ ނަތީޖާ.
"ރައްޔިތުންގެ އަޑު އުފުލައި، މި ސަރުކާރު ބަދަލުކުރުމުގެ ޒިންމާ އުފުލަން އެމްޑީޕީ އޮތީ ތައްޔާރަށް. ދިވެހިރާއްޖެ އަލުން ހޯދުމުގެ މަސައްކަތް މި ފެށުނީ."
އިދިކޮޅު އެމްޑީޕީން މި އިންތިހާބުގައި ބޮޑު ކާމިޔާބީއެއް ހޯދާފައި މިވަނީ ސަރުކާރުން ދައުލަތުގެ ހުރިހާ މުދަލަކާއި ވަސީލަތެއް ބޭނުންކޮށްގެން ކެމްޕޭން ކުރަމުން ދަނިކޮށެވެ.
