ނިވަން ނޫސްވެރިކަމާއި ހިޔާލުގައި ތަޅު އެޅުވޭ ގޮތަށް ހެދި ގާނޫނުގެ މީޑިއާތަށް ކޮންޓްރޯލް ކުރަން އުފެއްދި މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުގެ މެންބަރުން އިންތިހާބު ކުރެވޭ ގަވާއިދު މިރޭ އާންމުކޮށްފި އެވެ.
މި އިއުލާނުގައިވާ ގޮތުން މީޑީއާތައް ކޮންޓްރޯލް ކުރެވޭ ގޮތަށް އުފައްދާ ކޮމިޝަނަށް މީޑިއާތަކުން މެންބަރުން އިންތިހާބު ކުރުމަށް ބާއްވާ އިންތިހާބަށް އިލެކްޝަންސް ކޮމިޝަނުން އިއުލާނު ކުރާ ދުވަހުން ފެށިގެން އެ މަގާމަށް ކުރިމަތިލުމަށް 10 ދުވަހުގެ މުއްދަތެއް ލިބޭނެ އެވެ.
ހަތް މެންބަރުންގެ މައްޗަށް އެކުލެވިގެންވާ ކޮންޓްރޯލް ކޮމިޝަނަށް މީޑިއާތަކުން ހަތަރު މެންބަރުން އިންތިހާބު ކުރާނެ އެވެ. އޭގެތެރޭގައި ހިމެނޭނީ ބްރޯޑްކާސްޓިން މީޑިއާތައް ތަމްސީލު ކުރާ ދެ މެންބަރުންނާއި އެހެން މީޑިއާތައް ތަމްސީލު ކުރާ ދެ މެންބަރުންނެވެ.
ކޮންޓްރޯލް ކޮމިޝަނުގެ މެންބަރުކަމަށް ކުރިމަތިލާ މީހުންގެ ހުންނަން ޖެހޭ ޝަރުތުތަކާއި ކުރިމަތިލާ މީހުން ހުށަހަޅަންޖެހޭ ލިޔެކުންތަކުގެ ތަފުސީލުތައް އެ ގަވާއިދުގައި ބަޔާން ކޮށްފައިވެ އެވެ.
އެ ގަވާއިދުގައި ވާގޮތުން ކޮމިޝަނަށް މީޑިއާތަކުން އައްޔަނުކުރާ މެންބަރުންގެ ތެރެއިން ބްރޯޑްކާސްޓަރުން ތަމްސީލު ކުރާ މެންބަރުންނަށް ވޯޓު ލެވޭނީ ހަމައެކަނި ބްރޯޑްކާސްޓިން މީޑިއާތަކަށެވެ. އަދި އެހެން މީޑިއާތައް ތަމްސީލު ކުރާ މެންބަރުންނަށް ބްރޯޑްކާސްޓަރުން ފިޔަވައި އެހެން މީޑިއާތަކަށް ވޯޓު ލެވޭނެ ކަމަށް އެ ގަވާއިދުގައި ބުނެފައިވެ އެވެ. އެގޮތުން ކޮންމެ މީޑިއާއަކަށް ވެސް ލެވޭނީ އެއް ވޯޓު ކަމަށް އެ ގަވާއިދުގައި ބަޔާންކޮށްފައި ވެ އެވެ.
އިންތިހާބުގައި މީޑިއާތަކުން ވޯޓު ދޭ މީހުން ކޮމިޝަނުން ކަނޑައަޅާ އުސޫލެއްގެ ދަށުން އެ ކޮމިޝަނުގައި ރެޖިސްޓްރީ ވާން ޖެހެ އެވެ. އެގޮތަށް ރަޖިސްޓްރީ ވާން އެދި ހުށަހަޅާއިރު، އެ މީޑިއާއެއްގެ މަސްއޫލުވެރިޔާގެ ސޮޔާއެކު ތައްގަނޑު ޖެހި ލިޔުމެއް ހުށަހަޅަން ޖެހޭނެ ކަމަށް އެ ގަވާއިދުގައި ބަޔާން ކޮށްފައިވެ އެވެ.
މީޑިއާ ކޮންޓްރޯލް ގާނޫނުގެ ދަށުން ކޮމިޝަނުގެ މެންބަރުން އިންތިހާބުކޮށް، އައްޔަން ކުރުމާއި ހަމައަށް ކޮމިޝަނަށް ހުށަހެޅޭ މައްސަލަތަކާމެދު ގޮތް ނިންމުމާއި އަލަށް އުފައްދާ މީޑިއާތަކަށް ލައިސެންސް ދިނުމަށް ވަގުތީ ގޮތުން ހިންގާ ކޮމިޓީއެއް ސެޕްޓެމްބަރު 21، ގައި ވަނީ އައްޔަނުކޮށްފަ އެވެ.
ގާނޫނުގެ ދަށުން އުފައްދާ ކޮމިޝަނަށް ސޯޝަލް މީޑިއާ ރެގިއުލޭޓު ކުރުމުގެ އަދިވެސް ބާރު އޮތީ ލިބޭ ގޮތަށެވެ. އަދި މީޑިއާތައް ޖޫރިމަނާ ކުރެވޭ މާއްދާ ވެސް އަދިވެސް އެބަ އޮތެވެ. އުނި ކުރީ ވަކިވަކި ނޫސްވެރިން ޖޫރިމަނާ ކުރެވޭ ގޮތަށް އޮތް މާއްދާ އެވެ. އަދި ކޮމިޝަނުން ބޭނުންވާ މީޑިއާއެއްގެ ރަޖިސްޓްރީ ބާތިލު ކުރެވޭނެ ގޮތަށް އޮތް މާއްދާތައް ވެސް އެބަހުއްޓެވެ.
ތެދު ހަބަރަކީ ކޮބައިކަން ކަނޑައެޅުމުގެ ބާރު ވެސް ލިބެނީ ގާނޫނުގެ ދަށުން އުފައްދާ ކޮމިޝަނަށެވެ. އަދި މީޑިއާ އެތިކްސް ހެދުމުގައި ކަނޑައަޅަންޖެހޭ އުސޫލުތައް ވެސް ބަޔާންކޮށްފައި ހުރީ އެ ގާނޫނުގަ އެވެ. އޭގެ ތެރޭގައި، އާންމު މަސްލަހަތު ގެއްލޭ މައުލޫމާތަކީ ކޮބައިކަން ކަނޑައެޅުމުގެ ބާރު ވެސް ގާނޫނުގައި ބަޔާންކޮށްފައިވެ އެވެ.
ގާނޫނަށް އިތުރުކޮށްފައިވާ މާއްދާތަކުގެ ތެރޭގައި، ކޮމިޝަނަށް ހުށަހަޅާ މައްސަލަ ބަލަން މެންބަރުން ކަނޑައަޅާނެ ގޮތުގެ އުސޫލު ބަޔާންކޮށްފައި އޮންނަ މާއްދާތަކެއް ހިމެނެ އެވެ. ގާނޫނު އިސްލާހު ކުރީ، ކޮމިޝަނުގެ ބޭރުން ވެސް ވަކި މައްސަލައެއް ބެލުމަށް މެންބަރުން އައްޔަން ކުރެވިދާނެ ގޮތަށެވެ.
