ވާނުވާ ބަންދު އުވާލަން ގޮވާލައި ސޯޝަލް މީޑިއާ އާއި ރާއްޖޭގެ އެކި ހިސާބުތަކުގައި ބޮޑު ކެމްޕޭނެއް

 ވާނުވާ ބަންދު އުވާލަން ގޮވާލައި ސޯޝަލް މީޑިއާ އާއި ރާއްޖޭގެ އެކި ހިސާބުތަކުގައި ބޮޑު ކެމްޕޭނެއް

ވާނުވާ ބަންދުގައި ތިބި މީހުންގެ ހައްގުތަކަށް ވަކާލާތުކޮށް، ވާނުވާ ބަންދު އުވާލަން ގޮވާލައި ބޮޑު ކެމްޕޭނެއް ފަށައިފި އެވެ.

ފާއިތުވި ހަފުތާއެއްހާ ދުވަހުގެ ތެރޭގައި ސޯޝަލް މީޑިއާގައި ވާނުވާ ބަންދު އުވާލަން ގޮވާލާ އެތައް ހާސް ޕޯސްޓެއް ވަނީ ކޮށްފަ އެވެ. މިދިޔަ ހަފުތާއެއްހާ ދުވަހު އެކްސް ގައި ރާއްޖޭގެ އެއްވަނަ ޓްރެންޑަކަށް ވެސް އޮތީ ވާނުވާ އުވާލަން ގޮވާލަން ބޭނުންކުރަމުންދިޔަ ހޭޝްޓެގް އެވެ.

ސޯޝަލް މީޑިއާގެ އިތުރުން، ވާނުވާ ބަންދު އުވާލަން ގޮވާލައި މާލެ ސަރަހައްދާއި ރާއްޖޭގެ އެކި ހިސާބުތަކުގެ އިމާރާތްތަކާއި ފާރުތަކުގައި އަދި ބޯޑު ތަކުގައި ވެސް ވަނީ ލިޔުންތައް ލިޔެފަ އެވެ. މާލޭގެ މަގުމަތިން ވެސް އެ މަންޒަރުތައް މިހާރަކަށް އައިސް ވަރަށް ގިނައިން ފެނެ އެވެ.

އަދި، ވާނުވާ ބަންދު އުވާލާނެ ކަމަށް ވިދާޅުވެ ރައީސް މުހައްމަދު މުއިއްޒު ވެވަޑައިގެންނެވި ވައުދު ހަދުމަކޮށްދިނުމަށް ސޯޝަލް މީޑިއާގައި ކުރަމުންދާ ޕޯސްޓުތަކާއި ފާރުތަކުގައި ލިޔާ ލިޔުންތައް ވެސް މިދިޔަ ދެތިން ހަފުތާ ވަނީ އިތުރުވެފަ އެވެ.

މި ކެމްޕޭނުގައި އެކި މައްސަލަތަކުގައި ވާނުވާ ބަންދުގައި ތިބި މީހުންގެ އާއިލާ ތަކާއި ރަހުމަތްތެރިން އަދި އެ މީހުންގެ ހައްގުގައި ވަކާލާތުކުރާ މީހުން ދަނީ ބައިވެރިވަމުންނެވެ. އެ މީހުން އާއިލާތަކުގެ މެސެޖުތަކާއި ވާހަކަތައް ވެސް ސޯޝަލް މީޑިއާގައި ދަނީ ހިއްސާކުރަމުންނެވެ.

ޕްރޮސެކިއުޓާ ޖެނެރަލްގެ އޮފީސް (ޕީޖީ) އިން އާންމުކުރި ތަފާސްހިބުތަކުން ދައްކާ ގޮތުގައި ޖެނުއަރީ 20، ގެ ނިޔަލަށް ޝަރީއަތް ނިމެންދެން ބަންދު ކޮށްފައި ނުވަތަ ވާނުވާ ބަންދުގައި ތިބީ 435 މީހެކެވެ. މީގެ ތެރެއިން، ތެރެއިން 364 މީހުން މޯލްޑިވްސް ކަރެކްޝަނަލް ސާވިސްގެ ބެލުމުގެ ދަށުގައި ތިބިއިރު، ރިމާންޑް ޖަލަށް ބަދަލު ނުކުރެވި ފުލުހުންގެ ބެލުމުގެ ދަށުގައި މިވަގުތު 71 މީހުން އެބަތިއްބެވެ.

