ރާއްޖޭގެ ފުޓްބޯޅަ ކުރިއަރުވަން ވަރަށް ބޮޑު އިސްކަމެއް ދޭ ކަމަށް ރައީސް، ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީީސް، މުއިއްޒު މި ގޮތަށް ވިދާޅުވީ، ރާއްޖޭގެ ގައުމީ ފުޓުބޯޅަ ޓީމާ އެކު، ލެމަން ގްރާސް ސިޓްރޮންގައި ހާއްސަ ސައިފޮދެއްގައި ބައިވެރިވެވަޑައިގަތުމަށް ފަހު، ޓީމާ މުހާތަބުކޮށް ވާހަކަ ދެއްކެވިއިރު އެވެ. އެ ގޮތުން، މުއިއްޒު ވިދާޅުވީ، ފުޓްބޯޅަ ކުޅުންތެރިންނަށް ބޭނުންވާ އެކި ކަންކަމުގައި، އަދި، ކުރިއަށްދިއުމުގައި އެހީތެރިކަން ދިނުމުގައި ވެސް ވަރަށް ހާއްސަ ސަމާލުކަމެއް ފުޓްބޯޅަ އަށް ދެއްވާ ކަމަށެވެ.
"ހައި ޕްރައިޔޯރިޓީއެއް ދެން ފުޓްބޯޅަ އަށް. އިނގޭތޯ، އެހެން ކުޅިވަރުތަކަށް ވެސް ދެން، ހަމަ، ވަރަށް ބޮޑަށް އިސްކަންދެން ފުޓްބޯޅަ ކުރިއަރުވަން. އަޅުގަނޑު ވަރަށް އުފާކުރަން، ތަޖިކިސްތާނަށް ދާ ދިއުމުގައި ވެސް ވީހާވެސް ރަނގަޅަކަށް އެފްއޭއެމުން ކުރިއަށްގެންދާއިރުގައި ސަރުކާރުގެ ސައިޑުން ކޮށްދޭން އޮތް ކަމެއް ވިއްޔާ، ފުރިހަމަ އަށް ކޮށްދޭނަން،" މުއިއްޒު ވިދާޅުވި އެވެ.
ރައީސް ވިދާޅުވީ، ގައުމީ ޓީމާ އެކު، އިއްޔެގެ އެ ވަގުުތުކޮޅު ލިބުމުން ވަރަށް ހިތްހަމަޖެހޭ ކަމަށާއި ކާމިޔާބު ހޯދުމަށް ވަރަށް ހިތްވަރު ދޭ ކަމަށެވެ. އަދި، ދާދި ފަހުން، ސްރީ ލަންކާގައި ބޭއްވި ސައުތު އޭޝިއަން ސުޕަ ކަޕްގެ ކާމިޔާބީއާ ގުޅިގެން، ގައުމީ ޓީމަށް އިނާމެއް ދޭނެ ކަމަށް ވަނީ ވައުދުވެވަޑައިގެންފަ އެވެ.
ސައުތު އޭޝިއަން ސުޕަ ކަޕްގެ ތަށިި ހިފައިގެން ރައީސް މުއިއްޒު (ވ) އާއި ގައުމީ ޓީމުގެ ކެޕްޓަން، ސަމޫހު.--- ފޮޓޯ: ރައީސް އޮފީސް
"ވަރަށް އުފާކުރަން، އަދިވެސް އެއް ފަހަރު މަރުހަބާ ދަންނަވަން ފަހުން މި، (ސްރީ ލަންކާގައި) ކުޅެވުނު މުބާރާތުން ވެސް ހޯދި މަތީ ވަނަ އަށް ވެސް ވަރަށް ބޮޑަށް އުފާކުރަން. ދެން، ސަރުކާރުން އިންސެންޓިވްއެއް ވެސް ލިބޭނެ، އިނާމްތައް ވެސް ދޭނަން، ހިތްވަރު ވެސް ލިބޭނެ، އިރާދަކުރެއްވިއްޔާ، ކުރިއަށް އޮތްތާގައި ވަރުގަދަ ވެސް ކޮށްދޭނަން، އިރާދަކުރެއްވިއްޔާ ވަރުގަދަ ވެސް ވާނެ،" ރައީސް ވިދާޅުވި އެވެ.
