ލަންޑަން (ޑިސެމްބަރު 1) - އިނގިރޭސި ޕްރިމިއާ ލީގުގައި މިރޭ މެންޗެސްޓާ ޔުނައިޓެޑާއި ލިވަޕޫލުން ކުޅުނު މެޗުތަކުން މޮޅުވިއިރު، އާސެނަލާއި ޗެލްސީން ބައްދަލުކުރި މެޗު 1-1 އިން އެއްވަރުވެއްޖެ އެވެ.
މެންޗެސްޓާ ޔުނައިޓެޑުން ރަށުންބޭރުގައި ފަހަތުން އަރައި 2-1 އިން ކްރިސްޓަލް ޕެލަސް ބަލިކުރިއިރު، ވެސްޓް ހޭމް ޔުނައިޓެޑް ދަނޑުގައި ލިވަޕޫލް މޮޅުވީ 2-0 އިންނެވެ.
އާސެނަލުން ލީގުގެ އެއް ވަނައިގައި އޮތީ ފަސް ޕޮއިންޓުގެ ލީޑަކާ އެކު އެވެ. އެއީ، 13 މެޗުން 30 ޕޮއިންޓް ހޯދައިގެންނެވެ. ދެ ވަނައިގައި އޮތް މެންޗެސްޓާ ސިޓީ އަށް 13 މެޗުން 25 ޕޮއިންޓް ލިބިފައިވާއިރު، ތިން ވަނައިގައި އޮތް ޗެލްސީ އާއި ހަތަރު ވަނައިގައި އޮތް އެސްޓަން ވިލާ އަށް ވަނީ 13 މެޗުން 24 ޕޮއިންޓް ލިބިފަ އެވެ. އެސްޓަަން ވިލާ އިން ވަނީ 1-0 ވުލްވްސް ބަލިކޮށްފަ އެވެ.
ފަސް ވަނައިގައި އޮތް ބްރައިޓަން އިން 2-0 އިން ނޮޓިންހަމް ފޮރެސްޓް ބަލިކޮށް ފަސް ވަނައިގައި އޮތީ ހަ ވަނައިގައި އޮތް ސަންޑަލެންޑާ އެއްވަރަށް 13 މެޗުން 22 ޕޮއިންޓާ އެކު އެވެ. އަދި، ހަތް ވަނައިގައި އޮތް ޔުނައިޓެޑާއި އަށް ވަނައިގައި އޮތް ލިވަޕޫލަށް ވަނީ 13 މެޗުން 21 ޕޮއިންޓް ލިބިފަ އެވެ.
ޕެލަސް ދަނޑުގައި އެ ޓީމުން ފުރަތަމަ ހާފުގައި ލީޑުނެގީ، ޖިއަން ފިލީޕް މަޓޭޓާ ޖެހި ގޯލުންނެވެ. އަދި، ޔުނައިޓެޑުން ދެ ވަނަ ހާފުގައި ނަތީޖާ އަނބުރާލިއިރު، ލަނޑުތައް ޖެހީ ޖޯޝުއާ ޒާކްޒީ އާއި މޭސަން މައުންޓް އެވެ.
ލިވަޕޫލުން މުހައްމަދު ސަލާހު ބެންޗުގައި ބައިންދައިގެން ކުޅުނު މި މެޗުގައި، އެ ޓީމުގެ ލަނޑުތައް ޖެހީ ދެ ވަނަ ހާފުގަ އެވެ. އެ ގޮތުން، ލިވަޕޫލުން ލީޑުނެގީ ކޯޑީ ގަކްޕޯ ދިން ބޯޅައަކުން އަލެކްސަންޑަ އިސާކް ޖެހި ގޯލުންނެވެ. މިއީ، 150 މިލިއަން ޑޮލަރުގެ ޕެކޭޖެއްގައި ލިވަޕޫލާ ގުޅުނު ފަހުން ލީގުގައި އިސާކް ޖެހި ފުރަތަމަ ގޯލެވެ.
ވެސްޓް ހޭމްގެ ލޫކަސް ޕަކޭޓާ އަށް ދެ ވަަނަ ރީނދޫ ކާޑާ އެކު ރަތް ކާޑެއް ދެއްކުމުން، އެ ޓީމުގެ އެއް ކުޅުންތެރިއަކު މަދުވުމުގެ ފައިދާނަގައި، ލިވަޕޫލުން ވަނީ އިތުރު ލަނޑެއް ޖަހައިފަ އެވެ. އިތުރު ވަގުތުގެ ދެ ވަނަ މިިނިޓްގައި މި ލަނޑު ޖެހީ ގަކްޕޯ އެވެ.
އާސެނަލުން އެ ޓީމުގެ އެންމެ މުހިންމު ދެ ޑިފެންޑަރުން ކަމަށްވާ ގަބްރިއެލް މަގާޅައެސް އާއި ވިލިއަމް ސަލީބާ، އަނިޔާގެ ސަބަބުން ނުލައި ކުޅެން ޖެހުނު މެޗުގައި، ޗެލްސީ އަށް ދިމާވި މައްސަލަ އަކީ މެޗުގެ ބޮޑުބައި ކުޅުންތެރިއަކު މަދުކޮށް ކުޅެން ޖެހުމެވެ. އެ ގޮތުން، ފުރަތަމަ ހާފުގައި ޗެލްސީގެ މޮއިސަސް ކައެސޭޑޯ އަށް ވަނީ މިކޭލް މެރީނޯ އަށް ކުރި ނުރައްކާތެރި ފައުލަކަށް ރަތް ކާޑެއް ދައްކައިފަ އެވެ. ފުރަތަމަ ރީނދޫ ކާޑެއް ދެއްކި ނަމަވެސް، ވީޑިއޯ އެސިސްޓަންޓް ރެފްރީ (ވީއޭއާރް) އިން އަންގައިގެން، މޮނީޓަރުން ބަލައިފައި، ރަތް ކާޑަކަށް ބަދަލުކުރީ އެވެ.
ޗެލްސީން ކުޅުންތެރިއަކު މަދުކޮށް ކުޅެން ޖެހުނުއިރު، ދެ ވަނަ ހާފުގެ ތިން ވަނަ މިނިޓްގައި ލީޑުނެގީ ރީސް ޖޭމްސް ތަނަވަސްކޮށްދިން ފުރުސަތެއްގައި ޓްރެވޯ ޗަލޯބާ ޖެހި ގޯލުންނެވެ. އަދި، އާސެނަލުން އެއްވަރުކުރީ، ބުކާޔޯ ސަކާ ނަގައިދިން ބޯޅައަކުން މެރީނޯ ބޮލުން ޖެހި ގޯލުންނެވެ.
