ނޫސްވެރިންނާއި އާންމުންގެ ދެކޮޅު ހެދުންތަކަށް ނުބަލައި އިއްޔެ ފާސް ކުރި މިނިވަން ހިޔާލުގައި ތަޅު އަޅުވާ ބިލުގެ ދަށުން ސޯޝަލް މީޑިއާގައި ލިޔާ ލިޔުންތަކާ ދެކޮޅަށް ވެސް ފިޔަވަޅު އެޅޭނެ ކަމަށް ވެރިކަން ހިންގާ ޕީއެންސީގެ ޕީޖީ ލީޑަރު އިބްރާހިމް ފަލާހު ވިދާޅުވެއްޖެ އެވެ.
އެ ބިލު މަޖިލީހުން ފާސް ކުރުމުގެ ކުރިން އިއްޔެ މަޖިލީހުގެ ތަޅުމުގައި ވާހަކަ ދައްކަވަމުން ފަލާހު ވިދާޅުވީ، ސޯޝަލް މީޑިއާގައި އޭނާ ދޮގު ހަބަރެއް ލިޔުނަސް ބިލުގެ ދަށުން ފިޔަވަޅު އެޅޭނެ ކަމަށެވެ.
"މި ބިލަކުންނެއް ވަކި މީހަކު އިސްތިސްނާއެއް ނުވޭ އިއްޒަތްތެރި ރައީސް. އަޅުގަނޑެއް ވެސް އިސްތިސްނާއެއް ނުވޭ. އަޅުގަނޑު ވެސް ސޯޝަލް މީޑިއާގައި މީހަކާ ބެހޭ ގޮތުން ދޮގު ހަބަރެއް ޖަހައިފިއްޔާ ހުދު އަޅުގަނޑާ ދޭތެރޭގައި ވެސް އިއްޒަތްތެރި ރައީސް އާ ދޭތެރޭގައި ވެސް ފިޔަވަޅު އެޅިގެންދާނެ،" ފަލާހު ވިދާޅުވި އެވެ.
އެކަމަކު މީގެ ކުރިން ފަލާހު އަދި ސަރުކާރުން ބުނަމުންދިޔައީ ސޯޝަލް މީޑިއާގައި އާންމުން ފާޅު ކުރާ ހިޔާލުތަކަށް ބިލުގެ ދަށުން އަދަބެއް ނުދެވޭނެ ކަމަށެވެ. ސޯޝަލް މީޑިއާގައި ފާޅު ކުރާ ހިޔާލުތަކަށް ފިޔަވަޅު އެޅޭނެ ކަމަށް ބުނަނީ އިދިކޮޅު ސިޔާސީ ފަރާތްތަކުން ހަގީގަތް އޮޅުވާލުމަށް ކަމަށް ވެސް ސަރުކާރަށް ތާއީދު ކުރާ ފަރާތްތަކުން ކުރިން ބުނެފައިވެ އެވެ.
އިއްޔެ ފާސް ކުރި ބިލުގެ 61 ވަނަ މާއްދާގައި ބުނެފައި ވަނީ އެ ބިލުގައި ނޫސްތަކާ ގުޅޭ ގޮތުން ބަޔާންކޮށްފައި ހުރި އުސޫލުތައް އިލެކްޓްރޯނިކް މީޑިއާއަށް ވެސް ހިނގާނެ ކަމަށެވެ. އެ ބިލުގެ 84 ވަނަ މާއްދާގެ ޅ. ގައި ބުނެފައި ވަނީ އިލެކްޓްރޯނިކް މީޑިއާއަކީ އިންޓަނެޓް ހިމެނޭ ގޮތަށް ޑިޖިޓަލް ނުވަތަ އިލެކްޓްރޯނިކް ވަސީލަތެއް މެދުވެރިކޮށް ހަބަރާއި މައުލޫމާތު ފަތުރާ ވަސީލަތްތައް ކަމަށެވެ.
ރައްޔިތުންގެ މަޖިލީހުން އެ ބިލު ފާސް ކުރުމާއެކު ސަރުކާރަށް ވަރަށް ބޮޑެތި ފާޑުކިޔުންތައް އަމާޒުވި އެވެ. މިނިވަން ހިޔާލާއި ނޫސްވެރިކަމުގެ ހައްގު ފުރިހަމައަށް ދިނުމަށް އެމެރިކާގެ އެމްބަސީއިން ވެސް ރާއްޖެއަށް ގޮވައިލި އެވެ.
"ހިޔާލުފާޅު ކުރުމުގެ މިނިވަންކަން އަސާސީ ހައްގެއްގެ ގޮތުގައި ނޫސްވެރިން ހިމެނޭ ގޮތަށް އެންމެނަށް ލިބިދިނުމަށް އެމެރިކާއިން ތާއީދު ކުރާނެ. ދިވެހިރާއްޖެ ހިމެނޭ ގޮތަށް ހުރިހާ ގައުމަކަށް ވެސް އަޅުގަނޑުމެން ގޮވާލަނީ ތަފާތު އަދި އިދިކޮޅު ހިޔާލުތައް ފާޅު ކުރުމުގެ ހައްގަށް ހުރަސް ނޭޅުމަށް،" އެކްސްގައި ކުރި ޕޯސްޓެއްގައި އެމެރިކާއިން ބުނެފައިވެ އެވެ.
މިނިވަން ހިޔާލާއި ފިކުރުގައި ތަޅު އަޅުވާ ބިލު ފާސް ކުރީ ނޫސްވެރިންނާއި އާންމުންގެ ވަރަސް ގިނަ ބަޔަކު މަޖިލިސް ކައިރީގައި މުޒާހަރާ ކުރަމުން ދަނިކޮށެވެ. އެ މުޒާހަރާގެ ތެރެއިން އަދަދު ގެ ނޫސްވެރިޔާ ލީވާން އަލީ ނާސިރު ހައްޔަރު ކުރި އެވެ. ލީވާން ދޫކޮށްލީ އޭނާ ހައްޔަރުކޮށްފައި ހުރި ތަނެއް ނުބުނެ ގަޑިއިރުތަކެއް ފާއިތުވި ފަހުންނެވެ.
އިއްޔެގެ މުޒާހަރާ ރޫޅާލަން ފުލުހުން ވަނީ އެކަށީގެންނުވާ އަދި ހާލަތާ ނުބައްދަލު ބާރުގެ ބޭނުން ކޮށްފައި ކަމަށް އެތަނަށް ދިޔަ ނޫސްވެރިން ދަނީ ބުނަމުންނެވެ. އެގޮތުން ފުލުހުން އިއްޔެ އެންމެ ގިނައިން ކުރި ކަމަކީ ހަށިގަނޑުގެ އެކި ތަންތަނުގައި ވިކުން ކަމަށް ނޫސްވެރިން ބުންޏެވެ.
