މެންޗެސްޓާ (ސެޕްޓެމްބަރު 14) - އިނގިރޭސި ޕްރިމިއާ ލީގުގައި މިރޭ ފަހު ވަގުތު ބާންލީ އަތުން 1-0 އިން މޮޅުވެ، ލިވަޕޫލުން ލީގުގެ އެއް ވަަނަަ އަށް ޖެހިލިިއިރު، މެންޗެސްޓާ ސިޓީން ވާދަވެރި މެންޗެސްޓާ ޔުނައިޓެޑް 3-0 އިން ބަލިކޮށްލައިފި އެވެ.
ލީގުގެ 20 ޓީމުގެ ތެރެއިން މި ވަގުތު ސައްތަ އިން ސައްތަ ރެކޯޑަކާ އެކު އޮތް ހަމައެކަނި ޓީމަކީ ލިވަޕޫލް އެވެ. ހަތަރު މެޗުން މޮޅުވެ، ލިވަޕޫލުން 12 ޕޮއިންޓާ އެކު އެއް ވަނައިގައި އޮތްއިރު، ދެ ވަނައިގައި އޮތް އާސެނަލާއި ތިން ވަނައިގައި އޮތް ޓޮޓެންހަމް ހޮޓްސްޕާސް އަދި ހަތަރު ވަނައިގައި އޮތް ބޯންމައުތަށް ވަނީ ނުވަ ޕޮއިންޓް ލިބިފަ އެވެ.
ބާންލީ ދަނޑުގައި އެ ޓީމުން ލިވަޕޫލް ހުއްޓުވުމުގައި މެޗުގެ ބޮޑުބައި ކާމިޔާބު ހޯދި އެވެ. އެކަމަކު، އިތުރު ވަގުތުގެ ގޮތުގައި ދެއްކި ފަސް މިނިޓްތެރޭގައި، ލިވަޕޫލްގެ ޖެރެމީ ފްރިމްޕޮން ނެގި ހުރަހެއް ބްލޮކްކުރަން އުޅުމުގެ ތެރޭގައި، ބާންލީގެ ހަނިބަލް މެޖްބްރީ އަތުން ބޯޅައިގައި ޖެއްސުމުން ދިން ޕެނަލްޓީން ލިވަޕޫލް މޮޅުވި ގޯލު ޖެހީ މުހައްމަދު ސަލާހު އެވެ.
ލަނޑު ޖެހުމަށް ފަހު ލިވަޕޫލްގެ ސަލާހު އުފާފާޅުކުރަނީ.--- ފޮޓޯ: ގެޓީއިމޭޖަސް
މި މެޗުގެ 84 ވަނަ މިނިޓުން ފެށިގެން ބާންލީން ކުޅުނީ ކުޅުންތެރިއަކު މަދުކޮށެވެ. އެ ޓީމުގެ ލެސްލީ އުގޮޖުކްވޫ އަށް ވަނީ ދެ ވަނަ ރީނދޫ ކާޑާ އެކު ރަތް ކާޑެއް ދައްކައިފަ އެވެ.
ސިޓީ ދަނޑުގައި އެ ޓީމުން ކުޅުނު މެޗުގައި ފުރަތަމަ ހާފުގައި ލީޑުނެގީ ފިލް ފޯޑެން ޖެހި ގޯލުންނެވެ. ދެ ވަނަ ހާފުގައި ސިޓީގެ އަނެއް ލަނޑުތައް ޖެހީ، އާލިން ބްރައުޓް ހާލަންޑް އެވެ. ހާލަންޑް އިތުރު ގޯލުތައް ޖަހަން ފޮނުވާލި ހަމަލާތަކަށް ބަލާއިރު، ޔުނައިޓެޑްގެ ކީޕަރު އަލްޓޭ ބަޔިންޑީރު ކައިރިން ނައްޓާފައި ޖެހި ބޯޅައެއް ވަނީ ދަނޑިއަށް އަމާޒުވެފަ އެވެ.
ޕީއެސްޖީ ދޫކޮށް ސިޓީ އަށް ބަަދަލުވި އިޓަލީގެ ގޯލްކީޕަރު، ޖިއަންލުއީޖީ ޑޮނަރުންމާ ވަނީ އާ ކްލަބާ އެކު ފުރަތަމަ މެޗު ކުޅެފަ އެވެ. މި މެޗުގެ ދެ ވަނަ ހާފުގައި ޔުނައިޓެޑްގެ ބްރަޔާން އެމްބުއޭމޯ ޖެހި ޝޮޓެއް ކީޕަރު، ޑޮނަރުންމާ ވަނީ މަތަކޮށްފަ އެވެ.
ސިޓީ އަތުން ޔުނައިޓެޑް ބަލިިވިއިރު، ޕްރިމިއާ ލީގުގައި އެންމެ ފަހުން ރަށުންބޭރުގައި ކުޅުނު އަށް މެޗުން ވެސް މޮޅެއް ނުލިބެ އެވެ.
ޕްރިމިއާ ލީގުގެ އާ ސީޒަނުގައި ސިޓީން ކުޅުނު ފުރަތަމަ ހަތަރު މެޗުން ދެ މެޗުން މޮޅުވިއިރު، ދެ މެޗުން ވަނީ ބަލިވެފަ އެވެ. ޔުނައިޓެޑުން ކުޅުނު ހަތަރު މެޗުގެ ތެރެއިން، ދެ މެޗުން ބަލިވިއިރު، އެއް މެޗުން އެއްވަރު އަދި އެއް މެޗުން ވަނީ މޮޅުވެފަ އެވެ.
