ޕެރިސް (ޖެނުއަރީ 30) - ފްރާންސްގެ މާސޭ އަށް ކޯޗުކޮށްދެމުން އައި އިޓަލީގެ ތަޖުރިބާކާރު ކޯޗު، ރޮބާޓޯ ޑި ޒާބީ، މަގާމުން އިސްތިއުފާ ދޭން ނިންމައި، އެ ކަން ކްލަބަށް ވެސް އަންގާފައިވާ ކަމަށް ރިޕޯޓްތައް ބުނެފި އެވެ.
މީގެ އެއް އަހަރު ކުރިން، 2024 ގައި، މާސޭ ކޯޗުކަމަށް ގެނައި ޑި ޒާބީ، އެ ކްލަބާ އެކު ކޮންޓްރެކްޓްގައި ހުރީ 2027 ވަނަ އަހަރުގެ ޖޫންގެ ނިޔަލަށެވެ. އެކަމަކު، ޗެމްޕިއަންސް ލީގުގައި އެންމެ ފަހުން ކުޅުނު މެޗުން އަމިއްލަ ދަނޑުގައި ލިވަޕޫލް އަތުން 3-0 އިން ބަލިވެ، ޑި ޒާބީ އަށް ވަނީ މެނޭޖްމަންޓުގެ ޕްރެޝަރުތަކެއް ކުރިމަތިވެފަ އެވެ. އެއާ އެކު، ޑި ޒާބީ ނިންމީ މަގާމުގައި ކުރިއަށްނުދިއުމަށެެވެ. އެހެންވެ، އިސްތިއުފާގެ ނިންމުން ކްލަބާ ހިއްސާކުރި އެވެ.
އެކަމަކު، ފްރާންސްގެ ބައެއް މީޑިއާތަކުން ރިޕޯޓްކުރާ ގޮތުގައި ޑި ޒާބީގެ އިސްތިއުފާ ގަބޫލުކުރުމާ މެދު މާސޭގެ ސީނިއާ މެނޭޖްމަންޓުން އަދި ގޮތެއް ނުނިންމަ އެވެ. އެހެން ނަމަވެސް، ޕެރިސް އެފްސީއާ އެކު، ފްރެންޗް ލީގުގައި މާދަމާ ކުޅޭ މެޗަށް މާސޭ އިން މިހާތަނަށް ބޭއްވި ސެޝަންތަކުގައި ޑި ޒާބީ ފެނިފައިނުވެ އެވެ.
ޑި ޒާބީ ވަނީ އިޓަލީގެ ޕަލާމޯ، ބެނެވެންޓޯ، ސަސުއޯލޯ އަށް ކޯޗުކޮށްދިނުމުގެ އިތުރުން އިންގްލެންޑްގެ ބްރައިޓަން އާއި ޔޫކްރެއިންގެ ޝަހުތަރު ޑޮނެސްކަށް ކޯޗުކޮށްދީފަ އެވެ.
