ކްލަބް މޯލްޑިވްސް އިން ޕްރައިވެޓް ކުންފުނިތަކަށް ހާއްސަކޮށް މުޅިން އަލަށް ފެށި ފުޓްސަލް މުބާރާތް، މައިލޯ ސެކްޓާ ލީގުގައި އާރްސީސީ، ހޯކްސް، ސޮނީ ހާޑްވެއާ އަދި ކްލަބް ލޮކަލްޗާ އިން ކުޅުނު ދެ ވަނަ މެޗުތަކުން ވެސް މޮޅުވެއްޖެ އެވެ.
ގްރޫޕް އޭގައި ހޯކްސް އިން ކުޅުނު ދެ ވަނަ މެޗުން މޮޅުވީ ރެއިންބޯ ރެކްރިއޭޝަން ކްލަބް އަތުން 5-0 އިންނެވެ. މި މެޗުގައި ހޯކްސްގެ ލަނޑުތައް ޖެހީ، ކިރްގިސްތާންގެ ޒަނަރްބެކް ހެޓްރިކެއްގެ އިތުރުން މުހައްމަދު އަނީލް އާއި މުހައްމަދު ނާއިމް އެވެ. މި ގްރޫޕްގެ އަނެއް މެޗުން، ލިއޯ އެފްސީ އަތުން އާރްސީސީ މޮޅުވީ 5-1 އިންނެވެ. އާރްސީސީގެ ލަނޑުތައް ޖެހީ، މުސްލިމް މުހައްމަދު ދެ ގޯލުގެ އިތުރުން، ހޫދު އަހުމަދު ފަތުހީ އަދި އަހުމަދު މިކްޔާލް މުއީން އެވެ. ލިއޯ އެފްސީގެ ލަނޑު ޖެހީ، ރަޝްވާން ރަޝީދު އެވެ.
އާރްސީސީން ގްރޫޕް އޭގެ އެއް ވަނައިގައި އޮތީ ދެ މެޗުން ހަ ޕޮއިންޓާއި ފައިދާ 10 ގޯލާ އެކު އެވެ. ދެ ވަނައިގައި އޮތް ހޯކްސް އަށް ދެ މެޗުން ހަ ޕޮއިންޓާއި ފައިދާ އަށް ގޯލު ލިބިފައިވެ އެވެ. މި ގްރޫޕްގައި ދެން އޮތް ރެއިންބޯ އާއި އެމްއައިބީ އަދި ލިއޯ އަށް އަދި ޕޮއިންޓެއް ލިބިފައިނުވެ އެވެ.
ގްރޫޕް ބީގައި އެސްބީއައި އިން ކުޅުނު ފުރަތަމަ މެޗުން ވަނީ 5-2 އިން ސިމްޑީ ބަލިކޮށްފަ އެވެ. މި މެޗުގައި އެސްބީއައިގެ އަބްދުﷲ ތަހުސީން ވަނީ ހަތަރު ގޯލު ޖަހައިފަ އެވެ. އެ ޓީމުގެ އަނެއް ލަނޑު ޖެހީ މުހައްމަދު އައިހަމް އިބްރާހިމް އެވެ. ސިމްޑީގެ ލަނޑުތައް ޖެހީ، ފައިސަލް އަމީން އާއި މުހައްމަދު ޝައްފާން އަބްދުލް މުއްތަލިބް އެވެ. މި ގްރޫޕްގެ އަނެއް މެޗުން، ސިލްވާ ސޭންޑްސް އަތުން ސޮނީ ހާޑްވެއާ މޮޅުވީ މުހައްމަދު ސާވިން އާއި ސުއައިދު މުހައްމަދުގެ ލަނޑުތަކުން 2-0 އިންނެވެ.
މި ގްރޫޕްގެ އެއް ވަނައިގައި ސޮނީ ހާޑްވެއާ އޮތީ ދެ މެޗުން ހަ ޕޮއިންޓާ އެކު އެވެ. ދެ ވަނައިގައި އޮތް އެސްބީއައި އާއި ތިން ވަނައިގައި އޮތް ޓީމު ވިލާ އަށް ވަނީ ތިން ޕޮއިންޓް ލިބިފަ އެވެ. އަދި، ހަތަރެއްގައި އޮތް ސިލްވާ ސޭންޑްސް އާއި ފުލުގައި އޮތް ސިމްޑީ އަށް އަދި ޕޮއިންޓެއް ނުލިބެ އެވެ.
ގްރޫޕް ސީގެ އެއް ވަނައިގައި އޮތީ ދެ މެޗުން ހަ ޕޮއިންޓާ އެކު ލޮކަލްޗާ އެވެ. އެ ޓީމުން ދެ ވަނަ މެޗުގައި، ބިއޯންޑް އަތުން ވަނީ 5-1 އިން މޮޅުވެފަ އެވެ. ލޮކަލްޗާ އަށް މި މެޗުގައި ލަނޑުތައް ޖަހައިދިނީ ރަޔާން އަލީ ވަހީދު އާއި އަލީ ފަވާޒް، ކޮންމެ ކުޅުންތެރިއަކު ދެ ގޯލުގެ އިތުރުން ޝައިފުﷲ އިބްރާހިމް އެވެ. މި މެޗުގައި ބިއޯންޑްގެ ލަނޑު ޖެހީ، އަހުމަދު ފާރިޝް އެވެ. މި ގްރޫޕްގައި، ޓީމު އެމްއޭޑަބްލިއުސީން ވަނީ 7-1 އިން އަލިބޭ އެފްސީ ބަލިކޮށްފަ އެވެ. އެމްއޭޑަބްލިއުސީގެ ލަނޑުތައް ޖެހީ، ހުސެއިން ފަޔާޒް ހެޓްރިކެއްގެ އިތުރުން، މުހައްމަދު އިންޝާއު އަހުމަދު ދެ ގޯލު އަދި އަހުމަދު ޝާފީ އުޒައިރު ލަނޑެކެވެ. މި މެޗުގައި، އަލިބޭ އެފްސީގެ ހަމައެކަނި ލަނޑު ޖެހީ، ޒަކަރިއްޔާ ހަމީދު އެވެ.