ވާނުވާ މައްސަލައަށް ހައްލެއް ގެނައުމަށް ކަމަށް ބުނެ މި ސަރުކާރުން ވަނީ އެއް ފުރުސަތު ދިނުމަށް އިލެކްޓްރޯނިކް މޮނިޓަރިން ނިޒާމެއްގެ ދަށުން އިލެކްޓްރޯނިކް ޓެގު އަޅުވާފައި ދޫކޮށްލުމުގެ މަސައްކަތް ފަށާފަ އެވެ. ނަމަވެސް މިހާތަނަށް އެ އުސޫލުގެ ދަށުން ދޫކުރީ އެންމެ 10 މީހެކެވެ.

ޝަރީއަތް ނިމެންދެން ބަންދު ކޮށްފައި ތިބި މީހުން ކުށުގެ ބާވަތުން: ޖެނުއަރީ 20، 2025 ގެ ނިޔަލަށް

  • މަސްތުވާތަކެތީގެ މައްސަލަތައް - 112 މީހުން (30.8 ޕަސަންޓް)
  • ކުޑަކުދިންނަށް ކުރާ ޖިންސީ ގޯނާގެ މައްސަލަތައް -96 މީހުން (26.4 ޕަސަންޓް)
  • ގޭންގް މާރާމާރީ މައްސަލަތައް - 79 މީހުން (21.7 ޕަސަންޓް)
  • މަރުގެ މައްސަލަތައް - 29 މީހުން (8 ޕަސަންޓް)
  • ޓެރެރިޒަމްގެ މައްސަލަތައް - 17 މީހުން (4.7 ޕަސަންޓް)
  • ޖިންސީ ގޯނާގެ މައްސަލަތައް - 13 މީހުން (3.6 ޕަސަންޓް)
  • މަނީ ލޯންޑްރިން މައްސަލަތަކާއި އެހެނިހެން މައްސަލަތައް - ފަސް މީހުން (1.4 ޕަސަންޓް)

ކަރެކްޝަންސްގެ ބަންދުގައި 364 މީހުން ހޭދަކުރި މުއްދަތު: ޖެނުއަރީ 20، 2025 ގެ ނިޔަލަށް

  • ހަ އަހަރަށްވުރެ ގިނަ - 5 ފަސް މީހުން (1.1 ޕަސަންޓް)
  • ފަސް އަހަރާއި ހަ އަހަރާ ދެމެދު - 8 މީހުން (2.2 ޕަސަންޓް)
  • ހަތަރު އަހަރާއި ފަސް އަހަރާ ދެމެދު - 24 މީހުން (6.6 ޕަސަންޓް)
  • ތިން އަހަރާއި ހަތަރު އަހަރާ ދެމެދު - 38 މީހުން (10.4 ޕަސަންޓް)
  • ދެ އަހަރާއި ތިން އަހަރާ ދެމެދު - 67 މީހުން (18.4 ޕަސަންޓް)
  • އެއް އަހަރާއި ދެ އަހަރާ ދެމެދު - 92 މީހުން (25.3 ޕަސަންޓް)
  • އެއް އަހަރަށްވުރެ ކުރު - 131 މީހުން (36 ޕަސަންޓް)

ވާނުވާ ބަންދުގެ މައްސަލަ ހައްލު ނުވާތީ މި ފަހުން ރައްޔިތުންގެ މަޖިލީހުގައި ވެސް ކަންބޮޑުވުން ފާޅުކުރި އެވެ.

ހެއްކާ ބެހޭ ގަނޫނަށް ސަރުކާރުން ހުށަހެޅި އިސްލާހުތަކަށް ބަހުސް ކުރައްވަމުން ވާނުވާ ބަންދުގެ މައްސަލައަށް ހައްލު ނުލިބޭތީ ކަންބޮޑުވުން އެންމެ ފުރަތަމަ ފާޅު ކުރެއްވީ ވެލިދޫ ދާއިރާގެ މެންބަރު، މުހައްމަދު އައްބާސް އެވެ.

