އުރީދޫ މޯލްޑިވްސްގެ މި އަހަރުގެ ކަލަންޑަރު ދިވެހިންގެ އާދަކާދައިގެ ތެރޭގައި ހިމެނޭ ސައިބުއިމުގެ ސަގާފަތަށް ހާއްސަކޮށްފި އެވެ.
އުރީދޫއިން ބުނީ މި އަހަރުގެ ކަލަންޑަރުގައި ކޮންމެ މަހަކުވެސް ތަފާތު ސައިގެ ބާވަތެއް ހިމަނާފައިވާއިރު، ކަލަންޑަރުގައި ގެނެސްދިނީ ރާއްޖޭގެ އެކި ކަންކޮޅުތަކުގައި ލިބެން ހުންނަ މޭވާ އަދި މާމެލާމެލި ރަހަތައް ހިމެނޭ ސަޔެއް ކަމަށެވެ.
މިގޮތުން ކަލަންޑަރުގެ ކޮންމެ ސަފްހާއަކުން ފެނިގެންދާނީ ސައިތަކުގައި އެކުލެވިގެންވާ މައި ރަހައިގެ ބާވަތެއް ކަމަށް ވެސް އުރީދޫއިން ބުންޏެވެ.
އުރީދޫގެ ސީއީއޯ އަދި އެމްޑީ ހާލިދު އަލް ހަމާދީ ވިދާޅުވީ އުރީދޫގެ މި އަހަރުގެ ޑެސްކް ކަލަންޑަރުގެ އިތުރުން ފާރުގައި އަޅުވާ ކަލަންޑަރާއި ޑިޖިޓަލް ކަލަންޑަރެއް ވެސް ވަނީ ތައާރަފްކޮށްފައި ކަމަށެވެ.
އުރީދޫއިން މި އަހަރަށް ހާއްސަކޮށްފައިވާ ކަލަންޑަރުގައި ހިމެނޭ ސައި ތައްޔާރުކުރަނީ -- ފޮޓޯ: ޝާފިއު / އަދަދު
މީގެއިތުރުން ޑެސްކް ކަލަންޑަރާއެކު ދިވެހި ރަހަތައް ހިމެނިފައިވާ ހާއްސަ ގްރީންޓީ ބްލެންޑެއްގެ ޓީ ކޭކެއް ހިމެނިފައިވާނެ ކަމަށް އޭނާ ވިދާޅުވި އެވެ. އެ ޓީ ކޭކުތައް އުފައްދާފައިވަނީ ގިނަ ދުވަސްވަންދެން ބޭނުން ކުރެވޭ ގޮތަށެވެ.
"އުރީދޫ މޯލްޑިވްސްގައި އަޅުގަނޑުމެން ގަބޫލުކުރާ ގޮތުގައި ގުޅުންތަކަކީ ހަމައެކަނި ޓެކްނޮލޮޖީގެ ޒަރީއާއިން ބަދަހިވާ އެއްޗެއް ނޫން. ސައި ބުއިމުގެ ސަގާފަތަކީ ދިވެހިން އެކަކު އަނެކަކާ ގުޅުން ބަދަހިވުމުގެ އެއް މެދުވެރިއެއް،" އެ ކުންފުނިން ބުންޏެވެ.
މުހިންމު ވަގުތުތަކުގައި އަދި އޮފީސް މަސައްކަތުގައިވިޔަސް، ރައްޓެހިން ނުވަތަ އާއިލާ އެއްވެލާ ވަގުތު ތަކުގައި ސައި ބުއިމަކީ ދިވެހިންގެ އާދަކާދައިގައި ހިމެނޭ މުހިންމު ކަމެއްކަން އުރީދޫއިން ފާހަގަކުރި އެވެ.
މި އަހަރުގެ ކަލަންޑަރަކީ ޑެސްކް، ފާރު އަދި ސްކްރީނުން ކޮންމެ ދުވަހެއްގެ އާދަކާދައިގެ ތެރޭގައި ހިމެނޭ ކަލަންޑަރަކަށް ވެގެންދާނެ ކަމަށް އުންމީދުކުރާ ކަމަށް އެ ކުންފުނިން ބުންޏެވެ.
