ސަރުކާރާއި އާންމުން ހިއްސާވަ، ބޭންކް އޮފް މޯލްޑިވްސް (ބީއެމްއެލް) ގެ ހިއްސާއަކަށް 60ރ. ގެ ރެކޯޑު ފައިދާއެއް ބެހުމަށް ނިންމައިފި އެވެ.
މިއީ ބީއެމްއެލްގެ ތާރީހުގައި ހިއްސާގެ ފައިދާގެ ގޮތުގައި ބަހަން ނިންމި އެންމެ ބޮޑު އަދަދެވެ. މިދިޔަ އަހަރަކީ އެ ކުންފުންޏަށް އެންމެ ބޮޑު ސާފު ފައިދާއެއް ލިބުނު އަހަރެވެ. ބީއެމްއެލްއަށް މިދިޔަ އަހަރު 2.5 ބިލިއަން ރުފިޔާ ސާފު ފައިދާވި އެވެ.
ހިއްސާގެ ފައިދާގެ ގޮތުގައި 322,915,200ރ. ބެހުމަށް ބޯޑުގެ ފަރާތުން އަހަރީ އާންމު ޖަލްސާއަށް ހުށަހަޅާނެ އެވެ.
އޭގެ އިތުރުން މިހާރު ތިބި ހިއްސާދާރުންނަށް ކޮންމެ ހިއްސާއަކަށް ބޯނަސް ހިއްސާގެ ގޮތުގައި އިތުރު ދެ ހިއްސާ ދިނުމަށްވެސް ހުށަހަޅާނެ އެވެ.
"މިގޮތަށް ބޯނަސް ހިއްސާ ދޫކުރުމަށްފަހު، 50 ރުފިޔާގެ މޫނު މަތީ ހިއްސާގެ ބުކް ވެލިއު އަކަށް ވާނީ 1015.90 ރުފިޔާ. އެހެންކަމުން މިއަހަރު ކޮންމެ ހިއްސާއަކަށް މިދެވެނީ ޖުމްލަ 2091.80 ރުފިޔާގެ ނަފާއެއް،" ބީއެމްއެލްއިން ބުނެފައިވެ އެވެ.
"ބޯނަސް ހިއްސާ ދޫކުރުމަށް ހުށަހަޅާ މައިގަނޑު ސަބަބަކީ ބޭންކުގެ މާކެޓް ކެޕިޓަލައިޒޭޝަން އިތުރުކޮށް ހިއްސާދާރުންނަށް ލިބޭ ނަފާ އިތުރު ކުރުމާއި، ރާއްޖޭގެ ހިއްސާގެ ބާޒާރު އިތުރަށް ފުޅާކުރުމަށް އެހީތެރިވުން."
މިދިޔަ އަހަރު ބީއެމްއެލް އިން 30،000 އަށްވުރެ ގިނަ އާ ކަސްޓަމަރުންނަށް މަރުހަބާ ކިޔާފައިވެ އެވެ. މީގެ އިތުރުން ބޭންކުން ވަނީ މިދިޔަ އަހަރު އަލަށް ލޯނާއި ފައިނޭންސިންގެ ގޮތުގައި 10 ބިލިއަނަށް ވުރެ ގިނަ ރުފިޔާ ދޫކޮށްފަ އެވެ.
