ލަންޑަން (އޮކްޓޫބަރު 5) - އިނގިރޭސި ޕްރިމިއާ ލީގުގެ އެންމެ ފަހުގެ ޗެމްޕިއަން، ލިވަޕޫލް އަތުން 2-1 އިން ޗެލްސީ މޮޅުވިއިރު، ވެސްޓް ހޭމް ޔުނައިޓެޑް އަތުން 2-0 އިން މޮޅުވެ، އާސެނަލުން ލީގުގެ އެއް ވަނަ އަށް ޖެހިލައިފި އެވެ.
އިންޓަނޭޝަނަލް ބްރޭކަށްދާއިރު، އާސެނަލް އެއް ވަަނައިގައި އޮތީ ހަތް މެޗުން 16 ޕޮއިންޓާ އެކު އެވެ. ދެ ވަނައިގައި އޮތް ލިވަޕޫލަށް ވަނީ ހަތް މެޗުން 15 ޕޮއިންޓް ލިބިފަ އެވެ. އެންމެ ފަހުގެ ޗެމްޕިއަން، ލިވަޕޫލް މި ވަނީ އެންމެ ފަހުން ހުރިހާ މުބާރާތެއްގައި ކުޅުނު ތިން މެޗުން ވެސް ބަލިވެފަ އެެވެ.
އާސެނަލުން ތިން އަހަރު ތެރޭ ލީގުގައި ފުރަތަމަ ފަހަރަށް ވެސްޓް ހޭމް އަތުން އަމިއްލަ ދަނޑުގައި މޮޅުވިއިރު، މި މެޗުގެ ފުރަތަމަ ހާފުގައި އެ ޓީމަށް ލީޑުނަގައިދިނީ ކުރިން ވެސްޓް ހޭމަށް ކުޅުނު ޑެކްލަން ރައިސް ޖެހި ގޯލުންނެވެ. މިއީ، އާސެނަލްގެ އެބެރެޗީ އެޒޭ ޖެހި ބޯޅައެއް ވެސްޓް ހޭމްގެ ކީޕަރު، އަލްފަންސޯ އަރެއޯލާ އަތުގައި ޖެހިފައި ނުކުތް ވަގުތު ރީބައުންސަކުން ރައިސް ޖެހި ގޯލެކެވެ.
މިކޭލް އާޓެޓާގެ ކޯޗުކަމުގައި އާސެނަލުން ލީގުގައި 300 ވަނަ މެޗުގައި ކުޅުނުއިރު، މި މެޗުން އާސެނަލް މޮޅުކޮށްދިން ގޯލު ޕެނަލްޓީ އަކުން ޖެހީ ބުކާޔޯ ސަކާ އެވެ. މި މެޗުގައި އާސެނަލްގެ ކެޕްޓަން، މާޓިން އޮޑެގާޑް އަށް އަނިޔާވެ ވަނީ ބަދަލުުކުރަން ޖެހިފަ އެވެ. ލީގުގައި މި ފަހަރު އޮޑެގާޑް ފުރަތަމަ އެގާރައިގައި ކުޅުނު ތިން މެޗުގައި ވެސް އަނިޔާވެގެން ބަދަލުކުރަން ޖެހުނެވެ.
ޗެލްސީގެ އެސްޓެވާއޯ ލަނޑު ޖެހުމަށް ފަހު އުފާފާޅުކުރަނީ.
އަނިޔާ އާއި ސަސްޕެންޝަނުގެ މައްސަލަ ކުރިމަތިވެފައިވާ، ޗެލްސީން ލިވަޕޫލާ ދެކޮޅަށް ނުކުމެ ފުރަތަމަ ހާފު ނިންމާލީ ލީޑުގައި އޮވެ އެވެ. އެ ޓީމަށް ލީޑުނަގައިދިން ގޯލު ޖެހީ، އޭރިއާބޭރުން ގޯލުގެ މަތީ ކަނަށް ބޯޅަ ފޮނުވާލައިގެން، މޮއިސަސް ކައެސޭޑޯ އެވެ. އެ ބޯޅަ ގޯލަށް ވަނީ، ލިވަޕޫލްގެ ގޯލު ބަލަހައްޓަން ހުރި ޖޯޖިއާގެ ކީޕަރު، ޖިއޯޖީ މަމަޑާޝްވިލީ އަތުގައި ޖެހިފަ އެެވެ.
ދެ ވަނަ ހާފުގައި ލިވަޕޫލަށް ކޯޑީ ގަކްޕޯ ވަނީ ނަތީޖާ ހަމަހަމަކޮށްދީފަ އެވެ. އެކަމަކު، އިތުރު ވަގުތަށް ދެއްކި ހަތް މިނިޓްގެ ތެރެއިން ހަ ވަނަ މިނިޓްގައި، ޗެލްސީ މޮޅުކޮށްދިން ލަނޑު ޖެހީ، 19 އަހަރުގެ ބްރެޒިލް ތަރި އެސްޓެވާއޯ އެވެ. ލީގުގައި ލިވަޕޫލް ޖެހިޖެހިގެން ދެ މެޗުގައި ބަލިވެފައި މި ވަނީ ފަހު ވަގުތު ކޮޅަށް ގޯލު ވަދެގެންނެވެ. ސީޒަނުގެ ފުރަތަމަ މެޗުތަކުގައި ފަހު ވަގުތު ލަނޑު ޖަހައިގެން މޮޅުވި، ލިވަޕޫލް އަތުން މިދިޔަ ހަފްތާގައި ކްރިސްޓަލް ޕެލަސް މޮޅުވި ލަނޑު ވެސް ޖެހީ އިތުރު ވަގުތުގެ ފަހު މިނިޓްގަ އެވެ.