ރާއްޖޭގެ ފުޓްބޯޅަ ދެ އަހަރެެއްހާ ދުވަސް ފަހުން، ފެށިގެން މިހާރު ކުރިއަށްދާއިރު، ސަރުކާރުގެ ފަރާތުން ކޮށްދޭން ޖެހޭ ކަންކަން ބަރާބަރަށް އަދާކޮށްދޭނެ ކަމުގެ ޔަގީންކަން ރައީސް މުއިއްޒު ވަނީ ދެއްވައިފަ އެވެ. އަދި، ސްޕޯޓްސް މިނިސްޓަރު އަބްދުﷲ ރާފިއު (ރާއްޕެ) އަށް ފުޓްބޯޅައިގެ ކަންކަމުގައި ދޭން ޖެހޭ ހުރިހާ ކަމެއް ފަހިކޮށްދޭނެ ކަމަށް ރައީސް ވިދާޅުވި އެވެ.
"ހަމަޔަގީނުން ވެސް ސަރުކާރުގެ ފަރާތުން ކޮށްދޭން ޖެހޭ ހުރިހާ ކަމެއް ފުޓްބޯޅަ ކުރިއަރުވަން ކޮށްދޭނެ ކަމުގެ ޔަގީންކަން ދެން މިނިސްޓަރަށް ވެސް ހުރިހާ ކަމެއް ފަހިކޮށްދޭން ސަރުކާރުން ކޮށްދޭން ޖެހޭ ހުރިހާ ކަމެއް އެއީ އިންފްރާސްޓްރަކްޗާ ގޮތުން ކަމުގައި ވިޔަސް އަދި އެެހެން ގޮތްގޮތުން ފެސިލިޓޭޓް ކޮށްދޭން ޖެހޭ ކަންކަން ވެސް ކޮށްދޭނަން،" މުއިއްޒު ވިދާޅުވި އެވެ.
"ފުޓްބޯޅަ ކުޅުންތެރިން ތިކުދިން، ގައުމީ ޓީމުގަޔާއި ޖުމްލަކޮށް ރާއްޖޭގެ ފުޓްބޯޅަ ކުރިއެރުވުމުގައި ހަމަ، ކުރިއަށްދާންވީ ހަަމަ، އަޅުގަނޑު ހަމަ، ފުލް ސަޕޯޓް ސަރުކާރުން ދޭނަން. ސަރުކާރުން މިހާރު ވަރަށް ގިނަ ރަށްތަކުގައި ދަނޑުތައް ހަދަން އެބަ. ފަށަން ފަށައިފިން، އަދިވެސް އެބަހުރި ވަރަށް ގިނަ ރަށްރަށު ފަށަން ވެސް. އެހެންވީމަ، މިހާރު މި ގާނޫނުގެ ދަށުން އެ އަންނަ ސްޓްރަކްޗާގެ ތެރެއިން ވެސް ސަރަހައްދުތަކުގައި ފުޓްބޯޅަ ދަނޑުތައް ހެދި މި ގޮތަށް މި ދަނީ،"
ގަލޮޅު ރަސްމީ ބޯޅަ ދަނޑު މިހާރު އޮތީ ވަރަށް ބޮޑަށް ހަލާކުވެފައިކަން ފާހަގަކުރައްވައި، ރައީސް މުއިއްޒު ވިދާޅުވީ، ބައިނަލްއަގުވާމީ ރަނގަޅު ފެންވަރުގެ ދަނޑެއް ހަގީގަތުގައި ރާއްޖޭގައި ނެތް ކަމަށެވެ. އަދި، އެ އަށް އިޝާރާތް ކުރައްވައި، ރައީސް ވިދާޅުވީ، "އިންޓަނޭޝަނަލް ފެންވަރު ރަނގަޅު ނެޝަނަލް ފުޓްބޯޅަ ސްޓޭޑިއަމެއް ހެދުމުގެ މަސައްކަތަށް ވަރަށް މަަސައްކަތް އެބަކުރާ" ކަމަށެވެ.
އަދި، އާ ސްޓޭޑިއަމެއްގެ މަސައްކަތް ކުރެވެންދެން، ގަލޮޅު ދަނޑުގެ ކަންކަމާއި ރާއްޖޭގެ އެކި ކަންކޮޅުތަކުގައި އަޅާ ދަނޑުތަކުގެ މަސައްކަތްތައް ކުރެވިގެންދާނެ ކަމަށް ރައީސް މުއިއްޒު ވަނީ ވިދާޅުވެފަ އެވެ.
