ދިވެހިރާއްޖޭގެ ގުޅުން ޕްރައިވެޓް ލިމިޓެޑް (ދިރާގު)، 1988 ގައި އުފެދުނުއިރު ހިދުމަތް ފޯރުކޮށްދެމުން އައީ ހަމައެކަނި ރާއްޖޭގެ ދެ އަތޮޅެއްގެ ދެ ރަށަކަށެވެ. އޭރު މާލޭގައި ބެހެއްޓިފައި ހުރީ އެންމެ 3،000 މީހުންނަށް ހިދުމަތް ފޯރުވައިދޭވަރުގެ އެކްސްޗޭންޖެކެވެ.
ދިރާގުން ހަރުފަތަކަށްފަހު ހަރުފަތެއް ގިރާކުރަމުން މުއާސަލާތީ ހިދުމަތް ދިނުމުގައި ރާއްޖޭގައި އެންމެ ކުރީގައި އޮތް ކުންފުނިކަން ސާބިތުކޮށްދިނީ ހޯދާފައިވާ ކުރިއެރުމުންނެވެ. އެ ކުންފުނިން މިއަދު މުއާސަލާތީ ގޮތުން ރާއްޖެއަށް ބޭނުންވާ ހުރިހާ ހިދުމަތެއް ހުރިހާ ރަށަކާ ހިސާބަށް ވަނީ ފޯރުކޮށްދީފައެވެ.
ދިރާގުން ފާއިތުވެދިޔަ 37 އަހަރުގައި ހޯދާފައިވާ ކުރިއެރުން:
- 1997 - ފޯނުން މުއާމަލާތް ކުރެވޭނެ ހިދުމަތް ދޭން ފެށި.
- 1999 - ރާއްޖޭގެ ހުރިހާ ރަށަކަށް ފޯނުން މުއާމަލާތް ކުރެވޭ ގޮތް ހެދި.
- 2001 - ޕްރިޕެއިޑް އަދި އެސްއެމްއެސް ހިދުމަތް ދޭން ފެށި.
- 2002 - ބްރޯޑްބޭންޑް އޭޑީއެސްއެލް އިންޓަނެޓް ހިދުމަތް ދޭން ފެށި.
- 2011 - ޑޮމެސްޓިކް ސަބްސީ ކޭބަލް ނެޓްވޯކްގެ މަސައްކަތް ފެށި.
- 2012 - ޑޮމެސްޓިކް ސަބްމެރިން ކޭބަލް ނެޓްވޯކް ގާއިމުކުރި.
- 2014 - 4G އެލްޓީއީ ހިދުމަތް ތައާރަފްކުރި.
- 2015 - +4G އެލްޓީއީ-އޭ ގެ ހިދުމަތް ދެކުނު އޭޝިއާއަށް ފުރަތަމަ ފަހަރަށް ތައާރަފްކުރުމުގެ ގޮތުން މާލެއަށް ދޭން ފެށި.
- 2023 - ޑޮމެސްޓިކް ސަބްމެރިން ކޭބަލް ނެޓްވޯކްގެ ހަތަރު އައު ސެގްމަންޓް ގާއިމުކުރި.
- 2024 - ފައިބާ ބްރޯޑްބޭންޑްގެ ހިދުމަތް މުޅި ރާއްޖެއަށް ދޭން ފެށި.
ދިރާގުން ވަނީ މި އަހަރު ތެރޭގައި ރާއްޖޭގައި މީހުން ދިރިއުޅޭ ހުރިހާ ރަށަކަށް ފައިބާ ބްރޯޑް ބޭންޑްގެ ހިދުމަތް ދޭން ފަށާފަ އެވެ. ދުނިޔޭގައި ތަރައްގީވެފައިވާ ބައެއް ގައުމުތަކުގައި ވެސް މުޅި ގައުމަށް އެ ހިދުމަތެއް ނުދެވެ އެވެ. ދިރާގަކީ މުޅި ރާއްޖެއަށް އެ ހިދުމަތް ދޭ ހަމައެކަނި ކުންފުންޏެވެ.
ދިރާގުން ކަސްޓަމަރުންނާ ގާތް ގުޅުމެއް ބާއްވައި، އަގުހުރި އިނާމުތައް ދަނީ ދެމުން
ދިރާގަކީ ކަސްޓަމަރުންނާ އަބަދުވެސް ގާތް ގުޅުމެއް ބާއްވާ ކުންފުންޏެކެވެ. އެގޮތުން ކަސްޓަމަރުން ޝައުގުވެރިވާ ތަފާތު ޕްރޮމޯޝަންތައް ބާއްވައި އަގުހުރި އެތައް އިނާމުތަކެއް ފާއިތުވެދިޔަ އަހަރުތަކުގައި ވަނީ ދީފަ އެވެ.
ދިރާގުން މިދިޔަ އަހަރު "ވިން އަ ޓެސްލާ" ނަމުގައި ޓެސްލާއެއް ލިބޭ ޕްރޮމޯޝަނެއް ކުރިއަށް ގެންދިޔަ އެވެ. އެ ޕްރޮމޯޝަންގެ ދަށުން ޓެސްލާ ކާރު ލިބޭ ނަސީބުވެރިޔާއަށް ޓެސްލާ ކާރު ހަވާލުކުރިއިރު އެއީ ޕްރޮމޯޝަނެއްގެ ދަށުން ދިރާގުން އަދި އެހެން އެއްވެސް ކުންފުންޏަކުން ދިން އެންމެ އަގުބޮޑު އިނާމެވެ.
