މިލާން (މާޗް 3) - މި އަހަރުގެ ވޯލްޑް ކަޕަށް ކޮލިފައިވުމަށް ކުޅޭ ޔޫރަޕްގެ ޕްލޭއޮފް ބުރުގައި ވާދަކުރާ އިޓަލީ ޓީމުގެ ސްކޮޑުން ގަތަރުގެ އަލް ޑުހައިލް އަށް ކުޅެމުން އަންނަ މާކޯ ވެރާޓީ އަށް ފުރުސަތު ދޭން ނިންމާފައިވާ ކަމަށް ރިޕޯޓްތައް ބުނެފި އެވެ.
ވެރާޓީ، 33، އެންމެ ފަހުން އިޓަލީ ޓީމަށް މެޗެއް ކުޅެދިނީ، 2023 ވަނަ އަހަރުގެ ޖޫން މަހު ކުޅުނު ނޭޝަންސް ލީގުގެ ތިން ވަނަ ހޮވާ މެޗުގަ އެވެ. އޭގެ ފަހުން، އިޓަލީގެ ސްކޮޑުން ވެރާޓީ އަށް ފުރުސަތު ނުލިބެ އެވެ.
އިޓަލީ އަށް 55 މެޗު ކުޅެދީފައިވާ ވެރާޓީ އަށް އަލުން ގައުމީ ޓީމުން ފުރުސަތު ދޭން އެ ޓީމުގެ ކޯޗު، ޖެނާރޯ ގަޓޫސޯ ނިންމާފައި މި ވަނީ، ވޯލްޑް ކަޕަށް ކޮލިފައިވުމަށްޓަކައި، ޕްލޭއޮފްގައި ކުޅެން ތަޖުރިބާހުރި ވަރުގަދަ ސްކޮޑެއް އެކުލަވާލުމުގެ ގޮތުންނެވެ.
ޕީއެސްޖީ އަށް ގިނަ އަހަރުތަކެއް ވަންދެން ކުޅުނު ވެރާޓީ، 2023 ވަނަ އަހަރުގެ ސެޕްޓެމްބަރުގައި ފުރަތަމަ ބަދަލުވީ ގަތަރުގެ އަލް އަރާބީ އަށެވެ. އަދި، މި އަހަރު އޭނާ ވަނީ އަލް އަރާބީ ދޫކޮށް ޑުހައިލްއާ ގުޅިފަ އެވެ.
އެންމެ ފަހުން ބޭއްވި ދެ ވޯލްޑް ކަަޕަށް ވެސް އިޓަލީ ކޮލިފައިނުވެ އެެވެ. ކުރިން ދެ ފަހަރެކޭ އެއްގޮތަށް މި ފަަހަރު ވެސް އިޓަލީ ކުޅެން ޖެހިފައި މި ވަނީ ކޮލިފައިން ޖާގައެއް ސީދާ ނުލިބުމުން ޕްލޭއޮފްގަ އެވެ. ރަޝިއާގައި 2018 ވަނަ އަހަރު ބޭއްވި ވޯލްޑް ކަޕްގެ ކޮލިފައިން ޕްލޭއޮފުން އިޓަލީ ކެޓީ ސްވިޑެން އަތުން 1-0 އިން ބަލިވެގެންނެވެ. އަދި، ގަތަރުގައި، 2022 ގައި ބޭއްވި ވޯލްޑް ކަޕުން ވެސް އިޓަލީ އަށް ފުރުސަތު ގެއްލުނީ ކޮލިފައިން ޕްލޭއޮފްގައި ބަލިވުމުންނެވެ. ނޯތު މެސެޑޯނިއާ އިން، 1-0 އިން އިޓަލީ ބަލިކުރި ގޯލު ޖެހީ އިތުރު ވަގުތުގައި އަލެކްސަންޑަ ޓްރަޖޯވްސްކީ އެވެ.
މި ފަހަރުގެ ޕްލޭއޮފްގައި އިޓަލީން ފުރަތަމަ ކުޅެން ޖެހޭނީ ނޮދަން އަޔަލެންޑާ ދެކޮޅަށެވެ. އެ މެޗުން މޮޅުވެއްޖެނަމަ، ވޯލްޑް ކަޕްގެ ޖާގަ އަކަށް ޕްލޭއޮފްގެ ޕެތު އޭގެ ފައިނަލުގައި ކުޅެން ޖެހޭނީ، ވޭލްސް އާއި ބޮސްނިއާ ތެރެއިން ޓީމަކާ އެވެ. ޕްލޭއޮފް މެޗުތައް އޮތީ މި މަހު ފަހުކޮޅުގަ އެވެ.
