އޮޑިޓާ ޖެނެރަލަކީ ސްޕިން ޑޮކްޓަރެއް ނޫނެވެ. އޭނާއަކީ ކެމްޕޭން މެނޭޖަރެއް ފަދައިން މަސައްކަތް ކުރަންޖެހޭ މީހެއް ވެސް ނޫނެވެ. އޮޑިޓަ ޖެނެރަލަކީ ރައްޔިތުންގެ ފަރާތުން ރައްޔިތުންގެ މުދަލާއި ފައިސާ އަށް ފާރަވެރިވެ، އެތަކެތި ބޭނުންކުރަނީ ރައްޔިތުން ލިޔެފައި ދިން ގޮތަށް، އެ ރައްޔިތުންގެ ފައިދާ އާއި މަންފާއަށްތޯ ބަލައި، އެއާ ހިލާފަށް ދާނަމަ ހުއްޓުވަން މަސައްކަތް ކުރުމުގެ ގާނޫނީ ބާރު ހުރި މީހެކެވެ.
އޭނާއަކީ އެއްވެސް ސަރުކާރަކަށް، އެއްވެސް ޕާޓީއަކަށް، އަދި އެއްވެސް ލީޑަރަކަށް "އީމާންވާންޖެހޭ" މީހެއް ނޫނެވެ. އިހުލާސްތެރިވާން ޖެހެނީ ރައްޔިތުންނަށެވެ. އެމްޑީޕީ ވިޔަސް، ޕީއެންސީ ވިޔަސް، ދައުލަތް ހިންގުމާ ހަވާލުވާ ކޮންމެ ބަޔަކު ވެސް ހިޔާނާތް ހިންގާނަމަ އެ ވާހަކައެއް އިސްވެ ހާމަކުރަން ޖެހެނީ ރައްޔިތުންގެ ހައްގުގަ އެވެ.
އޮޑިޓަ ޖެނެރަލްގެ މަގާމުގެ ގަދަރަށް އުނިކަމެއް އަތުވެދާނެ އެއްވެސް ކަމެއް، އެއްވެސް ވަގުތެއްގައި ނުކުރުމަށް، ގާނޫނުގައި ހިމެނޭ ސުލޫކީ މިންގަނޑުގައިވެ އެވެ. ދަންވަރު ނުނިދާ ހޭލާ ހުންނަވައިގެން ފެނަކަ ކޯޕަރޭޝަންގެ ރިޕޯޓު ނެރުމަކީ އޮޑިޓަ ޖެނެރަލްގެ މިބުނި މިންގަނޑު ކައްސައިލި އަމަލެކެވެ. ކުރިން ހިނގާފައި އޮތް ކަމެއްގެ މައްޗަށް، އޮފީހުގެ ރަސްމީ ވަގުތުން ބޭރުގައި، އެއީ ވެސް ހަފުތާ ބަންދެއްގެ ދަންވަރު ވަގުތެއްގައި ރިޕޯޓެއް ނެރެންޖެހޭ ފަދަ ޒަރޫރަތެއް ކުއްލިއަކަށް އުފަންވެފައި ނެތެވެ.
އޮޑިޓަ ޖެނެރަލް އޮފީހުގެ އެކްސް އެކައުންޓު ބެލިއިރު، އެ އޮފީހުން ހުކުރު ދުވަހެއްގައި ރިޕޯޓެއް އާންމުކުރިކަން ފާހަގައެއް ނުކުރެވެ އެވެ. ނަަމަވެސް ފެނަކަ ކޯޕަރޭޝަންގެ އޮޑިޓް ރިޕޯޓް އާންމުކުރީ ދަންވަރު އެވެ. އެ ޕޯސްޓު ޑިލީޓުކުރުމަށް ފަހު، ހުކުރު ދުވަހު މެންދުރު 1:53 ގައި އާ ޕޯސްޓެއް، އެކްސްގައި ކުރި އެވެ.
ދަންވަރު އެ ރިޕޯޓު ނެރުނުތާ ގިނައިރުތަކެއް ނުވެ، މުއިއްޒުގެ ޕްރޮޕަގަންޑާ ހިންގާ މައި ޗެނަލް، އެމްއެމްޓީވީން އެ ހަބަރުތައް ގެނެސްދޭން ފެށި އެވެ. ސަރުކާރު ކުންފުނިތަކުން ބޮޑެތި އަދަދުތަކުން ފައިސާ ދެމުންދާ ނޫސްތަކުން ތިބީ ސަރުކާރު ބޭނުންވާ ނެރޭޓިވް ހިންގުމަށް ސުރުހީ އަޅައި ތައްޔާރުވެގެންނެވެ.
އެއަށް ފަހު ދެން ފެނިގެން ދިޔައީ ލޫޓުވީ އެމްޑީޕީން ކަމަށް ބުނެ، ސަރުކާރަށް ތާއިދުކުރާ ފަރާތްތަކުން ސޯޝަލް މީޑިއާގައި ހަރަކާތްތެރިވާން ފެށިތަނެވެ. މީޑިއާ ކޮންޓްރޯލް ކުރުމާ ދެކޮޅު މީޑިއާތަކުން އެ ހަބަރު ނުގެނެސްދޭނެ ކަމަށް ބުނެ ވަކިވަކި ނޫސްވެރިންނާއި މީޑިއާތަކަށް ފުރައްސާރަ ކުރުމަށް ރައްޔިތުންގެ ޓެކްސް ފައިސާއިން މުސާރަ ނަގާ ސިޔާސީ މުވައްޒަފުން ތިބީ ތައްޔާރުވެގެންނެވެ.
