ހުލާސާކޮށް އިއްޔެ: ބަހާލި ބައެއް މަޝްރޫއުތައް ހެދި އިކޮނޮމިކް ކައުންސިލުން ހެދި އުސޫލަށް ވެސް ނުފެތޭ

Dec 2, 2025, 1:42 AM
ބަހާލި ޕްރޮޖެކްޓުތައް ހަވާލުކުރި ކުންފުނިތަކާއެކު ސޮއިކުރުމަށް ފަހު ރައީސް މުއިއްޒު އާއި ސަރުކާރުންގެ ވެރިން އެ ކުންފުނިތަކުގެ ވެރިންނާއެކު ފޮޓޯއަކަށް ހުއްޓިގެން. -- ފޮޓޯ: ރައީސް އޮފީސް

ބަހާލި ޕްރޮޖެކްޓުތައް ހަވާލުކުރި ކުންފުނިތަކާއެކު ސޮއިކުރުމަށް ފަހު ރައީސް މުއިއްޒު އާއި ސަރުކާރުންގެ ވެރިން އެ ކުންފުނިތަކުގެ ވެރިންނާއެކު ފޮޓޯއަކަށް ހުއްޓިގެން. -- ފޮޓޯ: ރައީސް އޮފީސް

ސަރުކާރު ހިންގާ ޕީއެންސީގައި އިސްކޮށް ހަރަކާތްތެރިވާ މީހުންނާ ގުޅުން ހުރި ކުންފުނިތަކަށް 2.7 ބިލިއަން ރުފިޔާގެ އަގުހުރި މަޝްރޫއުތައް ބަހާލީ، ސިންގަލް ސޯސް ޕްރޮކިޔުމަންޓު އުސޫލުގެ ދަށުން ޕްރޮޖެކްޓުތައް ހަވާލުކުރުމުގައި އިކޮނޮމިކް ކައުންސިލުން ގެންގުޅޭ އުސޫލާ ހިލާފަށް ކަމަށް އަދަދު އަށް މައުލޫމާތު ލިބިއްޖެ ކަމަށް އިއްޔެ ރިޕޯޓުކުރި އެވެ.

ހުޅުވާލާފައިވާ ބީލަމަކަށް ނުގޮސް، ސިންގަލް ސޯސް ޕްރޮކިޔުމަންޓު އުސޫލުގެ ދަށުން މަޝްރޫއުތައް ހަވާލުކުރުމުގައި އިކޮނޮމިކް ކައުންސިލުން އަމަލުކުރަން ޖެހޭ އުސޫލަކީ އާންމުކޮށް ފެންނަން އޮތް އުސޫލެއް ނޫނެވެ. ނަމަވެސް މި ނޫހަށް ވަނީ ސައްހަކަން ކަށަވަރުކުރެވިފައިވާ މި އުސޫލުގެ ދެލި ކޮޕީއެއް ލިބިފަ އެވެ.

އިކޮނޮމިކް ކައުންސިލުގެ މި އުސޫލަކީ މި އަހަރު އެކުލަވާލި އުސޫލެކެވެ. ބެލެވޭ ގޮތުގައި މި އުސޫލު އެކުލަވާލީ މާލިއްޔަތު ގަވާއިދު ބަދަލުކޮށް، ސިންގަލް ސޯސް އުސޫލުން ވަޒީރުންގެ މަޖިލީހުން ބޭނުން ބަޔަކަށް މަޝްރޫއުތައް ދެވޭނެ ގޮތަށް ހެދުމަށް ފަހުގަ އެވެ.

އޭރު ގެނައި ބަދަލުތަކުގެ ދަށުން ތިން ބާވަތެއްގެ މަޝްރޫއެއް ސިންގަލް ސޯސްކޮށް ދެވޭ ގޮތަށް ބަދަލުކުރި އެވެ. އެއީ:

  • އާންމު ރައްޔިތުންގެ އަސާސީ ބޭނުންތަކާ ގުޅޭ މަޝްރޫއު
  • ދިރިއުޅުމުގެ ފެންވަރު ރަނގަޅުކޮށްދޭ ބާވަތުގެ މަޝްރޫއުތައް
  • ސަލާމަތީ ހިދުމަތްތަކަށް ހާއްސަ މަޝްރޫއުތައް

މި ތިން ގިންތިކުުރުމުގެ ދަށުން ހިންގާ މަޝްރޫއުތަކުގެ މާނަ އޮތީ ވަރަށް ފުޅާކޮށެވެ. ޖުމްލަކޮށް ބުނާ ކަމުގައި ވަނީ ނަމަ، އެ އުސޫލުގެ ދަށުން ސަރުކާރުގެ ހަރަދުގައި ހިންގާ ހުރިހާ ބާވަތެއްގެ މަޝްރޫއުތައް ހަވާލުކުރެވެ އެވެ.

