އެފްއޭއެމް ވެޓަރަންސް ކަޕްގައި މިއަދު ކުޅުނު މެޗުން ބުރު ސްޕޯޓްސް ކްލަބް 13-0 އިން ބަލިކޮށް، ހުޅުމާލެ ވެޓަރަންސް އިން މުބާރާތުގެ ސެމީ ފައިނަލުގެ ޖާގައެއް ޔަގީންކޮށްފި އެވެ.
ހުޅުމާލެ ވެޓަރަންސް އިން ގްރޫޕް ބީގައި ކުޅުނު ފަހު މެޗުން ހޯދި މޮޅާ އެކު، ހަތަރު މެޗުން ވަނީ 10 ޕޮއިންޓް ހޯދައިފަ އެވެ. މި ގްރޫޕްގެ ދެ ވަނައިގައި އޮތް ޕޮލިސް ކްލަބަށް ވަނީ ތިން މެޗުން ހަތް ޕޮއިންޓް ލިބިފަ އެވެ. ތިން ވަނައިގައި އޮތް ހުއްރިއްޔާ ސްޕޯޓްސް ކްލަބް (ހުރާ) އަށް ތިން މެޗުން ހަތަރު ޕޮއިންޓް ލިބިފައިވާއިރު، ހަތަރެއްގައި އޮތް ޔުނައިޓެޑް ވިކްޓަރީ (ޔޫވީ) އަށް ތިން މެޗުން އެއް ޕޮއިންޓް އަދި ފުލުގައި އޮތް ބުރު އަށް ވެސް ތިން މެޗުން އެއް ޕޮއިންޓް ލިބިފައިވެ އެވެ.
ޓާފް ދަނޑުގައި މިއަދު ހަވީރު ކުޅުނު މެޗުގައި ބުރު ކޮޅަށް ހުޅުމާލެ ވެޓަރަންސް އިން ފުރަަތަމަ ހާފުގައި ހަތަރު ގޯލު ޖެހި އެވެ. ބާކީ ނުވަ ލަނޑު ޖެހީ ދެ ވަނަ ހާފުގަ އެވެ. މި މެޗުގައި، ހުޅުމާލެ ވެޓަރަންސް ޓީމުގެ ހުސެއިން ޝިމާޒް (ކޮކީ) ވަނީ ފަސް ލަނޑު ޖަހައިފަ އެވެ. މެޗުގެ މޮޅު ކުޅުންތެރިޔާގެ މަގާމު ވެސް ހޯދީ ކޮކީ އެވެ.
އެ ޓީމުގެ އަނެއް ލަނޑުތައް ޖެހީ، އަހުމަދު މުއާޒް، މުހައްމަދު ޒޮރީފް އަދި އިބްރާހިމް މާޖިދު، ކޮންމެ ކުޅުންތެރިއަކު ދެ ލަނޑުގެ އިތުރުން، ނާފިއު މުހައްމަދު ހާމިދު އާއި އަހުމަދު ޝާއިރު، ކޮންމެ ކުޅުންތެރިއަކު ލަނޑެކެވެ.
އެފްއޭއެމް އިން ކްލަބް އިވެންޓްސްއާ ގުޅިގެން، ވެޓަރަންސް ލީގު އެންމެ ފަހުން ބޭއްވިއިރު، ހަތަރު ފަހަރު ވެސް ތަށި ހޯދީ ހުޅުމާލެ ވެޓަރަންސް އިންނެވެ.
ދިހަ ޓީމުގެ މެދުގައި ކުރިއަށްދާ މި މުބާރާތުގައި، ގްރޫޕް އޭގެ އެއް ވަނައިގައި އޮތީ ތިން މެޗުން ވެސް މޮޅުވެ، ސެމީގެ ޖާގައެއް ހޯދާފައިވާ ވިލިމާލެ ޔުނައިޓެޑް އެވެ. ދެ ވަނައިގައި އޮތް މުއިވެޔޮ ފްރެންޑްސް އަށް ތިން މެޗުން ހަ ޕޮއިންޓް ލިބިފައިވާއިރު، ތިން ވަނައިގައި އޮތް ނިއު ރޭޑިއަންޓް ސްޕޯޓްސް ކްލަބާއި ހަތަރެއްގައި އޮތް ދިވެހި ސިފައިންގެ ކްލަބަށް ލިބިފައިވަނީ ހަތަރު ޕޮއިންޓެވެ. ނިއު އަށް ބާކީ އޮތީ މުއިވެޔޮ މެޗެެވެ. މި ގްރޫޕްގެ ފުލުގައި އޮތީ މިހާތަނަށް ކުޅުނު ތިން މެޗުން ވެސް ބަލިވި ދަ ގްރާންޑޭ އެވެ.
މި މަހުގެ 11 ވަނަ ދުވަހާ ހަމައަށް ގްރޫޕް ސްޓޭޖުގެ މެޗުތައް ކުރިއަށްދާއިރު، ސެމީ ފައިނަލް އޮންނާނީ 13 އާއި 14 ގަ އެވެ. އަދި، ފައިނަލް މެޗު ކުޅޭނީ 16 ގަ އެވެ.
މި އަހަރުގެ ކުރިން، އެފްއޭއެމް އިން ސީދާ ހިންގުމާ ހަވާލުވެގެން ވެޓަރަންސް މުބާރާތެއް ބޭއްވީ މީގެ 15 ވަރަކަށް އަހަރު ކުރިންނެވެ. ކުރީގެ ކުޅުންތެރިންނަށް ހާއްސަކޮށްގެން ފެށި މި ވެޓަރަންސް މުބާރާތް އެފްއޭއެމް އިން ބޭއްވި ފަހުން، ދެން، އެފްއޭއެމާ ގުޅިގެން ހިންގުމުގެ ކަންތައްތަކާ ހަވާލުވެގެން ބޭއްވީ އެކިއެކި ފަރާތްތަކުންނެވެ.
އެ ގޮތުން، ސޮކަ ވެޓަރަންސް އެސޯސިއޭޝަން އޮފް މޯލްޑިވްސް (ސްވޭމް)، މޯލްޑިވްސް ސޮކަ މޭޓްސް (އެމްއެސްއެމް) އަދި ކްލަބް އިވެންޓްސް އިން ވެސް ވަނީ މި މުބާރާތް ބާއްވައިފަ އެވެ.
