ކުރީގެ ރައީސް އަބްދުﷲ ޔާމީންގެ ވެރިކަމުގައި ހިނގި އެމްއެމްޕީއާރްސީގެ ހިޔާނާތާ ގުޅިގެން ދައުލަތަށް ލިބެންޖެހޭ ފައިސާ ހޯދަން މަސައްކަތް ކުރަމުންދާ ކަމަށް އެންޓި ކޮރަޕްޝަން ކޮމިޝަން (އޭސީސީ) އިން މިއަދު ބުނެފި އެވެ.
އޭސީސީން ބުނީ އެމްއެމްޕީއާރްސީގެ މައްސަލަ ތަހުގީގު ކުރުމަށްފަހު، އެ މައްސަލަތަކާ ގުޅިގެން މިހާތަނަށް 123.73 މިލިއަން ރުފިޔާ އަނބުރާ ހޯދުމަށް ކަމާ ގުޅުންހުރި އިދާރާތަކަށް އަންގާފައިވާ ކަމަށެވެ.
އެމްއެމްޕީއާރްސީ ހިޔާނާތާ ގުޅޭ 37 މައްސަލަ މިވަގުތު އޭސީސީން ތަހުގީގު ކުރަމުންދާ ކަމަށާއި 161 މައްސަލަ ތަހުގީގުކޮށް ނިންމައި ގޮތް ނިންމުމުގެ މަރުހަލާގައި އޮތް ކަމަށް އެ ކޮމިޝަނުން ފާހަގަކުރި އެވެ.
އޭގެއިތުރުން 15 މައްސަލައެއްގައި ޕްރެސެކިއުޓާ ޖެނެރަލްގެ އޮފީހާއެކު ޑިއުޓީ ޕްރޮސެކިއުޝަން ކުރިއަށްދާ ކަމަށް އޭސީސީން ބުންޏެވެ.
އެމްއެމްޕީއާރްސީ މައްސަލައިގައި ބައިވެރިވި ކަމަށް ތުހުމަތު ކުރެވޭ 281 މީހެއްގެ ލިސްޓެއް މަޖިލީހުން އާންމުކުރި އެވެ.
އެމްއެމްޕީއާރްސީގެ މައްސަލައިގައި މިހާތަނަށް ކުށް ސާބިތުވީ ކުރީގެ ނައިބު ރައީސް އަހުމަދު އަދީބު އަދި އެމްއެމްޕީއާރްސީގެ ކުރީގެ ވެރިޔާ އަބްދުﷲ ޒިޔަތުގެ މައްޗަށެވެ. އެ މައްސަލައިގައި އަދީބު 20 އަހަރަށް ޖަލަށްލާން ކޯޓުން ހުކުމް ކުރި އެވެ. ނަމަވެސް އޭނާގެ އަދަބު ލުއިކޮށް ކުރީގެ ސަރުކާރުން ވަނީ އަދީބު މިނިވަންކޮށްފަ އެވެ.
އެމްއެމްޕީއާރްސީގެ މައްސަލައިގައި ކުރީގެ ރައީސް އަބްދުﷲ ޔާމީންގެ މައްޗަށް ދެ ފަހަރަކު ޖިނާއީ ހުކުމެއް އިއްވި އެވެ. އެއީ ފަސް އަހަރުގެ ހުކުމަކާއި 11 އަހަރުގެ ހުކުމެކެވެ. ނަމަވެސް އެ ދެ ހުކުމް ވެސް މަތީ ކޯޓުތަކުން ވަނީ ބާތިލުކޮށްފަ އެވެ.
އެމްއެމްޕީއާރްސީގެ މައްސަލަތައް ބަލައި ފައިސާތައް ހޯދާނެކަމުގެ ޔަގީންކަން ރައީސް މުއިއްޒު ދެއްވިއިރު އެމަނިކުފާނުގެ ސަރުކާރުގެ އެކި މަގާމުތަކުގައި ހިޔާނާތުގެ ތުހުމަތު ކުރެވޭ ބޭފުޅުން އެބަތިއްބެވެ.
އޭސީސީން ބުނީ އެ ކޮމިޝަނުން އަމަލުކުރަނީ ރާއްޖޭގެ ގާނޫނުއަސާސީ އާއި އެ ކޮމިޝަންގެ ގާނޫނާއި، ރާއްޖޭގެ ޖިނާއީ އަދުލުގެ ނިޒާމުގައި ކަނޑައަޅާފައިވާ އުސޫލުތަކާއި މިންގަނޑުތަކާއި ހަމަތަކުގެ މަތިން ކަމަށެވެ.
ކޮމިޝަންގެ ފަންނީ އަދި އެހެނިހެން ގާބުލުކަން ތަންދޭ އެންމެ މަތީ މިންވަރަކުން ތަހުގީގުތައް އަވަސްކޮށް ފިޔަވަޅު އަޅަމުންދާ ކަމުގެ ޔަގީންކަން އޭސީސީން ދިނެވެ.
ނަމަވެސް އޭސީސީގައި ކޮރަޕްޝަނުގެ ގިނަ މައްސަލަތައް ފުނި ޖެހިފައިވާއިރު އެ ކޮމިޝަނުން މަޑު ދުވެލީގައި މަސައްކަތް ކުރަމުންދާތީ ގިނަ ބަޔަކު އަންނަނީ ފާޑު ކިޔަމުންނެވެ.