މިހެން ނަމަވެސް، އެ ފުޅާ މާނަކުރުމުގެ ތެރެއަށް ވެސް ބައެއް މަޝްރޫއުތައް ނުފެތޭ ކަމަށް، މި އުސޫލާ ގުޅިގެން އަދަދު އިން ވާހަކަ ދެއްކި މީހުން ބުނެފައި ވެ އެވެ. އޭގެ އެއް މިސާލަކީ 15 ރަށެއްގެ ސްކޫލުގެ ވަށާފާރު ރާނަން 15 މިލިއަން ރުފިޔާގެ އަގަކަށް ހަވާލުކުރި މަޝްރޫއު އެވެ.

ސޮލެކްސް ނަމަކަށް ކިޔާ ކުންފުންޏަކާ ހަވާލުކުރި މި މަޝްރޫއުގެ ސްކޯޕުގެ ތެރޭގައި ހިމެނެނީ ސްކޫލުތަކުގެ ވަށާފާރު ރޭނުން އެކަންޏެވެ. އިކޮނޮމިކް ކައުންސިލުގެ އުސޫލުގައި އޮތް ގޮތުން، މި މަޝްރޫއު ކިރިޔާ ވެސް ފެއްތެން އޮތީ، "ތައުލީމާއި، ސަގާފަތާއި، އަދަބިއްޔާތާއި، ފަންނުތައް ކުރިއެރުވުމާ ގުޅޭ މަޝްރޫއުތައް" ދަަށަަށެވެ.

ނަމަވެސް ވަށާފާރު ރޭނުން މި މާނަކުރުމުގެ ތެރެއަށް ފައްތަންޏާ، އުމްރާނީ މަސައްކަތެއްގެ ގޮތުގައި ނުހިމެނޭ ކަންކަން ވެސް، މިސާލަކަށް ސްކޫލުތަކަށް ކަރުދާސް ގަތުން ފަދަ އާދައިގެ ކަންކަން ވެސް، އިކޮނޮމިކް ކައުންސިލަށް ހަވާލުކުރެވޭނެ އެވެ.

ބަހާލި މަޝްރޫއުތައް އިކޮނޮމިކް ކައުންސިލުގެ އުސޫލުތަކަށް ފެތޭ ކަމާ މެދު ސުވާލު އުފެދޭ އަނެއް ސަބަބަކީ، އެ އުސޫލުގައި ފުރިހަމަ ކުރަން ޖެހޭ އިޖުރާއަތްތައް ފުރިހަމަ ކުރި ނަމަ، ބައެއް ކުންފުނިތައް ޓެކްނިކަލް އިވެލުއޭޝަނުން ފާސްވާނެ ގޮތެއް ނޯންނާނެތީ އެވެ. މި އިވެލުއޭޝަންތަކުގެ ތެރޭގައި ދައުލަތުގެ އޮފީސް ނުވަތަ ވުޒާރާއިން ހަދާ އިވެލުއޭޝަންގެ އިތުރުން، ރައީސް އޮފީހުގައި އޮންނަ ތިން މެންބަރުންގެ ކޮމިޓީއަކުން ހަދާ ފަންނީ އެސެސްމެންޓު ހިމެނެ އެވެ.

ބީލަމަކަށް ނުލައި އިކޮނޮމިކް ކައުންސިލްގެ ނިންމުމެއްގެ މައްޗަށް ނޮވެމްބަރު 6 ވަނަ ދުވަހު ބަހާލި 206 މަޝްރޫއު 53 ކުންފުންޏަކާ ހަވާލުކުރިއިރު، އެ މަޝްރޫއުތަކުގެ އަގު 2.7 ބިލިއަން ރުފިޔާ އަށް އަރައެވެ. އެއީ ކޮންޓްރެކްޓަ ފައިނޭންސްގެ އުސޫލުން ހިންގާ މަޝްރޫއުތަކެއް ކަމަށް ސަރުކާރުން ބުނެ އެވެ. ނަމަވެސް އެ މަޝްރޫއުތަކަށް ބޭންކު އޮފް މޯލްޑިވްސް މެދުވެރިކޮށް، ލޯނު ހަމަޖައްސައިދެނީ، އަދަދު ނޫހަށް އެނގިފައިވާ ގޮތުގައި ސަރުކާރުން ދޭ ޔަގީން ކަމެއްގެ މައްޗަށެވެ.