"ރައީސް ޑރ. މުހައްމަދު ރައީސްގެ ވެރިކަމަށް ދެ އަހަރުވާންދާއިރު، ވާނުވާގައި ތިއްބެވި ބޭފުޅުން ވާނުވާގައި ތިބުމުގެ ސަބަބުން އެ އާއިލާތައް އެ ދަނީ ވަރަށް ހިތްދަތިކަން ތަހަންމަލު ކުރަމުން އިއްޒަތްތެރި ރައީސް،" އައްބާސް ވިދާޅުވި އެވެ.

އެކަމާ ގުޅޭ ގޮތުން ކަންބޮޑުވުން ފާޅުކުރައްވަމުން ގަލޮޅު ދެކުނު ދާއިރާގެ މެންބަރު، މީކާއިލް އަހުމަދު ނަސީމް ވިދާޅުވީ މި ސަރުކާރުގެ އެންމެ ބޮޑު އެއް ވައުދު ކަމަށްވާ ޝަރީއަތް ނިމެންދެން ބަންދުކޮށްފައި ބޭތިއްބުމުގެ މައްސަލައަށް ހައްލެއް ހޯދުމަށް ފެންހިފޭ އެއްވެސް މަސައްކަތެއް ކުރެވިފައި ނުވާ ކަމަށެވެ.

"މިކަމަށް ހައްލު ހޯދައިދޭނެ ކަމަށް ވިދާޅުވެ ރިޔާސީ ބޮޑު ވައުދަކައިގެން ވަޑައިގެންނެވި ސަރުކާރަކަށް، އިއްޒަތްތެރި ރައީސް، ވަޑައިގެންނެވި ރައީސުލްޖުމްހޫރިއްޔާއަށް ނޮވެމްބަރު 17، ގައި ދެ އަހަރު ވެގެންދާއިރު، އަދި މި މައްސަލައިގައި ހަމަ ފެންހިފޭ އެއްކަމެއް ވެސް ކުރެވިފައި ނުވާކަން އަޅުގަނޑު ފާހަގަކުރަން،" މީކާއިލް ވިދާޅުވި އެވެ.

ކޮމެންޓް

ފަހުގެ ޚަބަރު

ރަސްމާލޭގެ ބަދަލު ދޭނީ މެންބަރުންނާއި ވެރިންގެ މުދަލުން: ފައްޔާޒު

ފައްޔާޒު ވަނީ މި މަޝްރޫއަށް މަގުފަހިކުރަން ހުށަހަޅާފައިވާ ބިލަކީ ގާނޫނުއަސާސީއާ ހިލާފަށް، ބޭރުގެ ފަރާތްތަކަށް ރާއްޖޭގެ ބިންތައް ދާއިމީކޮށް މިލްކުވާ ގޮތަށް އޮތް ބިލެއް ކަމަށް ވިދާޅުވެފަ. އަދި މިނިވަން ކޯޓެއް އޮތް ނަމަ ވުޖޫދުކުރަން އުޅޭ ގާނޫނާއީ ބިލު ވެސް ބާތިލުކުރާނެ ކަމަށް އޭނާ ވިދާޅުވި.

ކްރެކް ނުކުރެވިގެން ޖުމާންގެ ފޯނު ރާއްޖެއިން ބޭރަށް ފޮނުވަނީ

ޓެރަރިޒަމްގެ ތުހުމަތުގައި ހައްޔަރުކުރި އަލީ ޖުމާންގެ ފޯނު ހުޅުވަން އޭނާ އިންކާރުކުރުމުން، އެ ފޯނު ތަހުލީލުކުރުމަށް ރާއްޖެއިން ބޭރަށް ފޮނުވުމުގެ މަސައްކަތް ފުލުހުން ދަނީ ކުރަމުން. ސޯޝަލް މީޑިއާގައި ހުޅުޖެހުމަށާއި މުދަލަށް ގެއްލުންދޭން ހިތްވަރުދިން ކަމުގެ ތުހުމަތު އޮތް ޖުމާން، ބަންދުގައި ބެހެއްޓުމަށް ކޯޓުން ވަނީ އިތުރު 15 ދުވަސް ދީފަ.

