ޖިންސީ ފުރައްސާކުރި ކަމަށް އޭނާގެ މައްޗަށް ކުރާ ތުހުމަތުތައް ދޮގުކޮށް، މިދިޔަ ބުރާސްފަތި ދުވަހު މަގާމުން ވަކިކުރީ ގާނޫނާ ހިލާފަށް ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ފައިނޭންޝަލް އިންޓެލިޖެންސް ޔުނިޓް (އެފްއައިޔޫ) ގެ ވެރިޔާ އިސްމާއިލް ސާޖިދު މިއަދު ވިދާޅުވެއްޖެ އެވެ.
ސާޖިދު ނެރުނު ބަޔާނެއްގައި ބުނީ އޭނާއާ ދެކޮޅަށް ހުށަހަޅާފައިވާ ޖިންސީ ފުރައްސާރައިގެ މައްސަލައެއް އެމްއެމްއޭގެ ކޮމިޓީއަކަށް ހުށަހަޅައި ސާބިތުވާ ކަމަށް ނިންމީ، އެ މައްސަލަ ހުށަހެޅި ފަރާތުން ދޮގުތަކެއް ހަދާފައިވާކަން އެނގެން އޮއްވާ ކަމަށެވެ.
"އަޅުގަނޑާއި ދެކޮޅަށް މޯލްޑިވްސް މަނިޓަރީގެ ޖިންސީ ފުރައްސާރައިގެ ކޮމިޓީއަށް ހުށަހެޅި މައްސަލަ ބަލައި، އަޅުގަނޑުގެ މައްޗަށް ފުރައްސާރައިގެ ތުހުމަތު ސާބިތުވާކަމަށް ނިންމާފައިވަނީ އެ މައްސަލަ ހުށަހެޅި ފަރާތުން ކަނޑައެޅިގެން ދޮގުތަކެއް ހަދާފައިވާކަން ސާބިތުކުރެވޭނެ މިންވަރަށް ކިތާބީ ހެކި ހުށަހަޅައފައިވީ ނަމަވެސް، އެ ހެކިތަކަށް އެއްވެސް މިންވަރަކަށް ބެލުމެއް ނެތި،" އޭނާ ވިދާޅުވި އެވެ.
ސާޖިދު އިތުރަށް ވިދާޅުވީ މައްސަލައިގެ ތަފްސީލް ރަނގަޅަށް ބަލާލުމުން، މި މައްސަލައިގައި އެމްއެމްއޭ އިން އަމަލުކޮށްފައިވަނީ ގާނޫނާ ހިލާފަށްކަން އެނގޭނެ ކަމަށެވެ.
"މި މައްސަލައިގައި އަޅުގަނޑާމެދު އަޅާފައިވާ ފިޔަވަޅަކީ ގާނޫނީ ހަމައިގެ މަތިން އަޅާފައިވާ ފިޔަވަޅެއް ނޫންކަން މި މައްސަލައިގެ ތަފްސީލް ބެލި ކޮންމެ މީހަކަށްވެސް އެނގޭނެ،" އޭނާ ވިދާޅުވި އެވެ.
ސާޖިދު ވިދާޅުވީ އެފްއައިޔޫގެ މުވައްޒަފެއްގެ ސައިސިއްޔަތުން މުވައްޒަފަކު ކޮށްގެން ނުވާނެ ބައެއް ކަންކަން ކުރުމުން، އެކަމާ ގުޅޭގޮތުން އަމަލުކުރަން ޖެހޭ ގޮތަށް ކުރި ކަމަށެވެ. މިގޮތުން މިއަދު ލިބިފައިވާ އަނިޔާއަކީ އެ މުވައްޒަފާމެދު އަމަލުކުރަން ޖެހޭ ގޮތަށް އަމަލުކުރުމުން ކަމަށް ދެކޭ ކަމަށް އޭނާ ވިދާޅުވި އެވެ.
ޖިންސީ ފުރައްސާރަ ކުރި ކަމަށް މުވައްޒަފު ބުނާ ދުވަސްތަކާއި މައްސަލަ ހުށަހެޅި ދުވަހާއި ދެމެދު 39 ދުވަސް ހިނގާފައިވާކަން ފާހަގަކޮށް ސާޖިދު ވިދާޅުވީ އެ މުއްދަތުތަކުގެ ތެރޭގައި ހިނގާފައިވާ ކަންކަން އިދާރާގެ ލިޔެކިޔުންތަކުންނާއި އެހެނިހެން ހެކިތަކުން އެނގޭނެ ކަމަށެވެ.
މިގޮތުން އޭނާ ވިދާޅުވީ އެމްއެމްއޭގެ ކޮމިޓީން ކަންކަން ރަނގަޅަށް ބެލިނަމަ މައްސަލަ ހުށަހެޅުމުގެ ފަހަތުގައިވާ މަގުސަދުވެސް އެނގޭނެ ކަމަށެވެ.
ޖިންސީ ފުރައްސާރައިގެ މައްސަލަ އުފެއްދުމަށްފަހު އަބުރު ކަތިލައި އެ މައްސަލައަށް ނުފޫޒު ފޯރުވުމުގެ މަސައްކަތް ވެސް ކޮށްފައިވާ ކަމަށް ސާޖިދު ވަނީ ތުހުމަތުކޮށްފަ އެވެ.
"އަޅުގަނޑު ފައިނޭންޝަލް އިންޓެލިޖެންސް ޔުނިޓުގެ ވެރިޔަކަށް ހުރުމުން އުނދަގޫވާ ފަރާތެއް ހުރިނަމަ، ނުވަތަ ދަތިތަކެއް ކުރިމަތިވާނަމަ، ވަޒީފާއިން ވަކިވާން އަޅުގަނޑުގެ ކައިރީގައި ސީދާ ބުނި ނަމަ، ރީތިކޮށް މިކަން ކުރެވުނީހެވެ. ކޮންމެހެން މީހެއްގެ އަބުރު ކަތިލުމުގެ އެއްވެސް ބޭނުމެއް ނެތް،" އޭނާ ވިދާޅުވި އެވެ.
މީގެއިތުރުން ސާޖިދު ވިދާޅުވީ އެމްއެމްއޭގެ ކޮމިޓީން އަމަލުކުރި ގޮތުން އެ އޮތޯރިޓީގައި މަސައްކަތްކުރާ ވެރިންނާމެދު ހިތްހަމަނުޖެހުމުން، ފުރައްސާރައިގެ މައްސަލައެއް އުފައްދައި މަގާމު ގެއްލުވާލުމުގެ ފުރުސަތު އޮތް ކަމަށް ގަބޫލުކުރެވޭ ކަމަށެވެ.
އެފްއައިޔޫގެ ވެރިޔާގެ މަގާމުން ސާޖިދު ސަސްޕެންޑުކުރީ ޑިސެމްބަރު 25، 2025 އިން ފެށިގެންނެވެ. ސްޓަރަކްޗަރަލް ބަދަލެއްގެ ތެރެއިން ކަމަށް ބުނެ އެފްއައިޔޫގެ ކުރީގެ ވެރިޔަކަށް ހުރި އަބްދުالله އަޝްރަފްގެ ބަދަލުގައި ސާޖިދު އެ މަގާމަށް ހަމަޖެއްސީ އޯގަސްޓު 3، ގަ އެވެ.
