މީޑިއާ ނެތިކޮށްލާ ބިލު ދިރާސާ ކުރި މިނިވަން މުއައްސަސާތަކާ ބެހޭ ކޮމިޓީ އަޑުއަހަން ދިޔަ ނޫސްވެރިންގެ މައްސަލަ އެ މަޖިލީހުގެ ކޮމިޓީއަކަށް ފޮނުވައިފި އެވެ.
މިއަދުގެ ޖަލްސާގެ ރިޔާސަތު ބެލެހެއްޓެވި އަހުމަދު ނާޒިމް ވިދާޅުވީ، ކޮމިޓީ އަޑުއަހަން ދިޔަ ނޫސްވެރިން އަމަލު ކުރި ގޮތުގެ ރިޕޯޓެއް ލިބިފައިވާ ކަމަށާއި އެ މައްސަލަ އާންމު ކޮމިޓީއަށް ފޮނުވަން ނިންމާފައިވާ ކަމަށެވެ.
"ކޮމިޓީ އަޑުއެހުމުގެ ފުރުސަތުން ދިން ފަރާތްތަކުން މަޖިލީހުގެ ކޮމިޓީގެ މަސައްކަތަށް ހުރަސް އެޅޭ ގޮތަށާއި މަޖިލީހުގެ ކަރާމަތަށް އުނިކަން އަންނަ ގޮތަށް އަމަލުކޮށް އިޖުތިމާއީ އަހުލާގީ މިންގަނޑާ ހިލާފަށް އަމަލުކޮށްފައިވާތީ އެކަމާ ގުޅޭ ގޮތުން މަޖިލީހުގެ ސާގަންޓް އެޓް އާމްސް ތައްޔާރުކޮށްފައިވާ ރިޕޯޓެއް ރިޔާސަތަށް ލިބިފައިވާތީ އެކަން މަޖިލީހުގެ ރިޔާސަތުން މަޖިލީހުގެ އާންމު ކޮމިޓީއަށް ފޮނުވަން ގަސްދު ކުރަން،" ނާޒިމް ވިދާޅުވި އެވެ.
އެ މައްސަލަ ކޮމިޓީއަށް ފޮނުވީ ކޮމިޓީއަށް ހާޒިރުވާ ފަރާތްތަކާމެދު ފިޔަވަޅު އެޅުމުގެ އިޖުރާއަތުތައް ގަވާއިދުގައި ހިމަނަން ކަމަށް ވެސް ނާޒިމް ވިދާޅުވި އެވެ.
ކޮމިޓީ ސިއްރު ކަމަށް ބުނެ މިނިވަން މުއައްސަސާތަކާ ބެހޭ ކޮމިޓީ އަޑުއެހުން ދިޔަ ނޫސްވެރިން ވަނީ މީގެ ކުރިން ކޮމިޓީއިން ނެރެލައިފަ އެވެ. އެކަމާ ދެކޮޅަށް ނޫސްވެރިން ވަނީ އެތަނުގައި އިހުތިޖާޖުކޮށްފަ އެވެ. ނޫސްވެރިން ނެރުނީ މަޖިލީހުގެ ސެކިއުރިޓީ ބަލަހައްޓާ އޮފިސަރުންނެވެ.
މިނިވަން މީޑިއާ ނެތިކޮށްލާ ބިލު މިއަދު ފާސް ކުރިއިރު ހެނދުނުން ފެށިގެން ނޫސްވެރިންނާއި އާންމުން ދަނީ މަޖިލިސް ކައިރީގައި ބިލާ ދެކޮޅަށް މުޒާހަރާ ކުރަމުންނެވެ. އަދި ބިލު ފާސް ކުރީ އިދިކޮޅު އެމްޑީޕީގެ މެންބަރުން މަޖިލިސް ތަޅުމުގައި މުޒާހަރާ ކުރި ފަހުންނެވެ. އިދިކޮޅު ބައެއް މެންބަރުން ވަނީ ނަން އިއްވައި ޖަލްސާއިން ނެރެފަ އެވެ.