މިއީ މިހާރު ހަމަ ކާޓޫނަކަށް ވެއްޖެ: ނަޝީދު

ނަޝީދު ވަނީ މި މައްސަލައިގައި ސަރުކާރަށް ފާޑުވިދާޅުވަމުން ވެރިކަމަށް ވަޑައިގަތީ ރައީސް ޔާމީންގެ ނަންފުޅު ބޭނުންކުރައްވައިގެން ކަމަށާއި، ނަމަވެސް މިހާރު ޔާމީނާއި ތަޖުރިބާކާރު ބޭފުޅުން އެއްކައިރިކޮށްފައިވާ ކަމަށް ވެސް ތުހުމަތުކުރައްވާފަ.

ނުރައްކާވާ މިންވަރަށް އުތުރާއި މެދުރާއްޖެއަށް ދުންފުހުގެ އަސަރު

ސިއްހަތަށް ނުރައްކާވާ މިންވަރަށް މާލެއާއި ކުޅުދުއްފުއްޓަށް ދުންފުނީގެ އަސަރުކޮށް، ވައި ނުސާފުވެފައިވާތީ ރައްކާތެރިކަމުގެ ފިޔަވަޅުތައް އެޅުމަށް އެޗްޕީއޭއިން ވަނީ އިލްތިމާސްކޮށްފައި. މެޓް އޮފީހުން ލަފާކުރާ ގޮތުގައި ކުރިއަށް އޮތް ދުވަސްތަކުގައިވެސް ރާއްޖޭގެ އެކި ސަރަހައްދުތަކަށް ދުންފުނީގެ އަސަރު ފޯރާނެ.

އީގަލް ހިލްސްއާއެކު ސޮއިކުރި ކޮމާޝަލް ޓާމްސް އެގްރީމެންޓެއް ނެތް

މި މައުލޫމާތު ހޯދަން "އަދަދު" ނޫހުން އެދުމުން މިނިސްޓްރީން ޖަވާބު ދިނީ އެއީ އެ މިނިސްޓްރީން ބަލަހައްޓާ މައުލޫމާތު ނޫން ކަމަށާއި، މަޝްރޫއުގެ މައިގަނޑު އެއްބަސްވުމުގައި އަދި ސޮއިނުކުރާ ކަމަށް ބުނެ އެވެ.

ނޮވެމްބަރު 26، ގައި އެމްޑީޕީން މަގުމައްޗަށް ނުކުންނަނީ

ރަސްމާލެ މަޝްރޫޢުގެ ބޮޑު ބައެއް ބޭރު ކުންފުންޏަކަށް ދޫކޮށްލުމާ ގުޅޭގޮތުން ރައްޔިތުންގެ ފެންނަ ނުފެންނަ ވޯޓެއް ނެގުމަށް ގޮވާލައި، މި މަހުގެ 26 ގައި މަގުމައްޗަށް ނުކުމެ އިހުތިޖާޖުކުރަން އެމްޑީޕީން ވަނީ ނިންމާފައި. އެ ޕާޓީން ބުނާގޮތުގައި މި މަޝްރޫޢަކީ ރައްޔިތުންނަށް ސާފުނުވާ ގިނަ ކަންތައްތަކެއް ހުރި މަޝްރޫއެއް.

މުއިއްޒު އަންނަ މަހު ބަންގްލަދޭޝްއަށް ވަޑައިގަންނަވަނީ

ރައީސް މުޙައްމަދު މުޢިއްޒު އަންނަ ޑިސެމްބަރު މަހުގެ 13 ވަނަ ދުވަހު ބަންގްލަދޭޝްއަށް ފުރަމާނަ ދަތުރުފުޅެއް ކުރެއްވުމަށް ވަނީ ހަމަޖެހިފައެވެ. ތިން ދުވަހުގެ މި ދަތުރުފުޅުގައި ދެ ގައުމުގެ ގުޅުން ބަދަހިކުރުމަށާއި، ރާއްޖޭގައި އުޅޭ ބަންގްލަދޭޝް މަސައްކަތްތެރިންގެ ހައްގުތަކާ ގުޅޭގޮތުން މަޝްވަރާކުރުމަށް ވަނީ ރޭވިފައެވެ.

Newsletter

Get the latest news delivered straight to your inbox