މިލާން (ނޮވެމްބަރު 30) - ރަފައެލް ލެއާއޯ ޖެހި ހަމައެކަނި ގޯލުން ލާޒިއޯގެ މައްޗަށް 1-0 އިން ކުރިހޯދައި، އޭސީ މިލާނުން އިޓާލިއަން ލީގުގެ އެއް ވަނަ އަށް ޖެހިލައިފި އެވެ.
މި ނަތީޖާއާ އެކު މިލާނުން އެއް ވަނައިގައި އޮތީ 13 މެޗުން 28 ޕޮއިންޓް ހޯދައިގެންނެވެ. ދެ ވަނައިގައި އޮތް ރޯމާ އަށް 12 މެޗުން 27 ޕޮއިންޓް އަދި ތިން ވަނައިގައި އޮތް އެންމެ ފަހުގެ ޗެމްޕިއަން، ނަޕޯލީ އަށް ވަނީ 12 މެޗުން 25 ޕޮއިންޓް ލިބިފަ އެވެ. މިރޭ، ލީގުގައި ނަޕޯލީ އާއި ރޯމާ އިން ބައްދަލުކުރާނެ އެވެ. ލީގުގެ ހަތަރެއްގައި އިންޓަ މިލާނުން އޮތީ 13 މެޗުން 24 ޕޮއިންޓާ އެކު އެވެ. އިންޓަ އިން މިރޭ ކުޅޭނީ ޕީސާއާ އެވެ.
އަމިއްލަ ދަނޑުގައި ރޭ މިލާނުން ލާޒިއޯއާ ދެކޮޅަށް ކުޅެން ޖެހުނީ އުނދަގޫ މެޗެކެވެ. މި ސީޒަނުގައި ރަނގަޅު ފޯމެއްގައި ކުޅެމުން އަންނަ ލާޒިއޯ އިން ވަނީ ފުރަތަމަ ހާުފުގައި ރަނގަޅަށް ޑިފެންސްކޮށް އެޓޭކްކުރަން ލިބުނު ފުރުސަތުތަކުގައި މިލާނަށް ޕްރެޝަރުކޮށްފަ އެވެ.
މެޗުގައި ފެނިގެންދިޔަ ހަމައެކަނި ލަނޑު މިލާނަށް ޖަހައިދިނީ، ދެ ވަނަ ހާފު ފެށިގެން ހަ ވަނަ މިނިޓްގައި ލެއާއޯ އެވެ. މެޗުގެ 51 ވަނަ މިނިޓްގައި ލެއާއޯ މި ލަނޑު ޖެހީ އެ ޓީމުގެ ޑިފެންޑަރު، ފިކާޔޯ ޓޮމޯރީ ތަަނަވަސްކޮށްދިން ފުރުސަތެއްގަ އެވެ. މިއީ، މި ފަހަރު ލީގުގައި ލެއާއޯ ޖެހި ފަސް ވަނަ ގޯލެވެ.
މެޗުގެ އިތުރު ވަގުތުގެ ތެރޭގައި މިލާންގެ ކޯޗު މެސިމޯ އަލެގްރީ އަށް ވަނީ ރަތް ކާޑެއް ދައްކައިފަ އެވެ.
ލީގުގައި ރޭ ޔުވެންޓަސް އިން ވަނީ ފަހަތުން އަރައި 2-1 އިން ކަލިއަރީ ބަލިކޮށްފަ އެވެ. ސަބެސްޓިއާނޯ އެސްޕޮސީޓޯގެ ގޯލުން ކަލިއަރީ ލީޑުނެގި މި މެޗުގައި ޔުވެންޓަސްގެ ދެ ގޯލު ވެސް ޖެހީ ތުރުކީގެ ތަރި، ކެނާން ޔިލްޑިޒް އެވެ.
