ސްޕެޝަލް އިކޮނޮމިކް ޒޯން (އެސްއީޒެޑް) ގެ ގޮތުގައި ސަރުކާރުން ކަނޑައަޅާ ސަރަހައްދުތަކުގައި ހިންގޭނެ އިގުތިސާދީ މަސައްކަތްތަކުގެ ތެރެއަށް ތެލާއި މައުދަން ހޯދުން ރައީސް މުހައްމަދު މުއިއްޒު މިއަދު އިތުރު ކުރައްވައިފި އެވެ.
އެސްއީޒެޑު ގާނޫނުގެ ދަށުން އެ ސަރަހައްދުތަކުގައި ހިންގޭނެ މަސައްކަތްތަކާއި އިންވެސްޓްކުރަންޖެހޭ އެންމެ ކުޑަ އަދަދުތައް ކަނޑައަޅައި ކޮންމެ އަހަރަކު ރައީސުލްޖުމްހުރިއްޔާ ގަރާރެއް ނެރުއްވަންޖެހެ އެވެ. މި އަހަރުގެ ގަރާރު ރައީސް އޮފީހުން އާންމުކުރީ މިއަދު އެވެ.
މިދިޔަ އަހަރުގެ ގަރާރު މުރާޖައާ ކުރުމަށްފަހު އެސްއީޒެޑު ގަރާރަށް މުއިއްޒު ގެންނަވާފައިވަނީ އެންމެ ބަދަލެކެވެ. އެއީ ކުރެވޭ މަސައްކަތްތަކުގެ ޖަދުވަލުގައި ހިމެނޭ (ވ) އަށް ދެ ކަމެއް އިތުރުކުރުމެވެ.
މީގެ ކުރިން އެ އަކުރުގައި އޮތް މަސައްކަތްތަކީ ގޭސް ހޯދުމެވެ. މި އަހަރުގެ ގަރާރުގައި ގޭހުގެ އިތުރުން ތެލާއި މައުދަންތައް ހޯދުމުގެ މަސައްކަތް އެ އަކުރަށް ވަނީ އިތުރުކޮށްފަ އެވެ.
މިއީ އިންވެސްޓްމަންޓް ޕްރޮޕޯސަލް އެއް ލިބިގެން ނުވަތަ ރާއްޖޭގެ ކަނޑު އަޑިން ތެލާއި ގޭސް އަދި މައުދަން ހޯދުމުގެ ވިސްނުން ސަރުކާރުން ގެންގުޅޭތީ ގެނައި ބަދަލެއް ކަމެއް ސާފެއް ނޫނެވެ. މިކަމާއި ގުޅިގެން ރައީސް އޮފީހުގެ ބަހެއް ނުލިބެ އެވެ.
އެސްއީޒެޑު ހިންގުމަށާއި އެސްއީޒެޑެއްގައި ދެމެހެއްޓެނިވި ޓައުންޝިޕްތައް ތަރައްގީކުރަން ބޭނުންވާ ނަމަ މަދުވެގެން އިންވެސްޓުކުރަން ޖެހޭ އަދަދަށް މުއިއްޒު މި އަހަރު ބަދަލެއް ގެންނަވާފައެއް ނުވެ އެވެ. އެގޮތުން އެޒްއީޒެޑަކަށް މަދުވެގެން 100 މިލިއަން ޑޮލަރު އިންވެސްޓްކުރަން ޖެހޭއިރު ޓައުންޝިޕް މަޝްރޫއަކަށް މަދުވެގެން 500 މިލިއަން ޑޮލަރު އިންވެސްޓްކުރަން ޖެހެ އެވެ.
ރާއްޖޭގެ ކަނޑުގެ އަޑިން ތެޔޮ ހޯދުމުގެ މަސައްކަތް މީގެ ކުރިން ވެސް ކުރި އެވެ. މުއިއްޒު ކެބިނެޓުގައި އިންނެވި، ކުރީގެ ރައީސް އަބްދުﷲ ޔާމީނުގެ ވެރިކަމުގައި ތެޔޮ ހޯދުމަށް ބޭރުން ތަޖުރިބާކާރުންނާއި ޓީމުތައް ގެނެސްގެން ތިން އަހަރެއްހާ ދުވަހު އެތައް މަސައްކަތެއް ކުރި އެވެ.
އޭރުގެ ދިރާސާތަކުން ރާއްޖޭގެ ކަނޑުގެ އަޑީގައި ތެޔޮ ހުރިކަން ޝައްކެތް ނެތް މިންވަރަށް ޔަގީންވި ކަމަށް އޭރު އެ މަސައްކަތްތާއި ހަވާލުވެ ހުންނެވި ކުރީގެ ފިޝަރީޒް މިނިސްޓަރު މުހައްމަދު ޝައިނީ ވިދާޅުވި އެވެ. ނަމަވެސް، އެ މަސައްކަތް ފަހުން ވީނުވީއެއް ނޭނގި މަޑުޖެހުނީ އެވެ.