އެ ބިލު ތަސްދީގު ކުރުމުން މީޑިއާ ރެގިއުލޭޓް ކުރާނީ ރައީސް މުހައްމަދު މުއިއްޒު ތިން މެންބަރުން އައްޔަން ކުރާ، ހަތް މެންބަރުންގެ މައްޗަށް އެކުލެވޭ ކޮމިޝަނަކުންނެވެ.
ބިލުގެ ދަށުން އުފައްދާ ކޮމިޝަނަށް ސޯޝަލް މީޑިއާ ރެގިއުލޭޓު ކުރުމުގެ އަދިވެސް ބާރު އޮތީ ލިބޭ ގޮތަށެވެ. އަދި މީޑިއާތައް ޖޫރިމަނާ ކުރެވޭ މާއްދާ ވެސް އަދިވެސް އެބަ އޮތެވެ. އުނި ކުރީ ވަކި ވަކި ނޫސްވެރިން ޖޫރިމަނާ ކުރެވޭ ގޮތަށް އޮތް މާއްދާ އެވެ. އަދި ކޮމިޝަނުން ބޭނުންވާ މީޑިއާއެއްގެ ރަޖިސްޓްރީ ބާތިލު ކުރެވޭނެ ގޮތަށް އޮތް މާއްދާތައް ވެސް އެބަހުއްޓެވެ.
ތެދު ހަބަރަކީ ކޮބައިކަން ކަނޑައެޅުމުގެ ބާރު ވެސް ލިބެނީ ބިލުގެ ދަށުން އުފައްދާ ކޮމިޝަނަށެވެ. އަދި މީޑިއާ އެތިކްސް ހެދުމުގައި ކަނޑައަޅަންޖެހޭ އުސޫލުތައް ވެސް ބަޔާންކޮށްފައި ހުރީ އެ ބިލުގަ އެވެ. އޭގެ ތެރޭގައި، އާންމު މަސްލަހަތު ގެއްލޭ މައުލޫމާތަކީ ކޮބައިކަން ކަނޑައެޅުމުގެ ބާރު ވެސް ބިލުގައި ބަޔާންކޮށްފައިވެ އެވެ.
ބިލަށް އިތުރުކޮށްފައިވާ މާއްދާތަކުގެ ތެރޭގައި، ކޮމިޝަނަށް ހުށަހަޅާ މައްސަލަ ބަލަން މެންބަރުން ކަނޑައަޅާނެ ގޮތުގެ އުސޫލު ބަޔާންކޮށްފައި އޮންނަ މާއްދާތަކެއް ހިމެނެ އެވެ. ބިލު އިސްލާހު ކުރީ، ކޮމިޝަނުގެ ބޭރުން ވެސް ވަކި މައްސަލައެއް ބެލުމަށް މެންބަރުން އައްޔަން ކުރެވިދާނެ އެވެ.
މުޅި ބިލުގެ ރޫހު ހުރީ މިނިވަން މީޑިއާ ނެތިކޮށްލުމަށް އަދި ސޯޝަލް މީޑިއާ އާއި އިންޓަނެޓު ކޮންޓްރޯލް ކުރަން ކަމަށްވާތީ، އެ ބިލު ވަގުތުން ބޭރު ކުރަން ވަރަށް ގިނަ ނޫސްވެރިންނާއި ބޭރުގެ ޖަމިއްޔާތަކުން ވަނީ ސަރުކާރަށް ގޮވާލައިފަ އެވެ. އަދި ބިލާ ދެކޮޅަށް ޝުއޫރު ފާޅު ކުރުމަށް ނޫސްވެރިން ދަނީ ސިލްސިލާ މުޒާހަރާތަކެއް ބާއްވަމުންނެވެ.
