ލަންޑަން (ސެޕްޓެމްބަރު 27) - އިނގިރޭސި ޕްރިމިއާ ލީގުގައި މިރޭ މެންޗެސްޓާ ޔުނައިޓެޑާއި ލިވަޕޫލް އަދި ޗެލްސީން ކުޅުނު މެޗުތަކުން ބަލިވިއިރު، މެންޗެސްޓާ ސިޓީން 5-1 އިން ބާންލީ އަތުން މޮޅުވެއްޖެ އެވެ.
ލީގުގެ އެއް ވަނައިގައި އޮތް ލިވަޕޫލްގެ ސަައްތަ އިން ސައްތަ ރެކޯޑް ނިމުމަކަށް އައީ ރަށުންބޭރުގައި 2-1 އިން ކްރިސްޓަލް ޕެލަސް އަތުން ބަލިވުމުންނެވެ. ޗެލްސީން އެއް ކުޅުންތެރިއަކު މަދުކޮށް އަނެއްކާ ވެސް މެޗު ނިންމާލަން ޖެހުނުއިރު، އަމިއްލަ ދަނޑުގައި ބަލިވީ 3-1 އިން ބްރައިޓަން އަތުންނެވެ. ބްރެންޓްފޯޑުން މި ފަހަރު ވެސް އަމިއްލަ ދަނޑުގައި ޔުނައިޓެޑް ބަލިކުރިއިރު، މި ފަހަރު މޮޅުވީ 3-1 އިންނެވެ.
އިނގިރޭސި ފުޓްބޯޅަ ސީޒަން ފަށަން ކުޅޭ ޗެރިޓީ ޝީލްޑް މެޗުގައި ލިވަޕޫލް ބަލިކުރި ޕެލަސް އިން ލީގުގައި މިރޭ އެ ޓީމާ ކުޅުނު މެޗު ވެސް ފެށީ ވަރުގަދަ ކޮށެވެ. ޕެލަސް އިން މި މެޗުގެ ފުރަތަމަ ހާފުގައި ފަސް ވަރަކަށް ގޯލު ޖަހާނެ ފުރުސަތު ތަނަވަސްކުރި އެވެ. މެޗުގެ ނުވަ ވަނަ މިނިޓްގައި އިސްމާއިލާ ސާ، ޕެލަސް އަށް ލީޑުނަގައިދިންއިރު، އެ ޓީމަށް ދެ ވަނަ ލަނޑެއް ޖަހައިދޭން، ޖިއާން ފިލީޕޭ މަޓޭޓާ، ޑެނިއަލް މުނޯޒް އަދި ޔެރެމީ ޕިނޯ ޖެހި ބޯޅަތައް ލިވަޕޫލްގެ ކީޕަރު އެލިސަން ބެކާ ހުއްޓުވި އެވެ. އަދި، މަޓެޓާ ޖެހި ބޯޅައެއް ވަނީ ދަނޑިއަށް އަމާޒުވެފަ އެވެ.
ލިވަޕޫލުން ދެ ވަނަ ހާފުގައި ކުޅުން ރަނގަޅުކޮށް ލަނޑެއް ޖެހޭތޯ މަސައްކަތްކުރިއިރު، ފްލޯރިއަން ވާޓްޒް އާއި އަލެކްސަންޑަ އިސާކަށް ލިބުނު ބޯޅަތައް ގޯލަކަށް ހަދައިނުލެވުނެވެ. އެކަަމަކު، ބަދަލަކަށް ކުޅެން އަރައި، 87 ވަނަ މިނިޓްގައި، ފެޑެރީކޯ ކިއޭސާ ވަނީ ގޯލު ޖަހައި ލިވަޕޫލަށް އެއްވަރުކޮށްދީފަ އެވެ. މި ގޯލު ބަލައިގަތީ، ލިވަޕޫލްގެ މުހައްމަދު ސަލާހު އަތުގައި ބޯޅަ ޖެހުނުތޯ، ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު އެވެ. އިތުރު ވަގުތުގެ ގޮތުގައި ދެއްކި ހަ މިނިޓް ހަމަވެ، ހަތް ވަނަ މިނިޓްގައި ޕެލަސް މޮޅުކޮށްދިން ގޯލު ޖެހީ އެޑީ އެންކެޓިއާ އެވެ. މި ގޯލު ބަލައިގަންނަން ނިންމީ އޮފްސައިޑްތޯ ވީއޭއާރް އިން ޔަގީންކުރުމަށް ފަހު އެވެ. މި ފަހަރު ލީގުގައި ބަލިނުވެ އޮތް ހަމައެކަނި ޓީމަކީ ޕެލަސް އެވެ.
ބްރެންޓްފޯޑުގެ ތިއާގޯ ގޯލު ޖެހުމަށް ފަހު އުފާފާޅުކުރަނީ.