ބީއެމްއެލްއިން ލޯނު ދޫކުރަން ތައްޔާރުވަނީ ހާމަކަމެއް ނެތި ކޮރަޕްޝަން ހިމެނޭ ކަމަށް ތުހުމަތު ކުރެވޭ މަޝްރޫއުތަކަކަށެވެ. އަދި މަޝްރޫއުތައް ހަވާލުކުރި ކުންފުނިތަކުގެ ތެރޭގައި އެފަދަ މަޝްރޫއުއަކަށް ޝަރުތު ހަމަ ނުވާ ކުންފުނިތަކާއި އުވާލުމުގެ މަރުހަލާގައި ހުރި ކުންފުނިތަކާއި، އިމާރާތްކުރުމުގެ އެއްވެސް ތަޖުރިބާއެއް ނެތް އަދި މާލީ ގާބިލްކަމެއް ވެސް ނެތް ކުންފުނިތައް ހިމެނެ އެވެ.

މުހިއްމު ބައެއް ހަބަރު

ކޮމެންޓް

ފަހުގެ ޚަބަރު

ދިރާގު ރޯޑް ރޭސް 5،500އަށްވުރެ ގިނަ ދުވުންތެރިންނާއެކު ބާއްވައިފި

ދިރާގު މޯލްޑިވްސް ރޯޑް ރޭހުގެ 17 ވަނަ އެޑިޝަން 5،500 އަށްވުރެ ގިނަ ދުވުންތެރިންނާއެކު ހުޅުމާލެ ސެންޓްރަލް ޕާކުގައި ވަނީ ބާއްވާފައެވެ. މި ދުވުމުގެ ލައިވް އަޕްޑޭޓްތަކާއި، ނަތީޖާ އަދި ދުވުންތެރިންގެ ރޭންކިންގ ބަލައިލުމުގެ ފުރުސަތު ދިރާގުން ވަނީ ޚާއްޞަ މޮބައިލް އެޕްލިކޭޝަނެއް މެދުވެރިކޮށް ފަހިކޮށްދީފައެވެ.

ޕީއެންސީގެ މެންބަރުންގެ އަދަދު ލައްކައަކަށްވުރެ ދަށަށް

ސަރުކާރު ހިންގާ ޕީއެންސީގެ މެންބަރުންގެ އަދަދު އެއްލައްކައަށް އެރިތާ 24 ގަޑިއިރު ނުވަނީސް، އަލުން އެ އަދަދު ލައްކައަކަށް ވުރެ ދަށަށް ގޮސްފިއެވެ. އިދިކޮޅު ފަރާތްތަކުން ތުހުމަތުކުރާ ގޮތުގައި މި އަދަދު ހަމަކުރުމަށްޓަކައި ވަޒީފާގެ ބިރުދެއްކުމާއި ރިޝްވަތުގެ ގޮތުގައި ފައިސާ ބޭނުންކޮށްފައިވެއެވެ. އީސީގެ ތަފާސްހިސާބުތަކުން ދައްކާގޮތުގައި އެ ޕާޓީގެ މެންބަރުންގެ އަދަދު މިހާރު ވަނީ 99,930 އަށް ތިރިވެފައެވެ.

ރަސްމާލޭގެ ޑީލުގައި ސޮއިނުކުރަން އެދި އަލައްބާރަށް ސިޓީއެއް

ރަސްމާލެ މަޝްރޫއުގެ މިހާރުގެ ޝަރުތުތަކާއި ގާނޫނުއަސާސީއާ ފުށުއެރުންތަކެއް ހުރި ކަމަށާއި، އެކަމުގައި އެކަށީގެންވާ ގޮތެއްގައި ރައްޔިތުންގެ ހިޔާލު ހޯދާފައި ނުވާތީ، ދެން އަންނަ ސަރުކާރަކުން ވެސް މި މަޝްރޫއުގެ އެއްބަސްވުން އަލުން މުރާޖައާކުރުމަށް ނުވަތަ އެއްކޮށް ބާތިލުކުރުމުގެ ފުރުސަތު އޮތް ކަމަށް އެ ސިޓީގައި ބުނެފައިވޭ.

