ބަކަރި ކޮށީގައި "ބަކަރިތައް" ގިނަވެ، އެކަކު އަނެކަކުގެ ފަޔަށް އެރި، ބައެއް އެއްޗެހި ފާރުގައި އެލިގަނެގެން ތިބި މަންޒަރު ފެނުމުން ރައްޔިތުން ބަޔަކު ހަޅޭއްލަވަން ފެށިއެވެ. "ޖުހާއެވެ! މި ހަރަދުތަކުން އަހަރެމެން މިތިބީ ހާސްވެފައެވެ. އެ ސޮރުމެންނަސް ނޭވާލާނެ ޖާގައެއް ކޮށްޓަކު ނެތެވެ! ކަލޭ ކޮންމެ ދުވަހަކު ޖަނަވާރެއް ގެންނަނީ ކީއްކުރަން ހެއްޔެވެ؟"
ޖުހާ އޭނާގެ ފަށުވި ހެދުން ރީތިކޮށްލަމުން، ވަރަށް ސީރިއަސް މޫނެއް ދައްކާލާފައި އިއުލާން ކުރިއެވެ.
"ލޯބިވާ ރައްޔިތުންނޭވެ! އަހަރެން މިހުރީ ރައްޔިތުންގެ ފަޅީގަ އެވެ. އަހަރެން ނިންމާ ކޮންމެ ނިންމެއް ނިންމާނީ ތިޔަ ރައްޔިތުންނަށްޓަކަ އެވެ. ތިޔަބައިމީހުންގެ ތަކުލީފުތައް އަޑުއަހައިފީމެވެ. އެހެންވެ، މިއަދަކީ ތާރީހީ ދުވަހެކެވެ. ދައުލަތުގެ ބަޖެޓަށް ނޭވާއެއް ލެވޭނީ ބަކަރި ކޮށިން ބަކަރި މަދުކޮށްގެން ކަމަށް އަހަރެން ގަބޫލުކޮށްފީމެވެ. މިއަދުން މިއަދަށް 200 ބަކަރި ބޭރުކޮށްލުމަށް އަމުރުކޮށްފީމެވެ! މިއީ ހަރަދު ކުޑަކުރުމުގެ ހިތްވަރުގަދަ މިސާލެކެވެ!"
މި އަޑަށް ބައެއް ސަޕޯޓަރުން އަތްޖަހައި، "ޖުހާގެ ވެރިކަން ބާއްޖަވެރި ކުރައްވާށި" އޭ ކިޔައި ހަޅޭއްލަވަން ފެށިއެވެ. ޖުހާ ފަހުރުވެރިކަމާއެކު ހިނިތުންވެލިއެވެ. އަދި 200 ސިކުންތު ވަންދެން ހަވާ އެރުވުން އޮންނާނެކަން ވެސް އިއުލާނު ކުރި އެވެ.
ނަމަވެސް، ކާތިބު މަޑުމަޑުން ޖުހާގެ ކަންފަތްދޮށުގައި ބުންޏެވެ. "ޖުހާއެވެ! ތިޔަ ބޭރުކުރީ 200 ބަކަރި އެވެ. ހަނދާން އެބަހުރި ހެއްޔެވެ؟ މިދިޔަ ދެ މަސް ތެރޭގައި 2000 ވެއްދީމެވެ. އަދިވެސް 1800 އެތެރޭގައި އެބަތިއްބެވެ! މިހާރުވެސް ކޮށި ފުރި، އިށީންނާނާނެ، ޖާގައެއް ނެތިގެން، ކުރާނެ ކަމެއް ނެތިގެން ތެޅި ފޮޅެނީ އެވެ."