ބްރެންޓްފޯޑުން އަމިއްލަ ދަނޑުގައި ޔުނައިޓެޑް ކައިރިން 20 މިނިޓް ތެރޭ ދެ ގޯލުގެ ލީޑެއް ނެގި އެވެ. މި ދެ ލަނޑު ވެސް ޖެހީ ބްރެޒިލްގެ ފޯވާޑް، އީގޯ ތިއާގޯ އެވެ. ޔުނައިޓެޑުން ވަނީ ބެންޖަމިން ސެސްކޯ އެ ޓީމަށް ޖަހައިިދިން ފުރަތަމަ ގޯލުން އުންމީދެއް ހޯދައިފަ އެވެ.
އަދި، ޔުނައިޓެޑަަށް އެއްވަރުކޮށްދޭން ލިބުނު ޕެނަލްޓީ އަކުން ދެ ވަނަ ހާފުގައި ބްރޫނޯ ފެނާންޑޭސް ފޮނުވާލި ބޯޅަ ބްރެންޓްފޯޑްގެ ކީޕަރު، ކޮއިމްހިން ކެލަހާ ވަނީ މަތަކޮށްފަ އެވެ. މެޗުގެ ފަހުކޮޅުގައި، ބްރެންޓްފޯޑުގެ ފަހު ލަނޑު ޖެހީ، ކައުންޓަ އެޓޭކުގައި، މަޓިއަސް ޖެންސަން އެވެ.
ޗެލްސީން އަމިއްލަ ދަނޑުގައި ފުރަތަމަ ހާފުގައި، އެންޒޯ ފެނާންޑޭސްގެ ގޯލުން ލީޑުނެގި ނަމަވެސް، ދެ ވަަނަ ހާފު ފެށިގެން ހަ ވަނަ މިނިޓްގައި އެ ޓީމުގެ ޓްރެވާ ޗަލޯބާ އަށް ރަތް ކާޑެއް ދެއްކުމުން ކުޅުންތެރިއަކު މަދުކޮށް ކުޅެން ޖެހުނެވެ.
ޗެލްސީން ދެ ވަނަ ހާފުގެ ބޮޑުބައި އެއް ކުޅުންތެރިއަކު މަދުކޮށް ކުޅެން ޖެހުމުގެ ނަތީޖާ އަކަށްވީ އޭގެ ފައިދާނަަގައި، ބްރައިޓަން އިން ތިން ގޯލު ޖަހައި މެޗުން މޮޅުވުމެވެ. ބްރައިޓަންގެ ލަނޑުތައް ޖެހީ، ޑެނީ ވެލްބެކް ދެ ގޯލާއި މެކްސިމް ޑި ކުއިޕާ ގޯލެކެވެ.
ބާންލީއާ ދެކޮޅަށް ކުޅުނު މެޗުގެ ތެރެއިން ސިޓީގެ ހާލަންޑް ބޯޅަ ކޮންޓްރޯލް ކުރަނީ.
ސިޓީން މެޗުގައި ލީޑުނެގީ، ބާންލީގެ މެކްސިމް އެސްޓީވް އަތުން ބައިކޮޅަށް ވަން ގޯލުންނެވެ. އެކަމަކު، ފުރަތަމަ ހާފު ނިމުމުގެ ކުރިން، ޖޭޑަން އެންތަނީ ވަނީ ލަނޑެއް ޖަހައި ބާންލީ އަށް އެއްވަރުކޮށްދީފަ އެވެ. ސިޓީން އަލުން ލީޑުނެގީ، 61 ވަނަ މިނިޓްގައި މަޓެއުސް ނޫނޭސް ޖެހި ގޯލުންނެވެ. އަދި، އޭގެ ހަތަރު މިނިޓް ފަހުން، އެސްޓީވް އަތުން ބައިކޮޅަށް ވަން ދެ ވަނަ ގޯލުން ސިޓީން ލީޑުފުޅާކުރި އެވެ.
މެޗުގައި ސިޓީން ދެން ޖެހި ދެ ގޯލު ވެސް ކާމިޔާބުކުރީ ލިބުނު ފުރުސަތުތަކުގެ ބޭނުންހިފައި އާލިން ހާލަންޑް އެވެ.
ލިވަޕޫލް، ލީގުގެ އެއް ވަނައިގައި އޮތި ހަ މެޗުން 15 ޕޮއިންޓާ އެކު އެވެ. ދެ ވަނައިގައި އޮތް ޕެލަސް އަށް ހަ މެޗުން 12 ޕޮއިންޓް ލިބިފައިވާއިރު، މިރޭ 2-2 އިން ލީޑްސް ޔުނައިޓެޑާ އެއްވަރުވި، ބޯންމައުތު އޮތީ ހަ މެޗުން 11 ޕޮއިންޓާ އެކު، ތިން ވަނައިގަ އެވެ. ހަތަރެއްގައި އޮތް ސިޓީ އާއި ފަސް ވަނައިގައި އޮތް އާސެނަލް އަދި ހަ ވަނައިގައި އޮތް ޓޮޓެންހަމް އަށް ވަނީ 10 ޕޮއިންޓް ލިބިފަ އެވެ. ސިޓީން ހަ މެޗު ކުޅުނުއިރު، އާސެނަލާއި ޓޮޓެންހަމް އިން ކުޅުނީ ފަސް މެެޗެވެ.
