ކ. ކާށިދޫ ފަޅާއި ނ. މާފަރު ފަޅުތެރޭގައި އޮންނަ ފަރުމުލީގައި ރިސޯޓު ތަރައްގީކުރަން ހުޅުވާލުމުން ވެސް އެކަށީގެންވާ ވަރަށް އިންވެސްޓަރުން ނުލިބިގެން އަނެއްކާ ވެސް ބީލަމަށް ހުޅުވާލައިފި އެވެ.
ކާށިދޫ ފަޅުގައި ރިސޯޓު ތަރައްގީކުރާނެ ބަޔަކު ހޯދުމަށް އިއުލާނުކުރީ އެޕްރީލް 1، 2025ގަ އެވެ. ސެޕްޓެމްބަރު 11، 2025 ގައި ވެސް މި އިއުލާންކުރި އެވެ. މިއީ ކާށިދޫ ފަޅުގައި ރިސޯޓެއް އަޅަން އިންވެސްޓަރުން ހޯދަން އިއުލާނުކުރި ތިންވަނަ ފަހަރެވެ.
ކާށިދޫ ފަޅުން 115 ހެކްޓަރު ކުއްޔަށް ނެގުމަށް އިކުއިޒިޝަން ކޯސްޓުގެ ގޮތުގައި 1.5 މިލިއަން ޑޮލަރު ދައްކަން ޖެހެ އެވެ. ފަރުމުލީ ފަޅުން 71 ހެކްޓަރަށް އިކުއިޒިޝަން ކޯސްޓުގެ ގޮތުގައި 2.25 މިލިއަން ޑޮލަރު ދައްކަން ޖެހެ އެވެ.
ސަރުކާރުން ބޭނުންވަނީ 10 ހެކްޓަރުގެ ތަނެއް ހިއްކައިގެން ކާށިދޫ ފަޅުގައި ރިސޯޓު ހަދާށެވެ. އެކަމަކު ރިސޯޓުގެ އިހުތިސާސަށް 115 ހެކްޓަރު ދޭން ސަރުކާރުން އެއްބަސްވެ އެވެ. ރިސޯޓުގައި މަދުވެގެން 100 އެނދު ހުރުމަކީ ސަރުކާރުގެ ވައުދެކެވެ.
ފަރުމުލީގައި ރިސޯޓު އަޅާނެ ބަޔަކު ހޯދަން އެންމެ ފުރަތަމަ އިއުލާނުކުރީ ޖުލައި 6، 2025 ގަ އެވެ. އެ ރަށުގައި ތަރައްގީ ކުރާ ރިސޯޓުގައި 150 އެނދު ހުންނަން ޖެހެ އެވެ.
ރިސޯޓު ހަދަން ދޫކުރަނީ 0.41 ހެކްޓަރުގެ ފަރުމުއްޔާއެކު 71.18 ހެކްޓަރުގެ ފަޅުގެ ސަރަހައްދެކެވެ. އަދި ފަޅުގެ ސަރަހައްދުން 15 ހެކްޓަރު ހިއްކޭނެ ކަމަށް ވެސް އެ އިއުލާނުގައި ބުނެފައިވެ އެވެ.
ޓޫރިޒަމް މިނިސްޓްރީން މިއަދު ކުރި އިއުލާނެއްގައި ވާގޮތުން ބިޑު ހުށަހެޅުމުގެ ސުންގަޑިއަކީ އެޕްރީލް މަހުގެ ފުރަތަމަ ދުވަހުގެ 10:00 ގެ ކުރިންނެވެ. ބިޑް ސެކިއުރިޓީގެ ގޮތުގައި 50،000 ޑޮލަރު ދައްކަން ޖެހެ އެވެ.
ކާށިދޫ ފަޅުގައި ރިސޯޓެއް އަޅަން މީގެ ކުރިން ކުރީގެ ރައީސް މައުމޫން އަބްދުލްގައްޔޫމް އަދި އިބްރާހިމް މުހައްމަދު ސޯލިހުގެ ސަރުކާރުގައި ވެސް މަސައްކަތް ކުރި އެވެ. އެތަނުގައި ރިސޯޓު އަޅަން ސޯލިހު ސަރުކާރުގައި ވެސް ބިޑަށް ހުޅުވައިލި އެވެ.
މައުމޫނުގެ ސަރުކާރުގައި ފަހުން ނިންމީ ކާށިދޫ ފަޅު ނޫން ތަނެއްގައި ރިސޯޓު އެޅުމަށެވެ. އެއީ ކާށިދޫ ފަޅު ހިއްކައިފި ނަމަ އިއާދަނުކުރެވޭނެ ގެއްލުންތަކެއް ތިމާވެއްޓަށް ލިބިދާނެތީ އެވެ. އެކަމަކު، ތިމާވެއްޓަށް އަސަރު ކުރާނެ މިންވަރުގެ ދިރާސާއެއް ހެދުމަށް ސޯލިހުގެ ވެރިކަމުގައި އަލުން މަސައްކަތް ކުރި އެވެ.