"ލޫޓުވައިފި ލޫޓުވައިފި" ނަމުގައި އެމްޑީޕީން ބާއްވާ އެއްވުން އިސްތިހާރުކުރަން މާލެ، ހުޅުމާލޭގައި ދަމާފައިވާ ބެނާތައް ވެސް މާލޭ ސިޓީ ކައުންސިލް އަދި އެޗްޑީސީން އިއްޔެ ނެގި އެވެ. އެއަށް ފަހު ރައީސް މުއިއްޒު ވެސް ރޭ ފެނަކަ ރިޕޯޓާ ގުޅިގެން ވާހަކަ ދެއްކެވި އެވެ. އަދި ހިޔާނާތުގެ މުދަލާ ފައިސާ ދައުލަތަށް ނެގުމަށް ގާނޫނެއް ހަދާނެ ކަމަށް ވެސް ވިދާޅުވި އެވެ.
މި ހުރިހާ ކަމެއް ހިނގައި ދިޔައީ، ލޫޓުވައިފި ނަމުގައި އޮކްޓޯބަރު 3 ގައި މާލޭގައި އެމްޑީޕީން ބޮޑު އެއްވުމެއް ބޭއްވުމުގެ ތައްޔާރީތައް ވަމުން ދަނިކޮށެވެ. އެ ރޭ ރިޕޯޓު އާންމުކުރުމާއެކު ވަށައިގެން ހިނގައިދިޔަ ހުރިހާ ކަމަކީ ވެސް ރައްޔިތުންގެ ފޯކަސް ގެއްލުވާލުމަށް ރޭވި އިންތިޒާމުވެގެން ހިނގައިދިޔަ ކަންކަމެވެ. އޮޑިޓު އޮފީހަކީ އެ ކަންކަމުގެ ބައިވެރިޔެކެވެ.
އެއީ ޕްރޮޕަގަންޑާއަށް ދީލައިލަން ޖެހޭ ތަނެއް ނޫނެވެ. އެ އޮފީހަކީ ދައުލަތުގެ ބާރުތަކަށް ފާރަވެރިވުމުގެ ނިޒާމުގެ މައި ތަނބަކަށް ވާން ޖެހެ އެވެ. އޮޑިޓު އޮފީހަކީ އޭރެއްގައި އޮންނަ ސިޔާސީ ޕާޓީއެއްގެ ގޮތްޕަކަށް ވުމަކީ ދެރަވަރު ކަމެކެވެ.
އޮޑިޓް ރިޕޯޓްތައް ނެރެނީ ވެރިކަންކުރާ ޕާޓީގެ ޕްރޮޕެގެންޑާއާ އެއްކީލިކޮށްގެން ކަމަށް ވާނަމަ އޮޑިޓަ ޖެނެރަލް އެ ވަނީ ގާނޫނާ ރަނގަޅަށް ހިލާފުވެފަ އެވެ. ސިޔާސީ ޕާޓީއެއްގެ ބޮޑު ޖަލްސާއެއްގެ ބޯމަތީގައި އޮއްވައި، ސްޕިން މެޝިނެއް ފަދައިން މަސައްކަތްކުރާ އޮޑިޓަ ޖަނެރަލްއަކަށް ދުސްތޫރީ ޒިންމާ އަދާކުރެވޭނެ ކަމަށް، އަދި އޮޑިޓަ ޖެނެރަލް އޮފީހުގެ ގަދަރާއި ކަރަމާތް ނުގެއްލި މަސައްކަތް ކުރެވިދާނެ ކަމަށް ނުފެނެ އެވެ.
ގާނޫނު ސާފެވެ. އެއްވެސް ކަމެއްގައި އޮޑިޓަ ޖެނެރަލްގެ އޮފީހުގެ ކަރާމާތަށް ބުރޫއަރާކަށް ނުޖެހޭނެ އެވެ. އޮޑިޓަ ޖެނެރަލްގެ މަގާމުގެ ގަދަރަށް އުނިކަމެއް އަތުވެދާނެ އެއްވެސް ކަމެއް، އެއްވެސް ވަގުތެއްގައި ނުކުރެވޭނެ އެވެ.
މި މައްސަލައިގައި އޮޑިޓަ ޖެނެރަލް ޖަވާބުދާރީ ކުރުވަންޖެހެ އެވެ. އަދި އޭނާ ޖަވާބުވެސް ދޭންޖެހެ އެވެ. މަޖިލީހުގެ ސުޕަ މެޖޯރިޓީ އޮތް ޕާޓީ ރުހޭ ގޮތަށް އަމަލުކުރުމަކީ، މަގާމުގެ ދެމެހެއްޓުމަށް އޮތް ހުއްދައެއް ކަމަށް ނުދެކޭށެވެ. ވެރިކަން ކުރާ ޕާޓީ ރުއްސުމަށް ވުރެ، އޮޑިޓަ ޖެނެރަލްގެ ދުސްތޫރީ ޒިންމާ މާބޮޑެވެ.
