ދުބާއީ، ޔުނައިޓެޑް އަރަބް އެމިރޭޓްސް (ސެޕްޓެމްބަރު 29) - މި ފަހަރުގެ އޭޝިއާ ކަޕްގައި ޕާކިސްތާންގެ މައްޗަށް ތިން ވަނަ ފަހަރަށް ކުރިހޯދުމަށް ފަހު، އިންޑިއާ އިން އޭޝިއާ ކަޕް ކްރިކެޓް މުބާރާތުގެ ޗެމްޕިއަންކަން ނުވަ ވަނަ ފަހަރަށް ހޯދައިފި އެވެ.
މި ފަހަރުގެ އޭޝިއާ ކަޕްގައި މީގެ ކުރިން މި ދެ ޓީމު ވަނީ ދެ ފަހަރު ބައްދަލުކޮށްފަ އެވެ. އެ ގޮތުން، ގްރޫޕް ސްޓޭޖުގައި ކުޅުނު މެޗުން އިންޑިއާ މޮޅުވީ، ހަތް ވިކެޓުންނެވެ. އަދި، ސުޕަ 4 ބުރުގައި އިންޑިއާ އިން ވަނީ ޕާކިސްތާންގެ މައްޗަށް ހަ ވިކެޓުން ކުރިހޯދައިފަ އެވެ. ރޭގެ ފައިނަލުގައި، ޕާކިސްތާން އަތުން އިންޑިއާ މޮޅުވީ ފަސް ވިކެޓުންނެވެ.
ދުބާއީ އިންޓަނޭޝަނަލް ސްޓޭޑިއަމްގައި ރޭ ކުޅުނު ފައިނަލުގައި ޓޮސް ދިމާވުމުން، އިންޑިއާ އިން ނިންމީ ފީލްޑް ކުރުމަށެވެ. ޕާކިސްތާނުން ކުޅެން އަރައި، 19.1 އޯވަރުގެ ތެރޭގައި ހުރިހާ ކުޅުންތެރިން ނުބައިވެގެން ހެދީ 146 ލަނޑެވެ. އެންމެ ގިނަ ލަނޑު ހަދައިދިިނީ، 38 ބޯޅައިން 57 ލަނޑު ހެދި ޝަހީބްޒާދާ ފަރްހާން އާއި 35 ބޯޅައިން 46 ލަނޑު ހެދި، ފަހާރު ޒަމަން އެވެ. މި އިނިންގްސްގައި، އިންޑިއާގެ ކުލްދީޕް ޔާދަވް ވަނީ ހަތަރު އޯވަރަށް ހަތަރު ވިކެޓް ނަގައިފަ އެވެ. އަދި، ވަރުން ޗަކްރަވަރުތީ، އަކްސާރު ޕަޓޭލް އަދި ޖަސްޕްރީތު ބުމްރާ ވަނީ ކޮންމެ އުކުންތެރިއަކު ދެ ވިކެޓް ނަގައިފަ އެވެ.
ޖަވާބުގައި ކުޅެން އަރައި، އިންޑިއާ އިން މޮޅުވީ، 19.4 އޯވަރުގެ ތެރޭގައި، ފަސް ކުޅުންތެރިން ނުބައިވިއިރު، 150 ލަނޑު ހަދައިގެންނެވެ. އިންޑިއާ އަށް އެންމެ ރަނގަޅު ކުޅުމެއް ދައްކައިދިނީ، ނުބައިނުވެ، 53 ބޯޅައިން 69 ލަނޑު ހެދި ތިލަކު ވަރުމާ އާއި 22 ބޯޅައިން 33 ލަނޑު ހެދި ޝިވަމް ދޫބޭ އެވެ.
އިންޑިއާ އިން އޭޝިއާ ކަޕް ކާމިޔާބުކޮށްފައިވަނީ، 1984، 1988، 1990، 1991، 1995، 2010، 2018 އަދި 2023 ގެ އިތުރުން 2025 ވަނަ އަހަރު އެވެ.