"ރަސްމާލެ މައްސަލައިގައި މުއިއްޒު ވަނީ އަނގަވަތަށް ވެއްޓިފައި"

ރަސްމާލެ މަޝްރޫއަކީ ރާއްޖޭގެ ސިޔާދަތަށް އުނިކަންލިބޭ، ބޭރުގެ ފަރާތްތަކަށް ބިން ދިނުމަށް ހިންގާ ހީލަތްތެރި ރޭވުމެއް ކަމަށް ވިދާޅުވެ ކުރީގެ ރައީސް ޔާމީން ސަރުކާރަށް ވަރަށް ބޮޑަށް ފާޑުވިދާޅުވެއްޖެއެވެ. މި މަޝްރޫއުގެ ސަބަބުން ރައީސް މުއިއްޒު ރައްޔިތުންގެ ކުރިމަތީގައި ބޭޒާރުވެފައިވާ ކަމަށާއި، މި ސަރުކާރަށް ދެވަނަ ދައުރެއް ރައްޔިތުން ނުދޭނެ ކަމަށް ޔާމީން ވިދާޅުވިއެވެ.

ރަސްމާލެ ދޫކޮށްލުމާ ދެކޮޅުވެރިކަމެއް ނެތްކަމުގެ އިޝާރާތެއް

ރަސްމާލެއިން ބައެއް ބޭރުގެ ކުންފުންޏަކަށް ދޫކޮށްލުމާ ދެކޮޅު ހަދަނީ މަދު ބަޔަކު ކަމަށާއި، ދިވެހިން އަބަދުވެސް އިސްކުރަނީ ގައުމީ ތަރައްގީކަން މުއިއްޒު ފާހަގަކުރެއްވި. މީގެކުރިންވެސް ރާއްޖެއަށް އައި ބޮޑެތި ބަދަލުތަކާ ބައެއް މީހުން ދެކޮޅު ހެދި ނަމަވެސް، ގިނަ ރައްޔިތުން ތާއީދުކުރީ ގައުމީ ކުރިއެރުމަށްކަން އެމަނިކުފާނު ބަޔާންކޮށްދެއްވި.

ހުލާސާކޮށް އިއްޔެ: ސިޔާސީ ޕާޓީތަކުގެ ދަފްތަރަށް އައި ބޮޑު ބަދަލު

ޕީއެންސީގެ މެންބަރުންގެ އަދަދު އެއްލައްކައަށް އެރުމާއެކު، ޖުމްހޫރީ ޕާޓީ އާއި އަދާލަތު ޕާޓީ ފަދަ ދުވަސްވީ ޕާޓީތަކުން ގިނަ އަދަދެއްގެ މެންބަރުންނާއި އިސް ބޭފުޅުން ވަނީ ވަކިވެފައެވެ. މީގެ އިތުރުން، ރަސްމީ ޖަލްސާތަކުގެ ޕްރޮޓޮކޯލަށް ބަދަލުތަކެއް ގެނެސްފައިވާއިރު، ރަސްމާލެ މަޝްރޫއާ ގުޅޭގޮތުން އިލްމުވެރިންނާއި ސިޔާސީ ފަރާތްތަކުގެ މެދުގައި ވަނީ ޚިޔާލުތަފާތުވުންތަކެއް އުފެދިފައެވެ.

ވަޒީފާގެ ބިރުދައްކައިގެން އެއްލައްކަ މެންބަރުން ހަމަކޮށްފި

ސަރުކާރު ހިންގާ ޕީއެންސީގެ މެންބަރުންގެ އަދަދު އެއްލައްކައަށް އަރާފައިވާއިރު، މިއީ ވަޒީފާގެ ބިރުދައްކައިގެންނާއި ރިޝްވަތު ދީގެން ހޯދި އަދަދެއް ކަމަށް ވަނީ ތުހުމަތުކުރެވިފައި. އިލެކްޝަންސް ކޮމިޝަނުގެ ދަފްތަރުން ދައްކާގޮތުގައި މިދިޔަ އަހަރާ އަޅާބަލާއިރު އެ ޕާޓީގެ މެންބަރުންގެ އަދަދު ވަނީ 26،000 އަށްވުރެ އިތުރުވެފައި.

Newsletter

Get the latest news delivered straight to your inbox