ރައީސް މުހައްމަދު މުއިއްޒުގެ ސަރުކާރުން ގައުމު "ލޫޓުވައިފި" ކަމަށް ބުނެ، އެންމެ ބޮޑު އިދިކޮޅު ޕާޓީ، މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އޮކްޓޯބަރު 3، ގައި ބާއްވާ އެއްވުމާ ދިމާކޮށް ފުލުހުންގެ ހާއްސަ ތަމްރީނުތަކެއް މިއަދާއި މާދަމާ ކުރިއަށްގެންދާނެކަން ހާމަކޮށްފި އެވެ.
"ފުލުހުންގެ އޮޕަރޭޝަނަލް ރެޑިނަސް ބެލުމުގެ ގޮތުން ކުރިއަށް ގެންދާ ސިލްސިލާ އެކްސަސައިޒްތަކުގެ ތެރެއިން އެކްސަސައިޒްތަކެއް އޮކްޓޯބަރު 1 އަދި 2 ވަނަ ދުވަހު މާލެއާއި ހުޅުޅުމާލޭގައި ކުރިއަށްދާނެ. މި އެކްސަސައިޒްތަކުގައި ދިމާވެދާނެ ހާލަތަކަށް ފުލުހުން ތައްޔާރުވެފައިވާ މިންވަރު ބަލައި، ފަރިތަކުރުންތައް ކުރިއަށް ގެންދިއުމަށްވަނީ ހަމަޖެހިފައި،" އެ އިދާރާއިން މިއަދު ބުނެފައިވެ އެވެ.
ސޯޝަލް މީޑިއާގައި އާންމުވެފައިވާ ފޮޓޯ އަދި ވީޑިއޯތަކުން ފެންނަ ގޮތުގައި ރޭ ދަންވަރު ގިނަ އަދަދެއްގެ ފުލުހުން ވަނީ މާލޭގެ މަގުތައް މަތީ ހަރަކާތްތެރިވެފަ އެވެ. ރަޔަޓު ގިޔަރުގައި ފުލުހުން ހަރަކާތްތެރިވެފައިވަނީ ހުކުރު ދުވަހުގެ ރޭ އެމްޑީޕީގެ މުޒާހަރާ ފަށާ އާޓިފިޝަލް ބީޗު ކައިރީގަ އެވެ.
އެގޮތުން، ސަލްމާން މިސްކިތް ކައިރި އަދި ރާޅުގަނޑު ސަރަހައްދު އަދި މަޖީދީ މަގު ޖެލީ ރެސްޓޯރަންޓު ކައިރި ފުލުހުން ވަނީ ހަރަކާތްތެރިވެފަ އެވެ. އާންމުކޮށް އެއްވުންތަކާއި މުޒާހަރާތައް ހުއްޓުވަން އަދި ރޫޅާލަން ބޭނުންކުރާ ޝީލްޑު ފަދަ އާލާތްތަކާއެކު ސަފުތަކަށް އެތުރި، ތައްޔާރުވަމުން ދިޔަތަން އާންމުވެފައިވާ ވީޑިއޯ އަދި ފޮޓޯތަކުން ފެނެ އެވެ.
ފުލުހުންގެ ހަރަކާތްތައް ފެނުނު މި ނޫހުގެ ނޫސްވެރިން ބުނި ގޮތުގައި ފުލުހުންގެ ހަރަކާތްތައް ހުރީ ހުކުރު ދުވަހުގެ ރޭގެ މުޒާހަރާގެ ބައިވެރިންނަށް އާޓިފިޝަލް ބީޗު ސަރަހައްދުން އެހެން ތަނަކަށް ނުދެވޭނެ ގޮތަށް ތައްޔާރުވާން ކަމަށް ބެލެވޭ ކަމަށެވެ.
ޖެނުއަރީ 31، ގައި އެމްޑީޕީން ބޭއްވި ބޮޑު ހިނގާލުމާއި ދިމާކޮށް ގިނަ އަދަދެއްގެ ސިފައިން ބޮޑެތި ލޮރީތަކުގައި އެމްއެންޑީއެފުގެ ދެ ޓޭންކަރާއެކު މާލޭގައި ދުއްވި އެވެ. ފުލުހުން ވެސް އެ އެއްވުމުގެ ކުރިން ހަރަކާތްތެރިވި އެވެ.