ޔުނައިޓެޑްގެ ކޯޗަކަށް ހުރި 50 ވަނަ މެޗުގައި އަމޮރިމް އަށް ކާމިޔާބު
ނަތީޖާ ނުނެރެވޭތީ ޕްރެޝަރުގައި ހުރި، ޕޯޗުގީސް ކޯޗު، ރުބެން އަމޮރިމްގެ އިރުޝާދުގެ ދަށުން ޔުނައިޓެޑް ކުޅުނު 50 ވަނަ މެޗުން އެ ޓީމުން ވަނީ 2-0 އިން ސަންޑަލެންޑް ބަލިކޮށްފަ އެވެ.
ޔުނައިޓެޑަށް މި މެޗުގައި ލީޑުނަގައިދިނީ، މޭސަން މައުންޓް އޭރިއާތެރެއިން ތިރީ ކަނަށް ބޯޅަ ފޮނުވާލައިގެން ޖެހި ގޯލުންނެވެ. އަދި، ފުރަތަމަ، ހާފުގައި ޔުނައިޓެޑްގެ ދެ ވަނަ ލަނޑު ޖެހީ، ބެންޖަމިން ސެސްކޯ އެވެ. މިއީ، ދިގުއެއްލުމަކުން އޭރިއާތެރެއިން ލިބުނު ބޯޅައަކުން ސެސްކޯ ޖެހި ގޯލެކެވެ.
ސަންޑަލެންޑާ ކުޅުނު މެޗުގެ ތެރެއިން ޔުނައިޓެޑްގެ ކޯޗު އަމޮރިމް.
މި މެޗުގައި، ޔުނައިޓެޑްގެ ގޯލު ބެލެހެއްޓި ބެލްޖިއަމްގެ ގޯލްކީޕަރު، ސެން ލަމެންސް ވަނީ، ސަންޑަލެންޑުން ފޮނުވާލި ރަނގަޅު ހަމަލާތަކެއް ހުއްޓުވައިފަ އެވެ.
ޔުނައިޓެޑްގެ ފުލްޓައިމް ކޯޗުންނަށް ބަލާއިރު، އެ ޓީމާ ހަވާލުވެ ހުއްޓައި، 50 ވަނަ މެޗުން އެންމެ ފަހުން މޮޅުވީ، 1987 ވަނަ އަހަރު އަލެކްސް ފާގަަސަން އެވެ. އެ ފަހުން ޔުނައިޓެޑާ ހަވާލުވި ކޯޗުންގެ 50 ވަނަ މެޗުގެ ނަތީޖާތަކަށް ބަލާއިރު، ޑޭވިޑް މޮއިސް، ލުއި ވެން ހާލްގެ 50 ވަނަ މެޗުން ބަލިވިއިރު، ހޯސޭ މޮރީނިއޯ، އޮލެ ގުނަ ސޯލްޝެއާ އަދި އެރިކް ޓެން ހާގްގެ 50 ވަނަ މެޗު ވަނީ އެއްވަރުވެފަ އެވެ.
އަމޮރިމް އަކީ 38 އަހަރު ތެރޭ ޔުނައިޓެޑްގެ ކޯޗަކަށް ހުރެ 50 ވަނަ މެޗުން މޮޅުވި ފުރަތަމަ މެޗު ކަމުގައި ވިޔަސް، އޭނާއާ އެކު ޔުނައިޓެޑްގެ ރެކޯޑް ދަށެވެ. އެ އަދަދަށް މެޗުގައި ޔުނައިޓެޑަށް ކޯޗުކޮށްދިންއިރު، މެޗުތަކުން މޮޅުވުމުގެ ޕަސަންޓް އެންމެ ދަށީ އަމޮރިމްގެ އިރުޝާދުގެ ދަށުންނެވެ. އަމޮރިމްގެ 50 މެޗަށް ބަލާއިރު، 21 މެޗުން ބަލިވިއިރު، މޮޅުވީ 20 މެޗުންނެވެ. އަދި، ނުވަ މެޗުން އެއްވަރުވި އެވެ.
ސަންޑަލެންޑް އަތުން ލިބުނު މޮޅާ އެކު، ޔުނައިޓެޑުން ވަނީ ހަތް މެޗުން 10 ޕޮއިންޓް ހޯދައި، ލީގުގެ ނުވަ ވަނަ އަށް ޖެހިލައިފަ އެވެ. ޓޮޓެންހަމް ހޮޓްސްޕާސް އިން ވަނީ، 2-1 އިން ލީޑްސް ޔުނައިޓެޑް ބަލިކޮށް ހަތް މެޗުން ލިބުނު 14 ޕޮއިންޓާ އެކު، ލީގުގެ ތިން ވަނަ އަށް ޖެހިލައިފަ އެވެ.