އެ ޕްރޮމޯޝަނުން ލިބުނު ތަޖުރިބާގެ އަލީގައި ދިރާގުން ވަނީ މިދިޔަ އަހަރު "ވިން އަ ސްޕީޑް ބޯޓް" ގެ ނަމުގައި ކުރިއަށްގެންދިޔަ ޕްރޮމޯޝަންގެ ދަށުން މެޖެލަން 32 ބޯޓަކާ އެކު ޔަމަހާ އައުޓްބޯޑް 175 ހޯސްޕަވަރުގެ ދެ އިންޖީނު ނަސީބުވެރިޔާއަށް ދިނެވެ.
އޭގެއިތުރުން ދިރާގުން މި އަހަރު އިއުލާންކޮށްފައި ވަނީ "އެންރޯލް އެންޑް ވިން 2 ސްޕީޑް ބޯޓު" ޕްރޮމޯޝަނެވެ. އެ ޕްރޮމޯޝަންގެ ދަށުން ނަސީބުވެރިޔަކަށް އަލް ޝާލީ މެރިން ކެނެރީ 28 މޮޑެލްގެ ސްޕޯޓްސް ސްޕީޑް ބޯޓެއް ލިބެ އެވެ. އެ ސްޕީޑް ބޯޓުގައި ޔަމަހާ 250 ހޯސްޕަވަރުގެ އިންޖީނު ވެސް ހުރެ އެވެ.
އަންނަ އަހަރުގެ މާޗު 31، ގެ ނިޔަލަށް ކުރިއަށް ގެންދާ ޕްރޮމޯޝަންގައި ދިރާގުގެ ކަސްޓަމަރުންނަށް އެކަމަށް ހާއްސަ ޕޯޓަލް މެދުވެރިކޮށް ބައިވެރިވެވޭނެ އެވެ.
ދިރާގުން ދަނީ އެކި ޕްރޮމޯޝަންތައް މެދުވެރިކޮށް ކަސްޓަމަރުންގެ ދިރިއުޅުމަށް އިތުރު ފުރިހަމަކަމެއް ގެނެސްދިނުމުގެ އިތުރުން ރާއްޖޭގައި ހިންގާ އިޖްތިމާއީ މުހިންމު ހަރަކާތްތަކަށާއި، ޒުވާނުންގެ ހަރަކާތްތަކަށާއި، މުނިފޫހިފިލުވުމާއި، ކުޅިވަރުގެ ހަރަކާތްތަކަށް ވެސް އަބަދުވެސް އެ ކުންފުނިން އެހީތެރިކަން ފޯރުކޮށްދެ އެވެ.
އޭގެ އެންމެ ބޮޑު ހެއްކަކީ ދިރާގުން ކުރިއަށްގެންދާ ދިރާގު މޯލްޑިވްސް ރޯޑް ރޭސް (ޑީއެމްއާރްއާރް) ގައި ޖަމިއްޔާތަކަށް ވެދޭ އެހީތެރިކަމެވެ. އެ ދުވުމަކީ ދިރާގުގެ ސީއެސްއާރް ޕްރޮގްރާމްގެ މައިގަނޑު އެއް ދާއިރާ ކަމަށްވާ ކުޑަކުދިންގެ ރައްކާތެރިކަމަށް ހާއްސަކޮށްފައިވާ ދުވުމެކެވެ.
މިގޮތުން ދުވުމުގައި ކުޑަކުދިންގެ ރައްކާތެރިކަމުގެ ދާއިރާގައި ހަރަކާތްތެރިވާ އެންޖީއޯތަކަށް އާންމުން ހޭލުންތެރިކުރުވުމަށާއި ފަންޑްރެއިޒް ކުރުމުގެ ފުރުސަތު ލިބޭނެ އެވެ.
މި އަހަރު އިވެންޓުގައި އެންޑޯޒްކޮށްފައިވާ އެންޖީއޯތަކުގެ ތެރެއިން ބައިވެރިވެރިންގެ އެންމެ ގިނަ ނޮމިނޭޝަން ލިބޭ ފަސް ޖަމިއްޔާތަކުން ރާވައިފައިވާ ޕްރޮގްރާމްތައް ފެށުމަށް އެހީތެރިވުމުގެ ގޮތުން ޖުމްލަ ދެ ލައްކަ ރުފިޔާ ގެ ފައިސާގެ އެހީތެރިކަން ދިރާގުން ދޭނެ އެވެ.
ދިރާގުން ދަނީ ރާއްޖޭގެ ޑިޖިޓަލް ޓްރާންސްފޯމޭޝަންގެ ދަތުރުގައި އެންމެ އިސްކޮށް ހަރަކާތްތެރިވެ ކަސްޓަމަރުންގެ ދިރިއުޅުމަށް އިތުރު ފުރިހަމަކަން ގެނެސްދިނުމަށް ގިނަ މަސައްކަތްތަކެއް ކުރަމުންނެވެ. ރާއްޖެއަށް 5ޖީގެ ހިދުމަތް ތައާރަފްކޮށް، އެ ހިދުމަތް ރާއްޖޭގެ އާބާދީގެ 70 ޕަސަންޓަށް ފުޅާކޮށް، ރާއްޖޭގެ 100 ޕަސަންޓް މީހުން ދިރިއުޅޭ ހުރިހާ ރަށަކަށް ފައިބާ ބްރޯޑްބޭންޑްގެ ހިދުމަތް ފޯރުކޮށްދީފަ އެވެ.
