ރައީސް މުހައްމަދު މުއިއްޒުގެ އެއްބަނޑު ކޮއްކޮ، އަދި ރައްޔިތުންގެ މަޖިލީހުގެ ނިލަންދޫ ދާއިރާގެ މެންބަރު ފާތިމަތު ސައުދާ އަށް 2.4 މިލިއަން ރުފިޔާގެ ލޯނެއް ދިނީ ކާކުކަން އޭނާ ވިދާޅެއް ނުވި އެވެ.
ސައުދާގެ އެކައުންޓަށް މިލިއަނުން ނަގުދު ފައިސާ ޖަމާކުރި މައްސަލަ މަރުކަޒީ ބޭންކް (އެމްއެމްއޭ) އަށް ފްލެގްވެފައިވާކަން 'އަދަދު' ނޫހަށް ވަނީ އެނގިފައެވެ. ނަމަވެސް އެ މައްސަލަ ފުލުހުންނާއި އެންޓި ކޮރަޕްޝަން ކޮމިޝަނުން ބަލަމުންދާކަން އެ އިދާރާއިން އަދި ހާމައެއް ނުކުރެ އެވެ.
މި މައްސަލައާ ގުޅޭގޮތުން ސައުދާއާ ސުވާލު ކުރުމުން، އޭނާ ވަނީ އެ ފައިސާ އެކައުންޓަށް ޖަމާކުރި ކަމަށް އެއްބަސްވެފައެވެ.
"އާދެ، ވިޔަފާރިވެރިއަކު އަތުން ނެގި ސްޓޫޑެންޓް ލޯނެއް އެއީ. ކަމާ ގުޅޭ ހުރިހާ ލިޔުމެއް ވާނީ ބޭންކަށް ހުށަހަޅައިފަ،" ޓެކްސްޓް މެސެޖަކުން ޖަވާބު ދެއްވަމުން ސައުދާ ވިދާޅުވިއެވެ.
ލޯނީ ދިނީ ކޮން ވިޔަފާރިވެރިއެއް ކަމެއް ސައުދާ ވިދާޅެއް ނުވި އެވެ. އެއީ ކާކުތޯ އޮޅުން ފިލުވުމަށް ބުރާސްފަތި ދުވަހު އަދި މިއަދު ވެސް ސުވާލު ކުރުމުން ސައުދާ ޖަވާބެއް ނުދެއްވި އެވެ.
މިދިޔަ އަހަރު ސައުދާ މަޖިލީހަށް ހުށަހެޅި މާލީ ބަޔާނުން އެނގޭ ގޮތުގައި އަހަރެއްގެ ތެރޭގައި 990،000ރ. އޭނާއަށް މުސާރައިގެ ގޮތުގައި ވަނީ ލިބިފަ އެވެ. މާލީ ބަޔާން ހުށަހެޅިއިރު އެކައުންޓުގައި ހުރީ އެންމެ 78،000ރ. އެވެ.