ޖުހާ ލޯ އަޅާލާފައި ބުންޏެވެ. "ކަލެއަށް ކޮންމެ އެއްޗެއް މާ ފުންކޮށް އެނގެން ޖެހޭ ހެއްޔެވެ؟ މަޑުން ހުރެބަލާށެވެ! އެއީ ކުރީގެ ވާހަކައެވެ. ރައްޔިތުންނަށް ފެންނަނީ މިއަދުގެ ސުރުހީ އެވެ. މިއަދުގެ ހަބަރަކީ އަހަރެން ރައްޔިތުންނަށްޓަކައި 200 ބަކަރި ނެރުނު ވާހަކަ އެވެ. ފުރަތަމަ 2000 ވެއްދީމާ ނޫނީ، މި 200 މީހުން ވަކިކޮށްގެން 'ހަރަދު ކުޑަކުރި' ކަމުގެ ޝަރަފެއް ނުލިބޭނެ ނޫން ހެއްޔެވެ؟"
"އެކަމަކުވާ ޖުހާއެވެ،" އިތުރަށް ތަފުސީލުކޮށް ދެވޭތޯ ބެލި އެވެ. ބަކަރިތައް ގިނަވެ، ހަރަދު ވެސް ބޮޑުވެއްޖެ އެވެ. ކާންދިނުމަށް ހާދަ ފަތެއް މިހާރު ހޯދަންޖެހެ އެވެ. އެހެން މީހުން އަތުން ލޭންދޭނަށް ގެނައި ފަތަށް ފަތް ނުދެވުމުން ބަޔަކު މިހާރު އިތުބާރެއް ވެސް ނުކުރެ އެވެ. އެއްޗެއް ދޭނެ އެކުވެރިޔަކު ވެސް ނެތެވެ.
ޖުހާ ހިނިގަނޑެއް ޖަހާލާފައި ބުންޏެވެ. "ކަލެއަށް އަދިވެސް ނުވިސްނެނީއެވެ. މިއީ 'ޕޮލިޓިކްސް' އެވެ. ފުރަތަމަ ކޮށި ތާށިކޮށްލާނީއެވެ. އެންމެން ނޭވާ ހާސްވާ ހިސާބަށް ދިޔުމުން، ދެތިން އެތި ބޭރަށް ނެރެލީމާ، އެންމެންނަށް ހީވާނީ މުޅި ދުނިޔެ ތަނަވަސްވީ ކަމަށެވެ. މީހުން އުފާވަނީ ހަގީގަތް އެނގިގެނެއް ނޫނެވެ، ހީވާ ހީވުމަކަށެވެ!"
އެންމެ ފަހުން 200 ބަކަރި ނިކުތުމުން، ކޮށީގައި ތިބި 1800 ބަކަރިއަށް ކުޑަ އިންޗިއެއްގެ ޖާގަ ލިބުނެވެ.
ޖުހާ ބޭރުގައި ތިބި މީހުންނަށް ބުންޏެވެ. "ފެނޭ ހެއްޔެވެ؟ މިހާރު ކިހާ ތަނަވަސްވެއްޖެ ހެއްޔެވެ؟ މިއީ ހަމަ ރައްޔިތުންގެ ވާހަކަ އަށް އިޖާބަ ދިނުމުގެ ނަތީޖާއެވެ! އަދި އިތުރަށް ހަރަދު ކުޑަކުރަން ވެގެން، މިކަން ދިރާސާ ކުރަން ބަޔަކާ ހަވާލު ކުރާނަމަވެ،"
ރައްޔިތުންގެ ތެރެއިން ބަޔަކު އަނބުރައިގަނެގެން ވެއްޓުނެވެ. ޖުހާ ހުރީ ހިނިތުންވެލައިގެން، އޭނާގެ "ތަނަވަސް" ބަކަރި ކޮށްޓަށް ބަލަހައްޓައިގެންނެވެ. ތައުރީފުގެ އަތްތިލަ ބަޑި އަތްޖަހާ މީހުން އަތުން ހަން ފޮޅެންދެން އެކަން ކުރަމުން ދިޔަ އެވެ. ގޮވަމުން ދިޔަ އެވެ. ޖުހާ ހާދަހާވާ، މޮޅެވެ، ތިޔައީ ހާދަ ރަނގަޅު ސިޔާސަތެކެވެ.
